Rahul Gandhi Greater Noida Delhi Bus Rape Case: ગ્રેટર નોઈડાથી જૂની દિલ્હી જઈ રહેલી એક ચાલતી સ્લીપર બસમાં 16 વર્ષની સગીરા સાથે ડ્રાઈવર અને કંડક્ટર દ્વારા કથિત ગેંગરેપની ઘટના સામે આવ્યા બાદ રાજકીય વિવાદ વકર્યો છે. કોંગ્રેસ નેતા રાહુલ ગાંધીએ સોશિયલ મીડિયા પર પોસ્ટ કરીને કેન્દ્ર સરકાર અને ઉત્તર પ્રદેશ સરકારની સુરક્ષા વ્યવસ્થા સામે સવાલો ઉઠાવ્યા છે. રાહુલ ગાંધીએ સવાલ કર્યો કે દિલ્હી-NCRમાં મહિલાઓની સુરક્ષાની સ્થિતિ એવી બની ગઈ છે કે ગ્રેટર નોઈડાથી દિલ્હી સુધીના આશરે 47 કિલોમીટરના પ્રવાસ દરમિયાન આટલો ગંભીર ગુનો બન્યો હોવા છતાં પોલીસને તેની જાણ કેમ ન થઈ?
ચેકપોસ્ટ અને સુરક્ષા વ્યવસ્થા પર ઉઠાવ્યા સવાલ
રાહુલ ગાંધીએ સુરક્ષા વ્યવસ્થા પર સવાલ ઉઠાવતા કહ્યું કે બસ નોઈડા-ગ્રેટર નોઈડા એક્સપ્રેસવે, દિલ્હી રિંગ રોડ અને રાજ્યની સરહદો પરથી પસાર થઈ હતી. તેમ છતાં કોઈ ચેકપોસ્ટ પર બસને રોકવામાં આવી નહોતી. તેમણે વધુમાં જણાવ્યું કે બસની સીટો પર પડદા લાગેલા હોવાથી અંદર શું થઈ રહ્યું છે તે બહારથી સરળતાથી દેખાતું નહોતું. તેમના મતે આ ઘટના સુરક્ષા અને દેખરેખની વ્યવસ્થા સામે ગંભીર પ્રશ્નો ઊભા કરે છે.
સ્લીપર બસોના નિયમોનું પાલન કેમ નહીં?
નિર્ભયા કાંડને વર્ષો વીતી ગયા હોવા છતાં સ્લીપર બસોની તપાસ અને દેખરેખ માટેના નિયમોનું યોગ્ય રીતે પાલન કેમ થતું નથી, તે અંગે રાહુલ ગાંધીએ સવાલ કર્યો હતો. તેમણે આરોપ લગાવ્યો કે વર્ષોથી ચાલી રહેલી વહીવટી બેદરકારી અને સુરક્ષા વ્યવસ્થાની ખામીઓના કારણે મહિલાઓને જાહેર પરિવહનમાં પણ અસુરક્ષાનો સામનો કરવો પડી રહ્યો છે.
દિલ્હી અને UP પોલીસની જવાબદારી નક્કી કરવાની માંગ
રાહુલ ગાંધીએ દિલ્હી પોલીસ અને ઉત્તર પ્રદેશ પોલીસની કામગીરી પર પણ સવાલ ઉઠાવ્યા હતા. તેમણે આ મામલે જવાબદારી નક્કી કરવાની માંગ કરી છે. તેમના મતે મહિલાઓની સુરક્ષા માટે માત્ર કાયદા બનાવવાથી નહીં, પરંતુ મેદાન પર તેની અસરકારક અમલવારી અને સતત દેખરેખ જરૂરી છે.
ડ્રાઈવર-કંડક્ટરની ધરપકડ, બસ જપ્ત
આ ઘટના 4 ઓગસ્ટની રાત્રે બની હોવાનું સામે આવ્યું છે. બસ ગ્રેટર નોઈડાના પરી ચોકથી જૂની દિલ્હીના કાશ્મીરી ગેટ તરફ જઈ રહી હતી. ઘટના સામે આવ્યા બાદ પોલીસે કાર્યવાહી કરીને બસના ડ્રાઈવર અને કંડક્ટરની ધરપકડ કરી છે. ગુનામાં ઉપયોગમાં લેવાયેલી બસ પણ જપ્ત કરીને ફોરેન્સિક તપાસ માટે મોકલવામાં આવી હોવાનું જાણવા મળ્યું છે. હાલ પોલીસે સમગ્ર મામલે વધુ તપાસ હાથ ધરી છે અને ઘટનાના અન્ય પાસાઓની પણ તપાસ કરવામાં આવી રહી છે.
