Purvanchal Expressway Accident: ઉત્તર પ્રદેશના પૂર્વાંચલ એક્સપ્રેસવે પર શનિવારે વહેલી સવારે એક ભયાનક માર્ગ અકસ્માત સર્જાયો હતો. લખનૌથી ગાઝીપુર તરફ જઈ રહેલી એમ્બ્યુલન્સ રસ્તાની બાજુમાં ઊભેલા પિકઅપ ટ્રક પાછળ ધડાકાભેર અથડાઈ હતી. ટક્કર એટલી જોરદાર હતી કે એમ્બ્યુલન્સનો કચ્ચરઘાણ વળી ગયો હતો અને તેમાં સવાર પાંચેય લોકોનાં ઘટનાસ્થળે જ મોત નીપજ્યાં હતાં.
જયપુરથી પશ્ચિમ બંગાળ મૃતદેહ લઈ જતી વખતે અકસ્માત
પ્રાથમિક તપાસમાં સામે આવ્યું છે કે એમ્બ્યુલન્સમાં સવાર લોકો રાજસ્થાનના જયપુરથી પશ્ચિમ બંગાળ તરફ એક મૃતદેહ લઈ જઈ રહ્યા હતા. આ દરમિયાન સુબેહાના ગેરાવાન ગામ નજીક એક્સપ્રેસવે પર 53.3 કિલોમીટરના માર્ક પાસે એમ્બ્યુલન્સ રસ્તાની બાજુમાં ઊભેલા પિકઅપ ટ્રકના પાછળના ભાગ સાથે અથડાઈ હતી. શનિવારે સવારે લગભગ 6:30 વાગ્યે ત્યાંથી પસાર થતા એક રાહદારીએ અકસ્માત જોયા બાદ તાત્કાલિક 112 કંટ્રોલ રૂમને જાણ કરી હતી. માહિતી મળતાં જ સુબેહા પોલીસ અને એક્સપ્રેસવે સુરક્ષા ટીમ ઘટનાસ્થળે પહોંચી હતી. બચાવ કામગીરી હાથ ધરી પાંચેય મૃતદેહોને હૈદરગઢના કોમ્યુનિટી હેલ્થ સેન્ટર ખાતે ખસેડવામાં આવ્યા હતા.
પોલીસ અધિકારીઓએ ઘટનાસ્થળે પહોંચીને તપાસ કરી
સુબેહાના સ્ટેશન હાઉસ ઓફિસર (SHO) બેચુ સિંહે અકસ્માતમાં પાંચેય લોકોનાં મોત થયાની પુષ્ટિ કરી હતી. ઘટનાની ગંભીરતાને ધ્યાનમાં રાખીને કાર્યકારી પોલીસ અધિક્ષક (SP) વિવેક તિવારી અને હૈદરગઢના સર્કલ ઓફિસર (CO) સમીર સિંહે પણ ઘટનાસ્થળે પહોંચીને નિરીક્ષણ કર્યું હતું. હૈદરગઢના SHO અનિલ કુમાર પાંડેએ જણાવ્યું હતું કે તમામ મૃતકોની ઓળખ કરી લેવામાં આવી છે અને તેમના પરિવારજનોને અકસ્માત અંગે જાણ કરી દેવામાં આવી છે.
અકસ્માતમાં જીવ ગુમાવનારા પાંચેય લોકોની ઓળખ
પોલીસ તપાસમાં અકસ્માતમાં મૃત્યુ પામેલા પાંચેય લોકોનાં નામ અને સરનામાં સામે આવ્યાં છે.
હરિ ઓમ યોગી: પિતા જય સિંહ, રહેવાસી પીપલ ખેડ, અલવર, રાજસ્થાન.
મકબૂલ ખાન: પિતા શુમાન, રહેવાસી જવાહર નગર કાચ્ચી બસ્તી, જયપુર, રાજસ્થાન.
અમીનુર હક: પિતા અબ્દુલ હુસૈન, રહેવાસી મધ્ય બાલા ભૂત, કૂચ બિહાર, પશ્ચિમ બંગાળ.
રૂપિક: પિતા અબ્દુલ રહેમાન, રહેવાસી સુકનાસ પુકાનગંજ મુલીવાલા ભૂત, પશ્ચિમ બંગાળ.
આલમ: એમ્બ્યુલન્સ ચાલક, રહેવાસી ઉત્તર ભાલા ભુત, સુલતાનગંજ, કૂચ બિહાર, પશ્ચિમ બંગાળ.
આ અકસ્માતમાં પાંચેય લોકોનાં મોત થતાં તેમના પરિવારોમાં શોકનો માહોલ છવાયો છે.








