Muhammad Yunus New York Airport Protest: અમેરિકાના ન્યૂયોર્ક એરપોર્ટ પર બાંગ્લાદેશની પૂર્વ અંતરિમ સરકારના પ્રમુખ અને નોબેલ પુરસ્કાર વિજેતા મોહમ્મદ યુનુસને ભારે વિરોધ પ્રદર્શનનો સામનો કરવો પડ્યો છે. અમેરિકામાં વસતા બાંગ્લાદેશી પ્રવાસી નાગરિકોએ એરપોર્ટ પરિસરમાં જ યુનુસનો ઘેરાવ કર્યો હતો. વિરોધ કરી રહેલા લોકોએ તેમને 'આતંકવાદી' ગણાવીને તુરંત દેશ છોડીને પરત જવાની માંગ કરી હતી. વિરોધકર્તાઓએ મોહમ્મદ યુનુસ પર બાંગ્લાદેશમાં હજારો નિર્દોષ લોકોના મૃત્યુ અને દેશની કાયદો-વ્યવસ્થાને સંપૂર્ણપણે ધ્વસ્ત કરવાનો સીધો આરોપ લગાવ્યો હતો.
વાયરલ વીડિયોમાં વ્હીલચેર પર બેઠેલા યુનુસ સમક્ષ વિરોધીઓએ નારેબાજી કરી
સોશિયલ મીડિયા પર ઝડપથી વાયરલ થઈ રહેલા વીડિયોમાં જોવા મળે છે કે, મોહમ્મદ યુનુસ વ્હીલચેર પર બેઠા છે અને એક સુરક્ષાકર્મી તેમને આગળ લઈ જઈ રહ્યો છે. આ જ સમયે બાંગ્લાદેશી પ્રવાસીઓ તેમની નજીક પહોંચી જાય છે અને મોટેથી નારેબાજી કરવા લાગે છે. વીડિયોમાં એક વ્યક્તિનો અવાજ સ્પષ્ટપણે સંભળાઈ રહ્યો છે, જે યુનુસને સંબોધીને કહી રહ્યો છે, "તમે આતંકવાદી છો, તમે અહીં અમેરિકામાં કેમ આવ્યા છો? તમે અહીંથી તુરંત પાછા જાવ."
હજારો લોકોની હત્યા અને બે લાખ લોકોની ધરપકડનો આરોપ
વિરોધ કરી રહેલા પ્રવાસીઓએ આક્રોશ વ્યક્ત કરતા આરોપ લગાવ્યો હતો કે, યુનુસના શાસનકાળ દરમિયાન બાંગ્લાદેશમાં હજારો નિર્દોષ નાગરિકો અને પોલીસકર્મીઓની નિર્મમ હત્યાઓ કરવામાં આવી હતી. આ ઉપરાંત તેમની સરકારે આશરે બે લાખ લોકોની ગેરકાયદેસર ધરપકડ કરાવીને જેલમાં ધકેલ્યા હતા અને દેશની લોકશાહી પ્રણાલીને સંપૂર્ણપણે નષ્ટ કરી દીધી હતી. એરપોર્ટ પર 'યુનુસ ગો બેક' ના નારા સતત ગૂંજતા રહ્યા હતા, જેના કારણે સુરક્ષાકર્મીઓએ તુરંત જ યુનુસને એરપોર્ટના સુરક્ષિત વિસ્તારમાંથી બહાર કાઢવાની ફરજ પડી હતી.
અંતરિમ સરકાર છોડ્યા બાદ પ્રથમ વિદેશ યાત્રા દરમિયાન બની ઘટના
મળતી માહિતી મુજબ આ ઘટના સોમવારે બની હતી. બાંગ્લાદેશની અંતરિમ સરકારના વડાનું પદ છોડ્યા બાદ મોહમ્મદ યુનુસની આ પ્રથમ વિદેશ યાત્રા હતી. કેટલાક અહેવાલો મુજબ વિરોધ પ્રદર્શન કરનારા લોકો શેખ હસીનાની અવામી લીગ પાર્ટી સાથે જોડાયેલા હોવાનું માનવામાં આવે છે, જેમના પર વર્તમાન સમયમાં બાંગ્લાદેશમાં પ્રવૃત્તિઓ કરવા પર પ્રતિબંધ છે. જોકે, આ અંગે કોઈ સત્તાવાર પુષ્ટિ થઈ નથી. આ સમગ્ર ઘટના દરમિયાન યુનુસે મૌન જાળવી રાખ્યું હતું.
બાંગ્લાદેશના રાજકીય સંકટ અને વૈશ્વિક અસંતોષનું પ્રતીક
ન્યૂયોર્ક એરપોર્ટ પર બનેલી આ ઘટના બાંગ્લાદેશની વર્તમાન કટોકટીપૂર્ણ રાજકીય પરિસ્થિતિ અને આંતરરાષ્ટ્રીય સ્તરે વસતા બાંગ્લાદેશી સમુદાયમાં રહેલા અસંતોષને સ્પષ્ટપણે દર્શાવે છે. શેખ હસીના સરકારના પતન બાદ રચાયેલી અંતરિમ સરકાર પણ દેશમાં શાંતિ અને આર્થિક સ્થિરતા પુનઃસ્થાપિત કરવામાં નિષ્ફળ રહી હોવાના આક્ષેપો થઈ રહ્યા છે. યુનુસ અને તેમના પ્રતિનિધિઓ દ્વારા આ વિરોધ પ્રદર્શન અંગે હજુ સુધી કોઈ સત્તાવાર પ્રતિક્રિયા આપવામાં આવી નથી.
