Rahul Gandhi Detained: દિલ્હીમાં 6 ઓક્ટોબરે INDIA બ્લોકના વિરોધ પ્રદર્શન દરમિયાન રાજકીય ગરમાવો જોવા મળ્યો હતો. મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે વિપક્ષી સાંસદોએ સંસદથી ચૂંટણી પંચની કચેરી તરફ કૂચ કરી હતી. પોલીસે કૂચ અટકાવ્યા બાદ રાહુલ ગાંધી સહિત અનેક નેતાઓ આકાશવાણી ભવન પરિસરમાં ધરણા પર બેસી ગયા હતા. 8 કલાકથી વધુ ચાલેલા વિરોધ બાદ પોલીસે તેમને કસ્ટડીમાં લીધા હતા.
રાહુલની અટકાયત બાદ બહેનનો ‘સ્ટ્રીટ ફાઈટર’ અંદાજ
રાહુલ ગાંધી સહિત વિપક્ષના નેતાઓને કસ્ટડીમાં લઈને ન્યૂ પોલીસ લાઇન, કિંગ્સવે કેમ્પ ખાતે લઈ જવાયા હતા. આ દરમિયાન પ્રિયંકા ગાંધી વાડ્રા ત્યાં પહોંચ્યાં હતાં. રાહુલ ગાંધીને મળવા માટે પ્રિયંકા ગાંધી ડિટેન્શન સેન્ટરના ગેટ પર ચઢી ગયાં હતાં. તેઓ ગેટની ઉપર ઊભાં રહી અંદર જવાનો પ્રયાસ કરતા જોવા મળ્યાં હતા. ત્યારબાદ ગેટ ખોલવામાં આવ્યો અને કોંગ્રેસના કાર્યકરો તથા અન્ય પ્રદર્શનકારીઓ પણ પરિસરમાં પ્રવેશ્યા હતા. આ દૃશ્યોનો વીડિયો અને તસવીરો સામે આવ્યા બાદ સોશિયલ મીડિયા પર પ્રિયંકા ગાંધીની આ ઘટના ચર્ચામાં આવી છે.
સંસદથી ચૂંટણી પંચ સુધી કૂચ, પોલીસે રોકી
INDIA બ્લોકના સાંસદો સંસદથી ચૂંટણી પંચની કચેરી તરફ કૂચ કરી રહ્યા હતા. પોલીસ દ્વારા કૂચ અટકાવાયા બાદ રાહુલ ગાંધી સહિત અનેક નેતાઓ આકાશવાણી ભવન પરિસરમાં બેસી ગયા હતા. વિપક્ષી નેતાઓ ચૂંટણી પ્રક્રિયામાં કથિત ગેરરીતિઓ અને CEC જ્ઞાનેશ કુમારના રાજીનામાની માંગ કરી રહ્યા હતા. પોલીસે લાંબા સમયના ધરણા બાદ કાર્યવાહી કરી અને અનેક નેતાઓને કસ્ટડીમાં લીધા હતા.
260 લોકોની અટકાયતનો દાવો
દિલ્હી પોલીસે જણાવ્યું હતું કે વિરોધ પ્રદર્શન માટે લેખિત મંજૂરી આપવામાં આવી નહોતી. અહેવાલો અનુસાર આશરે 260 લોકોને કસ્ટડીમાં લેવામાં આવ્યા હતા, જેમાં 10 સાંસદો પણ સામેલ હતા. જોકે, અલગ-અલગ અહેવાલોમાં કસ્ટડીમાં લેવાયેલા સાંસદોની સંખ્યા અંગે થોડો તફાવત જોવા મળે છે. રાહુલ ગાંધી, પ્રિયંકા ગાંધી સહિતના નેતાઓને બાદમાં મુક્ત કરવામાં આવ્યા હતા.
ચૂંટણી પંચે શું કહ્યું?
ચૂંટણી પંચે જણાવ્યું હતું કે સાંજે 4 વાગ્યા સુધી કોઈ રાજકીય પક્ષ તરફથી ઔપચારિક મુલાકાત માટે વિનંતી મળી નહોતી. ત્યારબાદ દિલ્હી પોલીસ મારફતે 240 સાંસદોના પ્રતિનિધિમંડળ દ્વારા સંસદ ભવન એનેક્સીમાં મુલાકાતની માહિતી મળી હતી. ચૂંટણી પંચે આ સ્થળે બેઠકને પોતાના પ્રોટોકોલ મુજબ યોગ્ય ન ગણાવી હતી. પંચે મેમોરેન્ડમ સ્વીકારવા માટે વરિષ્ઠ અધિકારી મોકલવાનો વિકલ્પ આપ્યો હતો, પરંતુ સાંસદોએ આ વિકલ્પ સ્વીકાર્યો નહોતો.
વિપક્ષનો વિરોધ ચાલુ રાખવાનો સંકેત
પ્રિયંકા ગાંધી સહિત કોંગ્રેસના નેતાઓએ આરોપ લગાવ્યો કે વિપક્ષને ચૂંટણી પ્રક્રિયા અંગેના સવાલો અને CECના રાજીનામાની માંગ સાથે ચૂંટણી પંચને મળવા દેવામાં આવી રહ્યા નથી. રાહુલ ગાંધીએ પણ સરકાર અને ચૂંટણી પંચ સામે આકરા પ્રહારો કર્યા હતા. બીજી તરફ, ચૂંટણી પંચે પોતાની પ્રક્રિયા અને પ્રોટોકોલનો હવાલો આપ્યો છે. દરમિયાન કોંગ્રેસે વિરોધ ચાલુ રાખવાનો સંકેત આપ્યો છે. હવે મકર દ્વાર પર વિરોધ અને રાષ્ટ્રપતિ ભવન સુધી કૂચની પણ ચર્ચા છે, જોકે તેના ચોક્કસ સમય અંગે અંતિમ નિર્ણય બાકી હોવાનું જણાવાયું છે.








