Praful Patel Meets Sharad Pawar in Hospital: મહારાષ્ટ્રના રાજકારણમાં ફરી એકવાર હલચલ તેજ થઈ છે. NCPના વરિષ્ઠ નેતા પ્રફુલ્લ પટેલે ગુરુવારે મુંબઈની બ્રીચ કેન્ડી હોસ્પિટલમાં જઈને NCP(SP)ના વડા શરદ પવારની મુલાકાત લીધી હતી અને તેમના સ્વાસ્થ્યના ખબરઅંતર પૂછ્યા હતા. મુલાકાત બાદ પ્રફુલ્લ પટેલે જણાવ્યું હતું કે શરદ પવારની તબિયત સ્થિર છે અને જરૂરી તબીબી તપાસ પૂર્ણ થયા બાદ તેઓ એકથી બે દિવસમાં ઘરે પરત ફરી શકે છે. જોકે, NCP પ્રમુખ સુનેત્રા પવારના નેતૃત્વથી પ્રફુલ્લ પટેલ નારાજ હોવાના અહેવાલો વચ્ચે આ મુલાકાતને કારણે મહારાષ્ટ્રના રાજકીય વર્તુળોમાં નવી ચર્ચા શરૂ થઈ છે.
શરદ પવારની તબિયતને લઈને હોસ્પિટલમાં સારવાર
શરદ પવારને શ્વાસ લેવામાં તકલીફ અને છાતીમાં ઇન્ફેક્શનની સમસ્યાને પગલે બુધવારે રાત્રે મુંબઈની બ્રીચ કેન્ડી હોસ્પિટલમાં દાખલ કરવામાં આવ્યા હતા. આ પહેલાં તેમને પુણેની રૂબી હોલ ક્લિનિકમાંથી ડિસ્ચાર્જ કરવામાં આવ્યા હતા. હોસ્પિટલના ડૉક્ટર પ્રતીત સમદાનીએ ગુરુવારે પત્રકારોને જણાવ્યું હતું કે શરદ પવારની સ્થિતિ સ્થિર છે અને તેમની સારવાર ચાલી રહી છે. જરૂરી તબીબી તપાસ પણ કરવામાં આવી રહી છે.
'કોઈ રાજકીય ચર્ચા નહીં, માત્ર પારિવારિક સંબંધો'
શરદ પવાર સાથે મુલાકાત કર્યા બાદ પ્રફુલ્લ પટેલે રાજકીય ચર્ચાઓની અટકળોને નકારી કાઢી હતી. તેમણે કહ્યું કે શરદ પવાર અને તેમની પુત્રી સુપ્રિયા સુલે સાથે તેમના પારિવારિક સંબંધો છે અને તેના કારણે તેઓ મુલાકાત લેતા રહે છે. પ્રફુલ્લ પટેલે જણાવ્યું કે બે દિવસ પહેલાં થાકને કારણે શરદ પવારને પુણેની રૂબી હોલ ક્લિનિકમાં તપાસ માટે લઈ જવામાં આવ્યા હતા. ત્યારબાદ તેઓ મુંબઈ આવ્યા હતા અને અહીં તેમની તબિયત સારી છે. વર્ષમાં એક કે બે વખત સંપૂર્ણ મેડિકલ ચેકઅપ કરાવવાની પ્રક્રિયાના ભાગરૂપે તેમને બ્રીચ કેન્ડી હોસ્પિટલમાં દાખલ કરવામાં આવ્યા છે. તેમણે વધુમાં કહ્યું કે શરદ પવાર સારા મૂડમાં હતા અને દેશ તથા રાજ્યના રાજકારણમાં શું ચાલી રહ્યું છે તે અંગે પણ પૂછપરછ કરી રહ્યા હતા. તમામ તપાસ પૂર્ણ થયા બાદ તેઓ એકથી બે દિવસમાં ઘરે પરત ફરી શકે છે.
વડાપ્રધાન મોદીના ફોન અંગે પણ પ્રફુલ્લ પટેલે કરી વાત
વડાપ્રધાન નરેન્દ્ર મોદીએ શરદ પવાર સાથે ફોન પર વાતચીત કરી તેમના સ્વાસ્થ્યની જાણકારી મેળવી હતી. આ અંગે પ્રફુલ્લ પટેલે કહ્યું કે શરદ પવાર અને નરેન્દ્ર મોદી વચ્ચે ઘણા વર્ષોથી સારા અને સૌહાર્દપૂર્ણ સંબંધો રહ્યા છે. તેમણે યાદ અપાવ્યું કે જ્યારે તેઓ દિલ્હીમાં UPA સરકારમાં હતા અને નરેન્દ્ર મોદી ગુજરાતના મુખ્યમંત્રી હતા, ત્યારથી બંને નેતાઓ વચ્ચે પરસ્પર આદર અને સારા સંબંધો રહ્યા છે. તેમના મતે, શરદ પવારની તબિયત અંગે જાણ થયા બાદ વડાપ્રધાન દ્વારા ખબરઅંતર પૂછવા એ સ્વાભાવિક બાબત છે.
સુનેત્રા પવારના નેતૃત્વ સામે અસંતોષની ચર્ચા
આ સમગ્ર ઘટનાક્રમ વચ્ચે NCPના આંતરિક મતભેદો પણ ચર્ચામાં છે. અહેવાલો અનુસાર, પક્ષના કેટલાક વરિષ્ઠ નેતાઓ પક્ષ પ્રમુખ સુનેત્રા પવાર અને તેમના પુત્ર પાર્થ પવારના નેતૃત્વથી અસંતોષ ધરાવે છે. આ મામલે કેન્દ્રીય ગૃહમંત્રી અમિત શાહે રવિવારે મોડી રાત્રે NCPના કેટલાક વરિષ્ઠ પદાધિકારીઓ સાથે બેઠક કરી હતી. આ બેઠકમાં પક્ષની અંદર ચાલી રહેલા મતભેદો અંગે ચર્ચા થઈ હોવાનું કહેવાય છે. અમિત શાહે પક્ષના હિતમાં આંતરિક મતભેદો ઉકેલવા નેતાઓને વિનંતી કરી હતી. આ સ્થિતિમાં પ્રફુલ્લ પટેલની શરદ પવાર સાથેની મુલાકાતને લઈને રાજકીય અટકળો તેજ થઈ છે. જોકે, પ્રફુલ્લ પટેલે પોતે આ મુલાકાતને માત્ર પારિવારિક સંબંધો સાથે જોડેલી ગણાવી છે અને કોઈ રાજકીય ચર્ચા થઈ હોવાનો ઇનકાર કર્યો છે.
