Australia Tightens Student Visa Rules Bans Dependents:ઓસ્ટ્રેલિયાની અર્થવ્યવસ્થામાં આંતરરાષ્ટ્રીય શિક્ષણ ચોથા ક્રમનો સૌથી મોટો નિકાસ ક્ષેત્ર છે, જેણે જૂન 2025 સુધીના આંકડા અનુસાર અધધ 53.6 અબજ ઓસ્ટ્રેલિયન ડૉલરનું સીધું આર્થિક યોગદાન આપ્યું છે. આમ છતાં, સ્થાનિક રાજકારણમાં વધતી મોંઘવારી, મકાનોની અછત અને હાઉસિંગ ક્રાઈસિસનું સમગ્ર દોષારોપણ વિદેશી વિદ્યાર્થીઓ પર ઢોળીને સરકારે તેમને જ નિશાન બનાવ્યા છે. સેન્ટર-લેફ્ટ લેબર સરકારે લીધેલા તાજેતરના કડક નિર્ણયો હેઠળ હવે વિદેશી વિદ્યાર્થીઓ પોતાના પાર્ટનર કે બાળકોને સાથે લાવી શકશે નહીં. સામાન્ય રીતે કોઈપણ દેશ પોતાના સૌથી મોટા આવકના સ્ત્રોતને પ્રોત્સાહન આપતો હોય છે, પરંતુ ઓસ્ટ્રેલિયામાં વિદેશી વિદ્યાર્થીઓ પોતાના અધિકારો ગુમાવીને સ્થાનિક રાજકીય દબાણનો ભોગ બની રહ્યા છે.
સ્થાનિક ચૂંટણીમાં દક્ષિણપંથી દબાણ અને 2028 સુધી ઈમિગ્રેશન ઘટાડવાનો ટાર્ગેટ
કડક નિર્ણયો એવા સમયે લેવાયા છે જ્યારે દક્ષિણપંથી વન નેશન પાર્ટીએ ત્રણ વર્ષમાં કામચલાઉ વસાહતીઓની સંખ્યા સાડા સાત લાખ સુધી ઘટાડવાની માગણી સાથે મોટો રાજકીય દબદબો બનાવવાનું શરૂ કર્યું છે. જોકે ગૃહ બાબતોના મંત્રી ટોની બર્કે દાવો કર્યો છે કે આ નિર્ણય કોઈ રાજકીય પક્ષના દબાણ હેઠળ નથી લેવાયો, પરંતુ વાસ્તવિકતા એ છે કે સરકારે મતદારોના રોષને શાંત કરવા 2028 સુધીમાં વાર્ષિક ઈમિગ્રેશનને 3 લાખથી ઘટાડીને 2.25 લાખ સુધી સીમિત કરવાનો લક્ષ્યાંક નક્કી કર્યો છે. ઓવરસ્ટે કરનારાઓ સામે કાર્યવાહી કરવા 100 વધારાના કમ્પ્લાયન્સ ઓફિસરો તૈનાત કરવામાં આવશે અને નિયમોનો ભંગ કરનારાઓને દેશ છોડી દેવાની કડક ચેતવણી આપવામાં આવી છે.
પેસિફિક દેશોને છૂટછાટ અને ભારતીય પરિવારો માટે દરવાજા બંધ
નવા નિયમોમાં એક અજીબોગરીબ ભેદભાવ પણ જોવા મળી રહ્યો છે. પેસિફિક આઇલેન્ડ અને દક્ષિણ-પૂર્વ એશિયાના અમુક પસંદગીના દેશોના વિદ્યાર્થીઓને હજુ પણ તેમના પરિવારોને સાથે લાવવાની છૂટ આપવામાં આવી છે, જ્યારે ભારત સહિતના મુખ્ય સ્ત્રોત દેશોના વિદ્યાર્થીઓ પર પ્રતિબંધ લાદી દેવામાં આવ્યો છે. ભારતીય પરિવારોમાં ઉચ્ચ શિક્ષણ મેળવવાની સાથે પરિવાર સાથે રહેવાની સામાન્ય અપેક્ષા હોય છે, ખાસ કરીને પરિણીત વિદ્યાર્થીઓ કે જેઓ માસ્ટર્સ કે પીએચડી માટે જાય છે તેમના માટે આ નિર્ણય આંચકાજનક છે. આ ઉપરાંત બેકપેકર્સ માટે બેલેટ સિસ્ટમ દાખલ કરવામાં આવી છે અને વિદ્યાર્થી વિઝાનું રિન્યુઅલ માત્ર આગલા ઉચ્ચ સ્તરના ક્વોલિફિકેશન માટે જ માન્ય રાખવાનો નિયમ બનાવીને વિદેશીઓ માટે લાંબો સમય ટકી રહેવું મુશ્કેલ બનાવી દેવાયું છે.
કેનેડા બાદ હવે ઓસ્ટ્રેલિયા પણ અસુરક્ષિત બન્યું
કેનેડાએ વિઝા નિયમો કડક કર્યા બાદ ભારતીય વિદ્યાર્થીઓ માટે ઓસ્ટ્રેલિયા સૌથી આકર્ષક વિકલ્પ તરીકે ઉભરી આવ્યું હતું, પરંતુ આ નવા આંચકાથી મધ્યમવર્ગીય પરિવારોનું મોટું આર્થિક નુકસાન થશે. લાખો રૂપિયાની ફી ભરીને વિશ્વસ્તરીય શિક્ષણ મેળવવા જતાં વિદ્યાર્થીઓ હવે પરિવારોથી વિખૂટા પડીને એકલા રહેવા મજબૂર બનશે. માત્ર ટેક્સ અને ફીની કમાણી માટે વિદેશી વિદ્યાર્થીઓનો ઉપયોગ કરવો અને બીજી તરફ દેશની આંતરિક સમસ્યાઓ જેમ કે રેન્ટલ ક્રાઈસિસ અને મોંઘવારીનો બધો દોષ તેમના માથે થોપી દેવાની આ નીતિથી લાંબા ગાળે ઓસ્ટ્રેલિયાના એજ્યુકેશન સેક્ટરની પ્રતિષ્ઠાને ગંભીર નુકસાન પહોંચવાની શક્યતા છે.
