Gadkari's Controversial Remark: કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી ફરી એકવાર પોતાના નિવેદનને લઈને ચર્ચામાં આવ્યા છે. નાગપુરમાં યોજાયેલા એક કાર્યક્રમ દરમિયાન ગડકરીએ પોતાની ચૂંટણી અંગે વાત કરતા દાવો કર્યો હતો કે તેમને શિક્ષિત અને મોટા વિસ્તારોની સરખામણીએ અંડરવર્લ્ડ, ગુનાહિત અને રેડ લાઈટ વિસ્તારોમાંથી વધુ મત મળ્યા હતા. તેમના આ નિવેદનનો વીડિયો હવે ચર્ચામાં છે.
'શિક્ષિત વિસ્તારોમાંથી 70-75%, જ્યારે ત્યાંથી 92% વોટ મળ્યા'
કાર્યક્રમ દરમિયાન ગડકરીએ જણાવ્યું હતું કે નાગપુરના મોટા અને શિક્ષિત વિસ્તારોમાં તેમને કુલ મતદાનના આશરે 70થી 75 ટકા મત મળ્યા હતા. જ્યારે તેમણે દાવો કર્યો કે ગુનાહિત પ્રવૃત્તિઓ અને અંડરવર્લ્ડ સાથે જોડાયેલા વિસ્તારોમાં તેમને આશરે 92 ટકા મત મળ્યા હતા. ગડકરીના આ દાવાને લઈને રાજકીય વર્તુળોમાં ચર્ચા શરૂ થઈ છે.
'હું તેમની પ્રવૃત્તિઓનું સમર્થન કરતો નથી'
ગડકરીએ પોતાના નિવેદન અંગે સ્પષ્ટતા કરતા કહ્યું હતું કે અંડરવર્લ્ડ કે અસામાજિક પ્રવૃત્તિઓ સાથે જોડાયેલા લોકો તેમને સમર્થન આપે છે તેનો અર્થ એવો નથી કે તેઓ તેમની પ્રવૃત્તિઓનું સમર્થન કરે છે. તેમણે કહ્યું કે વિવિધ વિસ્તારોમાં રસ્તા બનાવવા અને સામાજિક કાર્યો કરવાના કારણે ત્યાંના લોકોનો તેમને મત મળ્યો હોવાનું તેઓ માને છે. ગડકરીએ ભારપૂર્વક જણાવ્યું કે આ વાતને તેમના અને આવા લોકો વચ્ચેના અંગત સંબંધો અથવા તેમની પ્રવૃત્તિઓના સમર્થન તરીકે જોવી જોઈએ નહીં.
'વિકાસના કામને કારણે લોકોનો મળ્યો સહકાર'
ગડકરીના જણાવ્યા અનુસાર, તેમણે જે વિસ્તારોમાં વિકાસ અને સામાજિક કાર્યો કર્યાં છે ત્યાંના લોકોએ તેમને ચૂંટણીમાં સમર્થન આપ્યું હતું. તેમના નિવેદનનો મુખ્ય મુદ્દો એ હતો કે મતદાર કોઈપણ સામાજિક વર્ગમાંથી હોય, પરંતુ જો વિકાસના કામથી તેને ફાયદો થયો હોય તો તે તેના આધારે મત આપી શકે છે.
અગાઉ પણ નિવેદનોને લઈને ચર્ચામાં રહ્યા છે
નીતિન ગડકરી અગાઉ પણ પોતાના બેબાક નિવેદનોને કારણે અનેક વખત ચર્ચામાં રહ્યા છે. તેઓ ઘણીવાર રાજકારણ, વિકાસ અને પોતાની પાર્ટીના નેતાઓ અંગે પણ સ્પષ્ટ મત વ્યક્ત કરતા જોવા મળ્યા છે. તાજેતરમાં તેમણે નવી પેઢીને તક આપવાની જરૂરિયાત અંગે પણ નિવેદન આપ્યું હતું. હવે નાગપુરના કાર્યક્રમમાં ચૂંટણી અને મતદાન અંગે કરેલા તેમના તાજા નિવેદનને કારણે ફરી રાજકીય ચર્ચા તેજ થઈ છે.
