China warning Bhotekoshi river: નેપાળમાં બુધવારે આવેલા વિનાશક પૂરની સ્થિતિ હજુ સંપૂર્ણપણે થાળે પડી નથી, ત્યાં નેપાળ-તિબેટ સરહદી વિસ્તારમાં વધુ એક ગંભીર ખતરો ઊભો થયો છે. ભૂસ્ખલનના કારણે એક વિશાળ કુદરતી ‘બેરિયર લેક’ બની ગયું છે અને તેમાં પાણી ઓવરફ્લો થઈ રહ્યું હોવાનું ચીનના જળ સંસાધન મંત્રાલયે જણાવ્યું છે. ચેતવણી મુજબ આગામી દિવસોમાં પાણીનો પ્રવાહ વધતાં આ કુદરતી બંધ ગમે ત્યારે તૂટી શકે છે, જેના કારણે ફરી એકવાર મોટા પાયે જળપ્રલયની સ્થિતિ સર્જાવાની આશંકા છે.
લેકમાં 20 લાખ ક્યુબિક મીટર પાણી ભરાયું
ચીનના જળ સંસાધન મંત્રાલયના અંદાજ પ્રમાણે ગુરુવારે સવાર સુધીમાં આ કુદરતી સરોવરમાં આશરે 20 લાખ ક્યુબિક મીટર પાણી એકત્ર થઈ ચૂક્યું હતું. અહેવાલો અનુસાર આગામી ત્રણ દિવસમાં વધુ 30 લાખ ક્યુબિક મીટર પાણી તેમાં પ્રવેશી શકે છે. પાણીનો આ વધતો પ્રવાહ કુદરતી બંધ પર ભારે દબાણ ઊભું કરી રહ્યો છે. જો બંધ તૂટી જાય તો નીચેના વિસ્તારોમાં અચાનક ભારે પાણી ધસી આવવાની શક્યતા છે.
સેટેલાઇટથી સતત નજર, આગામી 72 કલાક મહત્વપૂર્ણ
પરિસ્થિતિની ગંભીરતાને ધ્યાનમાં રાખીને ચીનની સરકાર સેટેલાઇટ અને હાઇડ્રોલોજિકલ સિમ્યુલેશનની મદદથી આ સરોવર પર સતત નજર રાખી રહી છે. આગામી 72 કલાકને અત્યંત મહત્વપૂર્ણ માનવામાં આવી રહ્યા છે. અધિકારીઓ બંધ તૂટવાની સ્થિતિમાં પાણી કયા વિસ્તારો સુધી પહોંચી શકે અને નીચાણવાળા વિસ્તારોમાં કેટલું નુકસાન થઈ શકે તેનું પણ સતત મૂલ્યાંકન કરી રહ્યા છે. બીજી તરફ, સંવેદનશીલ વિસ્તારોમાં તકેદારી વધારવામાં આવી રહી છે.
ભૂસ્ખલનથી બન્યું બેરિયર લેક, ત્રિશૂલી નદી પર ખતરો
આ કુદરતી સરોવર નેપાળમાં છોચેન ખોલા અને પુરેપુ ત્સાંગપો નદીઓના સંગમ નજીક ભૂસ્ખલનના કારણે પાણી ભરાવાથી બન્યું હોવાનું જણાવવામાં આવ્યું છે. આ બંને નદીઓ તિબેટમાંથી નીકળે છે અને નેપાળમાં પ્રવેશ્યા બાદ જળપ્રવાહ ભોટેકોશી નદી તરીકે ઓળખાય છે, જે આગળ જઈને ત્રિશૂલી નદીની મુખ્ય ઉપનદી બને છે. બુધવારના પૂરમાં રસુવા જિલ્લાના તિમુરે અને સ્યાફ્રુબેસી વિસ્તારમાં રસ્તા, પુલો અને ઈમારતોને પહેલેથી જ ભારે નુકસાન થયું છે. આવી સ્થિતિમાં જો નવું બેરિયર લેક તૂટે તો ત્રિશૂલી નદીના કાંઠાના વિસ્તારો તેમજ ચાલુ બચાવ કામગીરી માટે મોટો ખતરો ઊભો થઈ શકે છે.
