જમ્મુ અને કશ્મીર પોલીસનું વિસ્ફોટ અંગે મોટું નિવેદન, "નૌગામ પોલીસ સ્ટેશનમાં થયેલો વિસ્ફોટ માત્ર એક અકસ્માત હતો..."

Naugam Police Station blast DGP statement: જમ્મુ અને કશ્મીરના ડીજીપી નલિન પ્રભાતે નૌગામ પોલીસ સ્ટેશનમાં થયેલા વિસ્ફોટને અકસ્માત ગણાવ્યો છે. તેમણે એક પ્રેસ કોન્ફરન્સમાં કહ્યું કે, પોલીસ સ્ટેશનમાં થયેલો વિસ્ફોટ કોઈ આતંકવાદી કાવતરું કે હુમલો ન હતો, પરંતુ ફક્ત એક અકસ્માત હતો જે FSL ટીમ સેમ્પલ એકત્રિત કરી રહી હતી ત્યારે થયો હતો.

દુર્ભાગ્યપૂર્ણ અકસ્માત?
તેમણે કહ્યું કે, ફરીદાબાદમાંથી જપ્ત કરાયેલા વિસ્ફોટકોના નમૂના લેવાની પ્રક્રિયા બે દિવસથી ચાલી રહી હતી અને આ ઘટના રાત્રે લગભગ 11:20 વાગ્યે બની હતી. ડીજીપી નલિન પ્રભાતે કહ્યું, "આ એક દુર્ભાગ્યપૂર્ણ અકસ્માત છે. વિગતવાર તપાસ ચાલી રહી છે." ગૃહ મંત્રાલયે પણ ઘટનાની વિગતો આપતા એક નિવેદન જારી કરીને વિસ્ફોટને માત્ર એક અકસ્માત ગણાવ્યો.

આતંકવાદી કાવતરું કે હુમલાનો કોઈ એંગલ નથી
ડીજીપીએ સ્પષ્ટતા કરી હતી કે, "આ ઘટનામાં આતંકવાદી કાવતરું કે બાહ્ય હસ્તક્ષેપનો કોઈ એંગલ નથી. આ અકસ્માતમાં 12 લોકો માર્યા ગયા છે અને 32 લોકો ઘાયલ થયા હતા. કાટમાળ દૂર કરવાનું કામ હાલમાં ચાલી રહ્યું છે, તેથી મૃત્યુઆંક અને ઈજાનો આંકડો વધી શકે છે.

કુલ 12 લોકો માર્યા ગયા
આ ઘટનામાં કુલ 12 લોકો માર્યા ગયા હતા, જેમાં એક SIA અધિકારી, ત્રણ FSL સભ્યો, બે ક્રાઈમ વિંગના કર્મચારીઓ, બે મહેસૂલ અધિકારીઓ અને ટીમ સાથે આવેલા એક દરજીનો સમાવેશ થાય છે. આ ઉપરાંત, 27 પોલીસકર્મી, બે મહેસૂલ અધિકારીઓ અને ત્રણ નાગરિકો ઘાયલ થયા છે. બધા ઘાયલોને તાત્કાલિક હોસ્પિટલમાં લઈ જવામાં આવ્યા હતા અને તેમની સારવાર ચાલી રહી છે."

"કામ ખૂબ જ સાવધાની સાથે કરવામાં આવી રહ્યું હતું, પરંતુ..."
ડીજીપી નલિન પ્રભાતે જણાવ્યું હતું કે, ફરીદાબાદમાંથી મળેલા વિસ્ફોટકો અને રસાયણોનો મોટો જથ્થો તપાસ માટે નૌગામ પોલીસ સ્ટેશન લાવવામાં આવ્યો હતો. તેના સંવેદનશીલ સ્વભાવને કારણે, કામ સાવધાનીપૂર્વક હાથ ધરવામાં આવી રહ્યું હતું, પરંતુ ગઈકાલે રાત્રે આકસ્મિક વિસ્ફોટ થયો હતો.

32 લોકો ઘાયલ
ડીજીપીના જણાવ્યા મુજબ, આ ઘટનામાં 12 લોકો માર્યા ગયા હતા અને 32 લોકો ઘાયલ થયા હતા. નૌગામ પોલીસ સ્ટેશનને પણ વ્યાપક નુકસાન થયું હતું. તેમણે જણાવ્યું હતું કે, "આ સંપૂર્ણપણે એક અકસ્માત હતો અને વધુ કોઈ અટકળો બિનજરૂરી છે. વિસ્ફોટથી વિસ્તારમાં ગભરાટ ફેલાયો હતો. દક્ષિણ શ્રીનગરમાં ઘણા કિલોમીટર દૂર વિસ્ફોટનો પડઘો સંભળાયો હતો. થોડી જ વારમાં પોલીસ સ્ટેશનમાંથી ભારે જ્વાળાઓ ઉછળવા લાગી હતી. માહિતી મળતાં જ એમ્બ્યુલન્સ અને ફાયર બ્રિગેડની ટીમો ઘટનાસ્થળે દોડી ગઈ હતી, અને ઘાયલોને તાત્કાલિક નજીકની હોસ્પિટલોમાં ખસેડવામાં આવ્યા હતા. સાવચેતી રૂપે જિલ્લા હોસ્પિટલ સહિત તમામ આરોગ્ય કેન્દ્રોને એલર્ટ પર રાખવામાં આવ્યા છે."