Assam Jail HIV Positive Prisoners News: આસામની જેલોમાં બંધ કેદીઓમાં HIV સંક્રમણના કેસોમાં અચાનક થયેલા ચિંતાજનક વધારા બાદ રાજ્ય સરકાર એક્શન મોડમાં આવી ગઈ છે. મુખ્યમંત્રી હિમંતા બિસ્વા શર્માએ સ્પષ્ટ કર્યું છે કે, સરકાર આ મામલાની ઊંડાણપૂર્વક તપાસ કરશે.
4 મહિનામાં 226 કેદીઓ સંક્રમિત મળ્યા
અહેવાલો અનુસાર, છેલ્લા ચાર મહિનામાં આસામની 31 જેલોમાં યોજાયેલા સ્ક્રીનિંગ કેમ્પ દરમિયાન કુલ 226 કેદીઓ HIV પોઝિટિવ હોવાનું સામે આવ્યું છે. આ ગંભીર બાબત અંગે મુખ્યમંત્રી શર્માએ જણાવ્યું હતું કે, "અમને જેલમાં કેદીઓ સંક્રમિત હોવાની માહિતી મળી છે. અમે આ ઘટનાને ગંભીરતાથી લીધી છે. ગુવાહાટી હાઈકોર્ટ પણ આ સમગ્ર પરિસ્થિતિ પર નજર રાખી રહી છે. કેદીઓમાં આ રોગ કેવી રીતે અને કયા સંજોગોમાં સંક્રમિત થયો તેની ઝીણવટભરી તપાસ કરાશે."
શ્રીભૂમિ અને ગુવાહાટી જેલમાં સૌથી વધુ કેસ
આસામની શ્રીભૂમિ જિલ્લા જેલમાં 11 કેદીઓ સંક્રમિત મળતાં સમગ્ર જિલ્લામાં ચિંતાનું મોજું ફરી વળ્યું છે, જેમાં એક મહિલા કેદી પણ સામેલ છે. આ ઉપરાંત ગુવાહાટી સેન્ટ્રલ જેલમાં પણ રુટીન સ્ક્રિનિંગ દરમિયાન એક ડઝનથી વધુ કેદીઓ HIV પોઝિટિવ હોવાનું ખુલ્યું છે. જેલ સત્તાવાળાઓના જણાવ્યા મુજબ, પોઝિટિવ મળી આવેલા મોટાભાગના કેદીઓ નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ હેઠળ નશાખોરી અને ડ્રગ્સ પેડલિંગના કેસોમાં જેલમાં બંધ છે.
ART સેન્ટરો દ્વારા સારવાર શરૂ
આસામ સ્ટેટ એઇડ્સ કન્ટ્રોલ સોસાયટીની ટીમો કેદીઓને તબીબી સારવાર અને જરૂરી કાઉન્સેલિંગ આપવા માટે જેલોની મુલાકાત લઈ રહી છે. કુલ 226 પોઝિટિવ કેદીઓમાંથી 202 કેદીઓને એન્ટિરેટ્રોવાયરલ થેરાપી (ART) આપવાની પ્રક્રિયા શરૂ કરી દેવામાં આવી છે. સુરક્ષા કારણોસર કેદીઓને વારંવાર જેલની બહાર હોસ્પિટલે લઈ જવા મુશ્કેલ હોવાથી મેડિકલ ટીમો પોતે જેલની અંદર જઈને સારવાર પૂરી પાડી રહી છે.
નશાખોરી અને આસામની જેલ સુરક્ષા અંગે વિશેષ માહિતી
ઇન્જેક્ટેબલ ડ્રગ્સ (IDU) મોટું કારણ: આરોગ્ય વિભાગ અને જેલ સત્તાવાળાઓની પ્રાથમિક વિગતો મુજબ સંક્રમિત થયેલા આશરે 95% કેદીઓ ભૂતકાળમાં ડ્રગ્સના એડિક્ટ રહ્યા છે અને દૂષિત સોય દ્વારા નશો કરવાનો ઇતિહાસ ધરાવે છે.
જેલની અંદર નશાના દૂષણ પર સવાલો: જેલમાં પ્રવેશતા સમયે કેદીઓ સંક્રમિત હતા કે જેલની અંદર ગયા પછી એક જ સીરિંજ કે સોયથી ડ્રગ્સ લેવાના કારણે HIV ફેલાયો, તે મુદ્દે જેલ પ્રશાસનની સુરક્ષા સામે મોટા પ્રશ્નાર્થો ઊભા થયા છે.
આસામમાં HIVના એક્ટિવ કેસ: આસામના આરોગ્ય મંત્રી અશોક સિંઘલના જણાવ્યા મુજબ સમગ્ર આસામ રાજ્યમાં હાલમાં અંદાજે 33,000 HIV/એઇડ્સના સક્રિય દર્દીઓ નોંધાયેલા છે. ઉત્તર-પૂર્વના રાજ્યોમાં યુવાનોમાં વધતી નશાખોરી આરોગ્ય તંત્ર માટે મોટો પડકાર બની રહી છે.
