Nagpur Bank Robbery Video: મહારાષ્ટ્રના નાગપુરમાં બેંક લૂંટની ચોંકાવનારી ઘટના સામે આવી છે. સક્કરદરા વિસ્તારમાં આવેલી SBI બેંકમાં એક લૂંટારૂ ફિલ્મી સ્ટાઈલમાં ઘૂસી આવ્યો હતો. તેણે બેંકના કર્મચારીઓની આંખમાં મરચાનો પાઉડર છાંટવાનો પ્રયાસ કર્યો અને આશરે 4 લાખ રૂપિયાની લૂંટ ચલાવીને ફરાર થઈ ગયો હતો. સમગ્ર ઘટનાના CCTV ફૂટેજ પણ સામે આવ્યા છે.
પોલીસે અડધા કલાકમાં આરોપીને દબોચ્યો
બેંકમાં લૂંટની જાણ થતાં જ પોલીસે તાત્કાલિક કાર્યવાહી શરૂ કરી હતી. CCTV ફૂટેજની મદદથી પોલીસે આરોપીને માત્ર અડધા કલાકમાં જ ઝડપી લીધો હતો. પોલીસે તેની પાસેથી લૂંટની રકમ પણ કબજે કરી લીધી છે. હવે પોલીસ આરોપીએ આ ઘટનાને કયા ઈરાદાથી અંજામ આપ્યો હતો તેની તપાસ કરી રહી છે.
કર્મચારીઓની આંખમાં મરચું છાંટવાનો પ્રયાસ
આરોપીએ બેંકમાં ઘૂસ્યા બાદ ફિલ્મી સ્ટાઈલમાં કર્મચારીઓને નિશાન બનાવ્યા હતા. તેણે એક પછી એક કર્મચારીઓની આંખમાં મરચાનો પાઉડર છાંટવાનો પ્રયાસ કર્યો હતો. આ સમગ્ર ઘટનાના CCTV ફૂટેજ સામે આવ્યા છે, જેમાં લૂંટારૂની હરકતો સ્પષ્ટપણે જોવા મળી રહી છે. ઘટનાને કારણે બેંકમાં થોડા સમય માટે અફરાતફરીનો માહોલ સર્જાયો હતો.
