Rapido driver arrest linked to Jaish-E-Mohammed: મુંબઈના માહિમ મેટ્રો સ્ટેશન નજીક મહારાષ્ટ્ર એટીએસે મોહમ્મદ હસન અબુ સરમદ અખ્તર નામના રેપિડો ડ્રાઇવરની ધરપકડ કરી છે. તપાસ એજન્સીને તેના પ્રતિબંધિત આતંકવાદી સંગઠન જૈશ-એ-મોહમ્મદ (JeM) સાથે કથિત સંબંધ હોવાની શંકા છે. આરોપી પર સોશિયલ મીડિયા દ્વારા કટ્ટરપંથી વિચારધારાનો પ્રચાર કરવા, ધાર્મિક જૂથો વચ્ચે દુશ્મનાવટ વધારવા અને વડા પ્રધાન નરેન્દ્ર મોદી સહિત રાજકીય નેતાઓ વિરુદ્ધ વાંધાજનક ટિપ્પણીઓ કરવાનો આરોપ છે.
રેપિડો ડ્રાઇવર અને પરફ્યુમ વેચનાર તરીકે કરતો હતો કામ
અહેવાલો અનુસાર, મુંબઈના માહિમનો રહેવાસી અખ્તર રેપિડો ડ્રાઇવર અને પરફ્યુમ વેચનાર તરીકે કામ કરતો હતો. મહારાષ્ટ્ર એટીએસે ગુપ્ત માહિતીના આધારે તેની ધરપકડ કરી હતી. તપાસ એજન્સીના દાવા મુજબ, તે આ કામની સાથે કટ્ટરપંથી વિચારધારાનો પ્રચાર કરતો હતો અને પાકિસ્તાની ગુપ્તચર એજન્સીઓના સંપર્કમાં હોવાની પણ શંકા છે. તપાસ દરમિયાન અખ્તરનું નામ ‘ઇન્ડિયન મુસ્લિમ’ નામના ટેલિગ્રામ ગ્રુપ સાથે જોડાયું હોવાનું કહેવાય છે. આ ગ્રુપમાં જૈશ-એ-મોહમ્મદના વડા મૌલાના મસૂદ અઝહરની ઓડિયો ક્લિપ્સ શેર કરવામાં આવી હોવાનો આરોપ છે. આ ક્લિપ્સમાં બાબરી મસ્જિદનો ઉલ્લેખ હોવાનું પણ અહેવાલોમાં જણાવાયું છે.
પાકિસ્તાની ટેલિગ્રામ ચેનલ સાથે જોડાણનો દાવો
તપાસ એજન્સીના જણાવ્યા અનુસાર, અખ્તર ‘આઈબીએન એ કાસિમ’ નામની કટ્ટરપંથી પાકિસ્તાની ટેલિગ્રામ ચેનલ સાથે પણ સંકળાયેલો હતો. એટીએસ હવે તેની ઑનલાઇન પ્રવૃત્તિઓ, સંપર્કો અને સંભવિત નેટવર્કની તપાસ કરી રહી છે. જોકે, પાકિસ્તાની ગુપ્તચર એજન્સીઓ અથવા આતંકવાદી સંગઠન સાથેના તેના કથિત સંબંધો અંગેના આરોપોની પુષ્ટિ તપાસ પૂર્ણ થયા બાદ જ થઈ શકશે.
PM મોદી વિરુદ્ધ વાંધાજનક ટિપ્પણી કરવાનો આરોપ
અખ્તરે X અને ઇન્સ્ટાગ્રામ જેવા સોશિયલ મીડિયા પ્લેટફોર્મ પર ભડકાઉ ટિપ્પણીઓ પોસ્ટ કરી હોવાનો આરોપ છે. તપાસ એજન્સીના દાવા મુજબ, તેણે લોકોને જેહાદ માટે ઉશ્કેરવાનો પ્રયાસ કર્યો હતો અને “જેહાદનો યુગ આવી ગયો છે” જેવી ટિપ્પણીઓ દ્વારા હિંસાને પ્રોત્સાહન આપ્યું હતું. આરોપી પર વડા પ્રધાન નરેન્દ્ર મોદીની તાજેતરની મુંબઈ મુલાકાત પહેલાં સુરક્ષામાં ખામી અંગે વિવાદાસ્પદ ટિપ્પણી કરવાનો પણ આરોપ છે. આ ઉપરાંત, તેણે ભૂતપૂર્વ વડાં પ્રધાન ઇન્દિરા ગાંધી વિશે પણ વાંધાજનક ટિપ્પણી કરી હોવાનો અહેવાલ છે.
મોબાઇલ ફોન જપ્ત, 29 સ્ક્રીનશોટ તપાસ હેઠળ
મહારાષ્ટ્ર એટીએસે અખ્તર પાસેથી રેડમી નોટ 14 પ્રો મોબાઇલ ફોન જપ્ત કર્યો છે. તેની સોશિયલ મીડિયા પ્રવૃત્તિઓ સંબંધિત 29 સ્ક્રીનશોટ પણ તપાસ માટે સાચવી રાખવામાં આવ્યા છે. એજન્સી આ ડિજિટલ પુરાવાઓના આધારે તેની પોસ્ટ્સ, સંદેશાઓ અને અન્ય સંપર્કોની તપાસ કરી રહી છે. અખ્તર વિરુદ્ધ ભારતીય દંડ સંહિતાની કલમ 196(1) હેઠળ વિવિધ ધાર્મિક જૂથો વચ્ચે કથિત રીતે દુશ્મનાવટને પ્રોત્સાહન આપવા બદલ કેસ નોંધવામાં આવ્યો હોવાનું અહેવાલમાં જણાવાયું છે.
પાડોશીને પણ ન લાગ્યો શંકાસ્પદ વ્યવહાર
IANSના અહેવાલ મુજબ, અખ્તરના એક પાડોશીએ જણાવ્યું હતું કે તે છેલ્લા ત્રણથી સાડા ત્રણ વર્ષથી ભાડાના ફ્લેટમાં રહેતો હતો. પાડોશીએ કહ્યું કે અખ્તર પરફ્યુમ વેચતો હતો અને રાત્રે અન્ય જગ્યાએ કામ કરતો હતો. તેની સાથે સામાન્ય વાતચીત પણ થતી હતી, પરંતુ તેના પર આવા ગંભીર આરોપો લાગશે એવું ક્યારેય લાગ્યું નહોતું. જોકે, પાડોશીએ એમ પણ કહ્યું હતું કે જો કોઈ વ્યક્તિ દેશ સાથે દગો કરે છે, તો તેને કાયદા મુજબ સજા મળવી જોઈએ. હાલમાં મહારાષ્ટ્ર એટીએસ આરોપીના કથિત આતંકવાદી સંપર્કો, સોશિયલ મીડિયા પ્રવૃત્તિઓ અને ડિજિટલ પુરાવાઓની તપાસ કરી રહી છે. આરોપો અંગે અંતિમ નિર્ણય તપાસ અને કાયદાકીય પ્રક્રિયા બાદ જ આવશે.
