MPSC FDA Paper Leak Case: મહારાષ્ટ્ર પબ્લિક સર્વિસ કમિશન (MPSC)ની ફૂડ એન્ડ ડ્રગ એડમિનિસ્ટ્રેશન (FDA) ડ્રગ ઇન્સ્પેક્ટર પરીક્ષાનું પેપર લીક કૌભાંડ હવે પ્રેમ, દગો અને બદલાની ચોંકાવનારી કહાની બની ગયું છે. આરોપ છે કે પોતાની ગર્લફ્રેન્ડને પરીક્ષામાં સારો રેન્ક અપાવવા માટે પ્રેમીએ પરીક્ષાના બે દિવસ પહેલાં જ તેને લીક થયેલું પ્રશ્નપત્ર આપ્યું હતું. ગર્લફ્રેન્ડે આ પેપરના આધારે પરીક્ષા આપી અને મહારાષ્ટ્રમાં સાતમો રેન્ક મેળવ્યો હોવાનો ખુલાસો થયો છે.
ગર્લફ્રેન્ડને પેપર આપ્યું, પોતાનો ભાઈ પણ હતો પરીક્ષાર્થી
માલેગાંવની એક ફાર્માસ્યુટિકલ કંપનીમાં કામ કરતા ગૌરવે પોતાની ગર્લફ્રેન્ડ ઋતુજાને પરીક્ષાના બે દિવસ પહેલાં લીક થયેલું પ્રશ્નપત્ર આપ્યું હતું. ખાસ વાત એ છે કે ગૌરવનો પોતાનો ભાઈ પણ આ જ પરીક્ષા આપી રહ્યો હતો. તેમ છતાં તેણે પોતાના ભાઈને નહીં, પરંતુ ગર્લફ્રેન્ડને લીક પેપર આપીને મદદ કરી હોવાનો આરોપ છે. ઋતુજાએ પરીક્ષામાં શાનદાર પ્રદર્શન કરીને રાજ્યમાં સાતમો ક્રમ મેળવ્યો હતો. પરંતુ પરિણામ બાદ આ પ્રેમકથાએ અચાનક અલગ જ વળાંક લીધો.
અધિકારી બન્યા બાદ લગ્નનો ઇનકાર, પ્રેમીનો ગુસ્સો ભડક્યો
સૂત્રોના જણાવ્યા અનુસાર, ઋતુજાની પસંદગી થયા બાદ બંને વચ્ચે સંબંધોમાં ખટાશ આવી હતી. આરોપ છે કે અધિકારી બન્યા બાદ ઋતુજાએ ગૌરવ સાથે લગ્ન કરવાનો ઇનકાર કરી દીધો હતો. બ્રેકઅપથી નારાજ ગૌરવે કથિત રીતે MPSCને એક ગુપ્ત ઈ-મેઇલ મોકલી સમગ્ર પેપર લીક કૌભાંડની માહિતી આપી દીધી. જોકે, થોડા સમય બાદ તેણે ફરી ઈ-મેઇલ કરીને દાવો કર્યો હતો કે તે માત્ર મિત્રો સાથે મજાક કરી રહ્યો હતો. પરંતુ ત્યાં સુધીમાં તપાસ એજન્સીઓ હરકતમાં આવી ચૂકી હતી.
એક ઈ-મેઇલથી ખુલ્યું પેપર લીકનું મોટું નેટવર્ક
ગૌરવના ઈ-મેઇલ બાદ મુંબઈ ક્રાઈમ બ્રાન્ચે તપાસ શરૂ કરી હતી. તપાસ આગળ વધતાં MPSC અધિકારીઓથી લઈને કોચિંગ એકેડેમી સાથે જોડાયેલા લોકો સુધીનું કથિત નેટવર્ક સામે આવ્યું હતું. તપાસમાં આરોપ છે કે MPSCના કો-ઓર્ડિનેશન ઓફિસર વિશ્વેશ્વર નકાટેએ કમિશનના કાર્યાલયના પાર્કિંગમાં લેન્ડવે નામના વ્યક્તિને પ્રશ્નપત્રની ફોટોકોપી આપી હતી. ત્યારબાદ આ પ્રશ્નપત્ર નંદુરબારની મરાઠા અને કૌટિલ્ય એકેડેમીના સંચાલક અમૃત પાટીલ મારફતે ગૌરવ સુધી પહોંચ્યું હોવાનું પોલીસ તપાસમાં સામે આવ્યું છે. આ સમગ્ર કૌભાંડમાં આશરે ₹4 લાખના વ્યવહારની માહિતી પણ સામે આવી હોવાનું જાણવા મળ્યું છે.
ઉત્તમ શિક્ષક એવોર્ડ મેળવનાર વ્યક્તિ પણ આરોપીઓમાં સામેલ
આ કેસમાં કોચિંગ એકેડેમી સાથે સંકળાયેલા શિક્ષક અમૃત પાટીલનું નામ પણ સામે આવ્યું છે. ખાસ વાત એ છે કે અમૃત પાટીલ અગાઉ ઉત્તમ શિક્ષક એવોર્ડ મેળવી ચૂક્યા હોવાનું જણાવવામાં આવી રહ્યું છે. હવે પેપર લીકના આરોપમાં તેમનું નામ સામે આવતા સમગ્ર મામલો વધુ ચોંકાવનારો બન્યો છે.
છ આરોપીઓની ધરપકડ, વધુ ઉમેદવારોને પેપર મળ્યું હતું કે નહીં તેની તપાસ
મુંબઈ પોલીસ અને ક્રાઈમ બ્રાન્ચે અત્યાર સુધીમાં છ આરોપીઓની ધરપકડ કરી છે. તેમાં MPSCના ત્રણ અધિકારીઓ, કોચિંગ એકેડેમી સાથે સંકળાયેલ વ્યક્તિ, શાળાના આચાર્ય અને ગૌરવનો સમાવેશ થાય છે. હવે પોલીસ એ તપાસી રહી છે કે લીક થયેલું પ્રશ્નપત્ર માત્ર ઋતુજા સુધી જ પહોંચ્યું હતું કે પછી અન્ય ઉમેદવારોને પણ વેચવામાં આવ્યું હતું. સમગ્ર કૌભાંડમાં વધુ લોકોની સંડોવણી છે કે નહીં અને પેપર લીકનું નેટવર્ક કેટલું મોટું હતું, તે અંગે તપાસ ચાલુ છે.
