MP Mukhyamantri Kanyadan Yojana Scam:મધ્ય પ્રદેશ સરકાર દ્વારા ગરીબ અને બાંધકામ ક્ષેત્રના શ્રમિકોની દીકરીઓના લગ્ન માટે ચલાવવામાં આવતી 'મુખ્યમંત્રી કન્યાદાન યોજના'માં કરોડો રૂપિયાનું કૌભાંડ સામે આવ્યું છે. ગરીબ પરિવારની દીકરીઓને આર્થિક સહાય આપવાના હેતુથી શરૂ કરાયેલી આ યોજનામાં અધિકારીઓ અને તેમના સાથીદારોએ મળીને મોટું ફ્રોડ આચર્યું હતું. તપાસમાં બહાર આવ્યું છે કે મધ્ય પ્રદેશના વિદેશા જિલ્લા હેઠળ આવતા સિરોંજ જનપદ પંચાયતમાં જ આશરે ₹30.18 કરોડનો મોટો ભ્રષ્ટાચાર કરવામાં આવ્યો હતો.
EDની કડક કાર્યવાહી: તત્કાલીન CEO અને મળતિયાની સંપત્તિ જપ્ત
આ નાણાકીય ગેરરીતિ સામે એન્ફોર્સમેન્ટ ડિરેક્ટોરેટ (ED) દ્વારા મની લોન્ડરિંગ એક્ટ હેઠળ મોટું પગલું ભરવામાં આવ્યું છે. કૌભાંડના મુખ્ય સૂત્રધાર અને સિરોંજ જનપદ પંચાયતના તત્કાલીન CEO શોભિત ત્રિપાઠી તેમજ તેમના સહયોગી હેમંત સાહૂની ₹5.37 કરોડની અચલ સંપત્તિઓને ED દ્વારા અસ્થાયી રૂપે જપ્ત (Attach) કરવામાં આવી છે. આ કાર્યવાહી બાદ સરકારી તંત્ર અને ભ્રષ્ટ અધિકારીઓમાં ભારે ખળભળાટ મચી ગયો છે.
લોકડાઉનમાં જ્યારે લગ્નો બંધ હતા, ત્યારે પણ કાગળ પર 5,923 બોગસ લગ્ન બતાવ્યા
તપાસ એજન્સીના રિપોર્ટ મુજબ, આરોપી શોભિત ત્રિપાઠીએ વર્ષ 2019થી નવેમ્બર 2021 દરમિયાન પોતાના હોદ્દાનો દુરુપયોગ કરીને 5,923 બોગસ (ફરજી) લગ્ન ચોપડે દર્શાવ્યા હતા. આ યોજના હેઠળ પ્રત્યેક લાભાર્થી દીકરીના લગ્ન માટે ₹51,000ની આર્થિક સહાય આપવામાં આવતી હતી. આશ્ચર્યની વાત એ છે કે જ્યારે કોરોના મહામારી દરમિયાન સમગ્ર દેશમાં કડક લોકડાઉન લાગુ હતું અને જાહેર પ્રસંગો પર સંપૂર્ણ પ્રતિબંધ હતો, ત્યારે પણ આ કૌભાંડીઓએ કાગળ પર હજારો બોગસ લગ્નો દર્શાવીને સરકારી તિજોરીમાંથી કરોડો રૂપિયા ઉપાડી લીધા હતા.
ફેક ડોક્યુમેન્ટ્સ અને બોગસ બેંક એકાઉન્ટ્સ દ્વારા નાણાંની હેરફેર
આ રુપિયા હડપવા માટે કૌભાંડીઓએ ખૂબ જ સુનિયોજિત નેટવર્ક રચ્યું હતું. અપાત્ર અને અસ્તિત્વમાં ન હોય તેવા લોકોના નામે બોગસ અરજીઓ તેમજ બનાવટી દસ્તાવેજો તૈયાર કરવામાં આવ્યા હતા. ત્યારબાદ આ બનાવટી કાગળોના આધારે અલગ-અલગ બેંકોમાં ખાતા ખોલાવવામાં આવ્યા હતા. સરકાર તરફથી યોજનાના નાણાં ખાતામાં જમા થતાં જ રોકડ સ્વરૂપે વિથડ્રો કરી લેવામાં આવતા હતા. કેટલીક જગ્યાએ તો એવા પણ કિસ્સા પ્રકાશમાં આવ્યા હતા જ્યાં કુવારા યુવકોના નામે પણ કન્યાદાનની રકમ મંજૂર કરાવી લેવામાં આવી હતી.
EOW ની FIR બાદ ED ની એન્ટ્રી અને જેલ હવાલે આરોપી
આ સમગ્ર કૌભાંડનો પર્દાફાશ થયા બાદ ભોપાલના આર્થિક અપરાધ વિંગ (EOW) ખાતે ગુનો નોંધવામાં આવ્યો હતો. EOW દ્વારા દાખલ કરવામાં આવેલી FIRના આધારે EDએ મની લોન્ડરિંગના એંગલથી ઊંડાણપૂર્વક તપાસ શરૂ કરી હતી. તપાસ દરમિયાન પૂરતા પુરાવા મળતાં EDએ સપ્ટેમ્બર 2026માં મુખ્ય આરોપી શોભિત ત્રિપાઠીની ધરપકડ કરી હતી. હાલ આરોપી જેલમાં જ્યુડિશિયલ કસ્ટડી હેઠળ છે અને તપાસ એજન્સીઓ આ નેટવર્કમાં સામેલ અન્ય લોકો સુધી પહોંચવા માટે વધુ તપાસ ચલાવી રહી છે.
