Mohan Bhagwat ISKCON New York: રાષ્ટ્રીય સ્વયંસેવક સંઘ (RSS)ના સરસંઘચાલક મોહન ભાગવતે શુક્રવારે ન્યૂયોર્કમાં આવેલા વિશ્વના પ્રથમ ઈસ્કોન સેન્ટરની મુલાકાત લીધી હતી. આ દરમિયાન તેમણે મંદિરમાં પૂજા કરી અને ભક્તોને સંબોધિત કર્યા હતા. પોતાના સંબોધનમાં તેમણે વિશ્વમાં ચાલી રહેલા સંઘર્ષો વચ્ચે ‘કૃષ્ણ ચેતના’ શાંતિનો માર્ગ બની શકે તેવી વાત કરી હતી.
‘આખું વિશ્વ કૃષ્ણમય છે’
મોહન ભાગવતે કહ્યું કે દુનિયામાં અનેક પ્રકારની વિવિધતા, મતભેદો અને સંઘર્ષો જોવા મળે છે. જોકે, જો લોકોને એ સમજાવવામાં આવે કે સમગ્ર વિશ્વમાં એક જ દિવ્ય તત્વ રહેલું છે અને બધું જ કૃષ્ણનું સ્વરૂપ છે, તો વધુ શાંતિપૂર્ણ વાતાવરણનું નિર્માણ થઈ શકે છે. તેમણે કહ્યું કે દુનિયાને માત્ર ભૌતિક સીમાઓ અને બજારના દૃષ્ટિકોણથી જોવાને બદલે તેને એક વિશાળ આધ્યાત્મિક પરિવાર તરીકે સમજવાની જરૂર છે.
જ્યાં સ્વામી પ્રભુપાદે ઈસ્કોનની સ્થાપના કરી હતી
ભાગવત ન્યૂયોર્કના 26 સેકન્ડ એવન્યુ સ્થિત સ્થળે પણ પહોંચ્યા હતા. આ જ સ્થળે સ્વામી એ.સી. ભક્તિવેદાંત સ્વામી પ્રભુપાદે જુલાઈ 1966માં ઈસ્કોનની સ્થાપના કરી હતી. ઈસ્કોન આ વર્ષે પોતાની સ્થાપનાની 60મી વર્ષગાંઠ ઉજવી રહ્યું છે. આજે ઈસ્કોનના વિશ્વના અનેક દેશોમાં મંદિરો અને કેન્દ્રો કાર્યરત છે.
‘જીવનથી ભાગશો નહીં, કર્તવ્ય પૂર્ણ કરો’
ભગવદ્ ગીતાના ઉપદેશનો ઉલ્લેખ કરતાં મોહન ભાગવતે કહ્યું કે જીવનની મુશ્કેલીઓથી ભાગી જવું એ તેનો ઉકેલ નથી. વ્યક્તિએ પોતાના કર્તવ્ય પર મજબૂત રહીને તેને પૂર્ણ કરવું જોઈએ. તેમણે કહ્યું કે જો આ સંદેશ દરેક વ્યક્તિ સુધી પહોંચે અને લોકો દરેક વસ્તુમાં દિવ્યતાને ઓળખવા લાગે, તો દુનિયાને વધુ સારી અને શાંતિપૂર્ણ જગ્યા બનાવી શકાય છે.
‘આપણે સૌ ઈશ્વરની સેવામાં છીએ’
RSS પ્રમુખે કહ્યું કે આપણે સૌ સામૂહિક રીતે ઈશ્વરની સેવામાં જોડાયેલા છીએ. તેમણે ઈસ્કોનના ભક્તોને આ પવિત્ર સ્થળ સાથે સતત જોડાયેલા રહેવા અને કૃષ્ણ ચેતનાને જીવનમાં ઉતારવાનો સંદેશ આપ્યો હતો.
RSSના 100 વર્ષનો પણ કર્યો ઉલ્લેખ
મોહન ભાગવતે RSSની સ્થાપનાના 100 વર્ષ પૂર્ણ થવાના અવસરનો પણ ઉલ્લેખ કર્યો હતો. તેમણે કહ્યું કે સંઘ પણ સમાજમાં આધ્યાત્મિક અને રાષ્ટ્રીય ચેતના જાગૃત કરવા માટે સતત કામ કરી રહ્યો છે. ભાગવત 25 ઓગસ્ટે ન્યૂયોર્ક પહોંચ્યા હતા અને અમેરિકા, કેનેડા તથા બ્રિટનના પ્રવાસે છે. આ દરમિયાન તેઓ ભારતીય સમુદાય અને વિવિધ સંગઠનોના કાર્યક્રમોમાં ભાગ લેશે.
29 ઓગસ્ટે મેડિસન સ્ક્વેર ગાર્ડનમાં કાર્યક્રમ
મોહન ભાગવત 29 ઓગસ્ટે ન્યૂયોર્કના મેડિસન સ્ક્વેર ગાર્ડનમાં યોજાનારા ‘યુનિવર્સલ વનનેસ સેલિબ્રેશન’ કાર્યક્રમમાં પણ ભાગ લેશે. આ કાર્યક્રમ RSSના 100 વર્ષ પૂર્ણ થવાના અવસર પર આયોજિત કરવામાં આવી રહ્યો છે.
કાર્યક્રમનો કેટલાક સંગઠનો દ્વારા વિરોધ
બીજી તરફ, મેડિસન સ્ક્વેર ગાર્ડનમાં યોજાનારા આ કાર્યક્રમને લઈને વિરોધ પણ થઈ રહ્યો છે. અમેરિકાના કેટલાક હિન્દુ, ઇન્ટરફેથ અને ધર્મનિરપેક્ષ સંગઠનોએ કાર્યક્રમ સામે ખુલ્લો પત્ર જાહેર કરીને તેને રદ કરવાની માંગ કરી છે. ન્યૂયોર્કના મેયર જોહરાન મમદાની પણ RSSની વિચારધારા અંગે અસંમતિ વ્યક્ત કરી ચૂક્યા છે. જોકે, તેમણે ખાનગી રીતે આયોજિત કાર્યક્રમને શહેર પ્રશાસન રદ કરી શકે કે નહીં તે અંગે સ્પષ્ટતા કરી નહોતી.
USCIRFની ટિપ્પણીથી પણ વિવાદ
મોહન ભાગવતના અમેરિકા પ્રવાસ પહેલાં અમેરિકી આંતરરાષ્ટ્રીય ધાર્મિક સ્વતંત્રતા આયોગ (USCIRF)એ RSS અંગે ટિપ્પણી કરી હતી અને અમેરિકી સરકારને RSS નેતાઓને લઈને કેટલીક કાર્યવાહી કરવાની ભલામણ કરી હતી. ભારતે USCIRFની ટિપ્પણીઓને ફગાવી દીધી હતી. વિદેશ મંત્રાલયના પ્રવક્તા રણધીર જયસ્વાલે આયોગને પક્ષપાતી ગણાવીને તેની વિશ્વસનીયતા સામે સવાલ ઉઠાવ્યા હતા. મોહન ભાગવતનો ન્યૂયોર્ક પ્રવાસ હવે આધ્યાત્મિક કાર્યક્રમો ઉપરાંત RSSના શતાબ્દી વર્ષને લઈને પણ ચર્ચામાં છે.
