Meerut Nila Drum Hatyakand Muskan Sahil Verdict: ઉત્તર પ્રદેશના મેરઠના સનસનાટીભર્યા 'બ્લૂ ડ્રમ હત્યાકાંડ'માં કોર્ટ દ્વારા સજાનું એલાન કરવામાં આવનાર હોવાથી દોષિત ઠરેલા મુસ્કાન રસ્તોગી અને તેના પ્રેમી સાહિલ શુક્લાની સ્થિતિ અત્યંત ગંભીર જોવા મળી રહી છે. વરિષ્ઠ જેલ સુપરિન્ટેન્ડેન્ટ વીરેશ રાજ શર્માના જણાવ્યા અનુસાર, સજાની ગંભીરતા અને ફાંસીની માગણીના કારણે બંને દોષિતો ભારે માનસિક તણાવમાં છે. તેમણે મંગળવારની રાત્રે જેલમાં ડિનર લીધું ન હતું અને બુધવારે સવારે જેલર દ્વારા આગ્રહ કરવા છતાં નાસ્તો કરવાનો સંપૂર્ણપણે ઇનકાર કરી દીધો હતો.
જેલમાં ચુસ્ત મોનિટરિંગ અને ધાર્મિક પ્રવૃત્તિઓમાં વ્યસ્ત મુસ્કાન
જેલ તંત્રે માહિતી આપી છે કે, મુસ્કાન અને સાહિલ રાતભર ઊંઘી શક્યા નથી અને સતત ચિંતિત સ્થિતિમાં આંટા મારી રહ્યા હતા. જરૂર પડે તો તેમની માનસિક સ્થિતિ જાળવી રાખવા માટે કાઉન્સેલરની મદદ લેવામાં આવશે. મુસ્કાન હાલમાં એકાંતમાં રહેવાનું પસંદ કરી રહી છે અને પોતાનો મોટાભાગનો સમય ધાર્મિક પ્રવૃત્તિઓ અને આરાધનામાં વિતાવી રહી છે. અન્ય કેદીઓ સાથે બંનેએ વાતચીત કરવાનું બંધ કરી દીધું છે, જેના કારણે CCTV કેમેરા અને સુરક્ષા કર્મચારીઓ દ્વારા તેમના પર સતત 24 કલાક કડક નજર રાખવામાં આવી રહી છે.
સજા બાદ જેલના કડક નિયમો અને જેલ વસ્ત્રો લાગુ થશે
કોર્ટનો આખરી સજાનો આદેશ આવ્યા બાદ બંને પર જેલ મેન્યુઅલના તમામ સખત નિયમો લાગુ કરી દેવામાં આવશે. તેમણે જેલના નિયમ મુજબના ગણવેશ (જેલના કપડાં) પહેરવા પડશે અને કાયદા મુજબ મજૂરી તથા કામકાજ કરવું પડશે. ભવિષ્યની પ્રક્રિયા મુજબ પુરુષ દોષિત સાહિલને સેન્ટ્રલ જેલ આગ્રા અને મહિલા દોષિત મુસ્કાનને નારી નિકેતન મોકલવાની કાનૂની કાર્યવાહી શરૂ કરવામાં આવશે. મુસ્કાને પોતાની પુત્રી અને પરિવારને પત્ર લખવાની ઈચ્છા વ્યક્ત કરતાં તેને કાગળ અને પેન ઉપલબ્ધ કરાવવામાં આવ્યા છે.
વીડિયો કોન્ફરન્સિંગ દ્વારા કોર્ટમાં રજૂઆત અને જજના સવાલો
બુધવારે બંને દોષિતોને જેલમાંથી વીડિયો કોન્ફરન્સિંગના માધ્યમથી જિલ્લા અદાલતમાં જજ અરવિંદ કુમાર મિશ્રા સમક્ષ રજૂ કરવામાં આવ્યા હતા. સુનાવણી દરમિયાન જજે સાહિલને પૂછ્યું હતું કે, "શું તેં અગાઉ ક્યારેય કોઈ ગુનો કર્યો છે?" જેની સામે સાહિલે ના પાડી હતી. ત્યારબાદ જ્યારે જજે સજાના મુદ્દે તેની અંતિમ ઈચ્છા કે રજૂઆત અંગે પૂછપરછ કરી, ત્યારે સાહિલે કાંઈ પણ કહેવાનો ઇનકાર કર્યો હતો. આના પર જજે જણાવ્યું હતું કે સજા સંભળાવતી વખતે તેમને ફરીથી વીડિયો કોન્ફરન્સિંગમાં જોડવામાં આવશે.
શું હતો મેરઠનો સમગ્ર બ્લૂ ડ્રમ હત્યાકાંડ?
ઉલ્લેખનીય છે કે, માર્ચ 2025માં પૂર્વ મર્ચેન્ટ નેવી ઓફિસર સૌરભ રાજપૂતના લોહીયાળ હત્યાકાંડે આખા દેશને સ્તબ્ધ કરી દીધો હતો. લંડનથી પરત ફેરેલા સૌરભને તેની પત્ની મુસ્કાન અને તેના પ્રેમી સાહિલે નશીલો પદાર્થ આપીને ચપ્પુના ઘા ઝીંકી નિર્મમ હત્યા કરી હતી. ત્યારબાદ પુરાવાનો નાશ કરવા માટે મૃતદેહના ટુકડા કરીને નીલા રંગના પ્લાસ્ટિકના ડ્રમમાં મૂકી ઉપરથી સિમેન્ટ ભરીને સીલ કરી દીધો હતો. કોર્ટે 30 સપ્ટેમ્બરે 22થી વધુ સાક્ષીઓની ગવાહીના આધારે બંનેને દોષિત ઠેરવ્યા હતા. સૌરભના પીડિત પરિવારે બંને દોષિતો માટે ફાંસીની સજાની માંગ કરી છે.
