Anwar Ibrahim Bollywood Diplomacy: 18મી BRICS સમિટના સફળ આયોજન બાદ મલેશિયાના વડાપ્રધાન અનવર ઇબ્રાહિમની સોશિયલ મીડિયા પોસ્ટ્સ અને તેમની બોલિવૂડ પ્લેલિસ્ટ વૈશ્વિક સ્તરે ભારે ચર્ચાનો વિષય બની છે. ભારત પ્રવાસ દરમિયાન વિવિધ વૈશ્વિક નેતાઓ અને રાજકીય હસ્તીઓ સાથેની પોતાની તસવીરો અને વીડિયો શેર કરતી વખતે તેમણે હિન્દી સિનેમાના પ્રખ્યાત ગીતોનો બેકગ્રાઉન્ડ મ્યુઝિક તરીકે ઉપયોગ કર્યો છે. દરેક પ્રસંગ અને નેતાની કેમિસ્ટ્રી મુજબ પસંદ કરાયેલા આ ગીતોએ સોશિયલ મીડિયા પર લાખો લોકોનું ધ્યાન ખેંચ્યું છે.
વૈશ્વિક નેતાઓ સાથે આઇકોનિક બોલિવૂડ સોંગ્સનો ઉપયોગ
અનવર ઇબ્રાહિમે ભારતના વડાપ્રધાન નરેન્દ્ર મોદી સાથેની રીલ પર ફિલ્મ 'દિલવાલે દુલ્હનિયા લે જાયેંગે'નું લોકપ્રિય ગીત 'તુઝે દેખા તો યે જાના સનમ' અને 'દિલ તો પાગલ હૈ'નું ટાઇટલ સોંગ બેકગ્રાઉન્ડમાં મૂક્યું હતું. રશિયન રાષ્ટ્રપતિ વ્લાદિમીર પુતિન સાથેના ફોટો પર તેમણે ફિલ્મ 'લગાન'નું એકતા દર્શાવતું 'ચલે ચલો' ગીત પસંદ કર્યું હતું. કોંગ્રેસ નેતા રાહુલ ગાંધી અને પ્રિયંકા ગાંધી સાથેની મુલાકાતની તસવીર પર તેમણે 'વીર-ઝારા'નું 'એસા દેશ હૈ મેરા' સેટ કર્યું હતું, જ્યારે ઈરાની રાષ્ટ્રપતિ મસૂદ પજશકિયાન સાથેની મુલાકાત પર 1957ની 'નયા દૌર' ફિલ્મનું 'સાથી હાથ બઢાના' ગીત લગાવીને કૂટનીતિક એકતાનો સંદેશ આપ્યો હતો.
BRICS ડિનરમાં કિશોર કુમાર અને મુકેશના ગીતો ગાઈને જીત્યા દિલ
મલેશિયાના પીએમ અનવર ઇબ્રાહિમ ભારતીય સંગીતના જૂના શોખીન છે અને ખાસ કરીને કિશોર કુમારના મોટા ફેન માનવામાં આવે છે. BRICS સમિટના ખાસ ડિનર દરમિયાન તેમણે કિશોર કુમારનું સદાબહાર ગીત 'ખ્વાબ હો તુમ યા કોઈ હકીકત...' અને ગાયક મુકેશનું 'દોસ્ત દોસ્ત ના રહા...' ગાયું હતું. તેમણે આ સંગીતમય પળોનો વીડિયો પોતાના X (ટ્વિટર) એકાઉન્ટ પર શેર કરતાં કેપ્શન આપ્યું હતું કે, "ગુરુ, થોડું ગાવાની પરવાનગી છે?". આ અગાઉ વર્ષ 2026ની શરૂઆતમાં PM મોદીની મલેશિયા યાત્રા સમયે પણ તેમણે 'કભી ખુશી કભી ગમ'નું ગીત ઉપયોગમાં લીધું હતું.
મલેશિયામાં ભારતીય સંસ્કૃતિ અને સિનેમાનો મોટો પ્રભાવ
મલેશિયામાં ભારતીય મૂળના આશરે 27.5 લાખ લોકો વસવાટ કરે છે, જે દેશની કુલ વસ્તીના લગભગ 9% જેટલો હિસ્સો ધરાવે છે. આ જ કારણસર મલેશિયામાં બોલિવૂડ અને દક્ષિણ ભારતીય તમિલ ફિલ્મોનું બજાર અત્યંત વિશાળ છે. શાહરૂખ ખાનની 'દિલવાલે', 'જવાન' અને 'પઠાણ' જેવી ફિલ્મોએ મલેશિયામાં કરોડો રૂપિયાનો બિઝનેસ કર્યો છે. ઉપરાંત રજનીકાંતની 'કુલી', વિજયની 'G.O.A.T.' અને સૂર્યાની 'કરુપ્પુ' જેવી તમિલ બ્લોકબસ્ટર ફિલ્મોએ પણ મલેશિયાના બોક્સ ઓફિસ પર 20થી 30 કરોડથી વધુનું કલેક્શન મેળવીને મોટી સફળતા હાંસલ કરી છે.
પીએમ અનવર ઇબ્રાહિમની રાજકીય સફર
મલેશિયાના 10મા વડાપ્રધાન તરીકે 24 નવેમ્બર, 2022ના રોજ પદભાર સંભાળનાર અનવર ઇબ્રાહિમનો રાજકીય ઇતિહાસ ખૂબ જ સંઘર્ષપૂર્ણ રહ્યો છે. 1993માં તેઓ મલેશિયાના 7મા ડેપ્યુટી પીએમ બન્યા હતા પરંતુ, 1998માં તત્કાલીન પીએમ મહાથિર મોહમ્મદ સાથેના મતભેદો બાદ તેમને તમામ પદો પરથી હટાવી દેવાયા હતા. ત્યારબાદ લાંબી જેલવાસની સજા અને રાજકીય પડકારો વેઠ્યા બાદ 2008થી 2015 સુધી તેઓ વિપક્ષના નેતા રહ્યા અને અંતે 2022ની સામાન્ય ચૂંટણીઓમાં વિજયી બનીને દેશના વડાપ્રધાન બન્યા.
