Major action against 150 Bangladeshis in J&K: જમ્મુ-કાશ્મીરમાં ગેરકાયદે રીતે રહેતા વિદેશી નાગરિકો સામે તંત્રની કાર્યવાહી વધુ તેજ બની છે. 5 ઓક્ટોબરે અધિકારીઓએ માન્ય દસ્તાવેજો વગર રહેતા 150 બાંગ્લાદેશી નાગરિકોને ડિપોર્ટ કરવાની પ્રક્રિયાનો એક તબક્કો પૂર્ણ કર્યો હતો. આ તમામ લોકોને શ્રીનગરથી ભારતીય વાયુસેનાના વિશેષ વિમાન મારફતે પશ્ચિમ બંગાળના બાગડોગરા મોકલવામાં આવ્યા હતા.
એરફોર્સના વિમાનથી શ્રીનગરથી બાગડોગરા મોકલાયા
શ્રીનગર પોલીસના જણાવ્યા અનુસાર, ઓળખ કરાયેલા 150 બાંગ્લાદેશી નાગરિકોને શ્રીનગર આંતરરાષ્ટ્રીય એરપોર્ટ પરથી ભારતીય વાયુસેનાના વિશેષ વિમાનમાં બાગડોગરા લઈ જવામાં આવ્યા હતા. બાગડોગરા પહોંચ્યા બાદ તેમને સીમા સુરક્ષા દળ એટલે કે BSFના જવાનોને સોંપવામાં આવ્યા હતા. આગળની કાયદેસરની પ્રક્રિયા પૂર્ણ કરીને તેમને ભારત-બાંગ્લાદેશ સરહદ મારફતે બાંગ્લાદેશ પરત મોકલવાની કાર્યવાહી કરવામાં આવનાર હોવાનું અધિકારીઓએ જણાવ્યું છે.
7 ઓક્ટોબરે વધુ એક જૂથ સામે કાર્યવાહી
અધિકારીઓના જણાવ્યા મુજબ, જમ્મુ-કાશ્મીરમાં ગેરકાયદે રીતે રહેતા વિદેશી નાગરિકોની ઓળખ અને દેશનિકાલની કાર્યવાહી એક તબક્કા પૂરતી મર્યાદિત નહીં રહે. આ અભિયાન આગળ પણ ચાલુ રાખવામાં આવશે. આ ઝુંબેશના બીજા તબક્કા હેઠળ 7 ઓક્ટોબરે બાંગ્લાદેશી નાગરિકોના વધુ એક જૂથને આ જ પ્રકારની પ્રક્રિયા દ્વારા જમ્મુ-કાશ્મીરથી બહાર મોકલવાની તૈયારી છે.
J&Kના 20 જિલ્લાઓમાં 504 બાંગ્લાદેશીઓની ઓળખ
સત્તાવાર આંકડા અનુસાર, જમ્મુ-કાશ્મીરના 20 જિલ્લાઓમાં અત્યાર સુધીમાં કુલ 504 ગેરકાયદે બાંગ્લાદેશી નાગરિકોની ઔપચારિક ઓળખ કરવામાં આવી છે. તેમાંથી મોટાભાગના લોકો કાશ્મીર વિભાગમાં મળી આવ્યા છે. કાશ્મીરના 10 જિલ્લાઓમાંથી 458 બાંગ્લાદેશી નાગરિકોની ઓળખ થઈ છે, જ્યારે જમ્મુ વિભાગના 10 જિલ્લાઓમાંથી 46 લોકો નોંધાયા છે. જોકે, સુરક્ષા એજન્સીઓ અને સ્થાનિક અહેવાલોમાં એવો દાવો કરવામાં આવે છે કે ફેરિયાઓ અથવા મજૂરીકામના બહાને તંત્રની નજરથી દૂર રહેતા લોકોની વાસ્તવિક સંખ્યા સત્તાવાર આંકડા કરતાં ઘણી વધારે હોઈ શકે છે.
રોહિંગ્યા સહિત 8,160 બિનદસ્તાવેજી વિદેશી નાગરિકો
સરકારી આંકડાઓ મુજબ, જમ્મુ-કાશ્મીરમાં 504 બાંગ્લાદેશીઓ ઉપરાંત મ્યાંમારના 7,656 રોહિંગ્યા મુસ્લિમોની પણ નોંધ છે. બંને આંકડા ભેગા કરવામાં આવે તો કેન્દ્રશાસિત પ્રદેશમાં સત્તાવાર રીતે નોંધાયેલા બિનદસ્તાવેજી વિદેશી નાગરિકોની સંખ્યા 8,160 થાય છે. આ પૈકી 6,737 રોહિંગ્યા જમ્મુ વિભાગમાં નોંધાયેલા હોવાનું જણાવાયું છે. બીજી તરફ, સ્થાનિક ગુપ્તચર વિભાગના બિનસત્તાવાર અંદાજ મુજબ સમગ્ર વિસ્તારમાં શરણાર્થીઓ અને ગેરકાયદે પ્રવાસીઓની કુલ સંખ્યા આશરે 13,700 સુધી હોઈ શકે છે.
સુરક્ષા અને ગેરકાયદે વસવાટ મુદ્દે કાર્યવાહી તેજ
જમ્મુ-કાશ્મીરમાં ગેરકાયદે રીતે રહેતા વિદેશી નાગરિકોની ઓળખ અને ચકાસણીની કાર્યવાહી હવે વધુ મહત્વપૂર્ણ બની છે. તંત્ર દ્વારા દસ્તાવેજોની તપાસ, ઓળખ અને ત્યારબાદ કાયદેસરની દેશનિકાલ પ્રક્રિયા હાથ ધરવામાં આવી રહી છે. 5 ઓક્ટોબરે 150 બાંગ્લાદેશીઓને બાગડોગરા ખસેડાયા બાદ હવે 7 ઓક્ટોબરે વધુ એક જૂથ સામે કાર્યવાહી થવાની શક્યતા છે. આગામી દિવસોમાં તપાસ અને ચકાસણી આગળ વધતાં ગેરકાયદે રીતે રહેતા વધુ વિદેશી નાગરિકો અંગેની વિગતો સામે આવી શકે છે.








