Buldhana MLA Sanjay Gaikwad Controversy: મહારાષ્ટ્રમાં શિવસેના (એકનાથ શિંદે જૂથ)ના બુલઢાણાના ધારાસભ્ય સંજય ગાયકવાડ પોતાના વિવાદિત નિવેદનને કારણે ચર્ચામાં આવ્યા છે. ખેડૂતોની આત્મહત્યા અંગે તેમણે કરેલી ટિપ્પણીથી રાજ્યભરમાં આક્રોશ ફેલાયો છે. નિવેદનને પગલે પક્ષના નેતૃત્વમાં પણ નારાજગી હોવાનું સામે આવ્યું છે. બીજી તરફ, વિવાદ વધતાં ગાયકવાડે માફી માગીને સ્પષ્ટતા કરી છે કે તેમની વાત ખેડૂતો માટે નહીં, પરંતુ નશાના વ્યસનથી પરિવારોને નુકસાન પહોંચાડતા લોકો માટે હતી.
પ્રેસ કોન્ફરન્સમાં સંજય ગાયકવાડે શું કહ્યું?
મંગળવારે યોજાયેલી પ્રેસ કોન્ફરન્સ દરમિયાન ધારાસભ્ય સંજય ગાયકવાડે ખેડૂતોની આત્મહત્યા અંગે વિવાદિત નિવેદન આપ્યું હતું. તેમણે કહ્યું હતું કે આત્મહત્યા કરનારા ખેડૂતોની અંતિમયાત્રા કે અંતિમ સંસ્કારમાં કોઈએ જવું જોઈએ નહીં. તેમણે એવી પણ ટિપ્પણી કરી હતી કે જ્યારે લોકોને ખબર પડશે કે તેમના મૃતદેહ અને અવશેષોની શું હાલત થઈ શકે છે, ત્યારે તેઓ આત્મહત્યા કરવાનું બંધ કરશે. આ સાથે તેમણે ખેડૂતોને અપીલ કરી હતી કે મુશ્કેલીના સમયમાં સરકાર, ધારાસભ્ય કે સાંસદ પાસે મદદ માગવી જોઈએ, પરંતુ આત્મહત્યા કરીને બાળકોને નિરાધાર છોડી જવું યોગ્ય નથી. આ નિવેદન સામે આવ્યા બાદ ખેડૂતો અને રાજકીય વર્તુળોમાં ભારે નારાજગી જોવા મળી હતી.
એકનાથ શિંદે નારાજ, પક્ષમાં કાર્યવાહી થવાની શક્યતા
ધારાસભ્યના નિવેદનથી શિવસેના (શિંદે જૂથ)નું નેતૃત્વ નારાજ હોવાનું જણાવાયું છે. પક્ષના નેતૃત્વનું માનવું છે કે ખેડૂતોના હિતમાં કામ કરતી પાર્ટી સાથે જોડાયેલા ધારાસભ્યના આવા નિવેદનથી પક્ષની છબીને નુકસાન થઈ શકે છે. આ વિવાદ બાદ સંજય ગાયકવાડ સામે શિસ્તભંગની કાર્યવાહી કરવાની શક્યતાઓ અંગે ચર્ચા શરૂ થઈ છે. તેમને પક્ષમાંથી સસ્પેન્ડ કરવા અથવા ચોક્કસ સમય માટે જવાબદારીથી દૂર રાખવા અંગે વિચારણા થઈ રહી હોવાનું જણાવાયું છે.
વિવાદ વધતાં સંજય ગાયકવાડે માફી માગી
નિવેદન સામે રાજ્યભરમાં વિરોધ અને આક્રોશ વધતાં સંજય ગાયકવાડે શુક્રવારે માફી માગી હતી. તેમણે સ્પષ્ટતા કરતાં કહ્યું હતું કે તેમનું નિવેદન ખેડૂતો માટે નહોતું, પરંતુ નશાના આદી બનેલા યુવાનો અને પરિવારને બરબાદ કરનારા લોકો માટે હતું. ગાયકવાડે કહ્યું હતું કે તેમના નિવેદનને ખોટી રીતે રજૂ કરવામાં આવ્યું છે. જોકે, મહારાષ્ટ્રના ખેડૂતો અથવા પક્ષના વરિષ્ઠ નેતાઓની લાગણી દુભાઈ હોય તો તેઓ માફી માગે છે. તેમણે વધુમાં જણાવ્યું હતું કે તેઓ પોતે ખેડૂત પરિવારમાંથી આવે છે અને હંમેશાં ખેડૂતોના હિતમાં કામ કરતા રહ્યા છે.
ખેડૂતોની આત્મહત્યા મુદ્દે નિવેદનથી રાજકીય વિવાદ
મહારાષ્ટ્રમાં ખેડૂતોની આત્મહત્યાનો મુદ્દો પહેલેથી જ ગંભીર સામાજિક અને રાજકીય ચર્ચાનો વિષય રહ્યો છે. આવા સંવેદનશીલ મુદ્દે ધારાસભ્યના નિવેદનથી વિવાદ વધુ વકર્યો છે. હવે સંજય ગાયકવાડની માફી બાદ પક્ષનું નેતૃત્વ તેમની સામે કોઈ કાર્યવાહી કરે છે કે નહીં તેના
