Kriti Sanon Raksha Bandhan Ad Controversy: અભિનેત્રી કૃતિ સેનનની રક્ષાબંધન સ્પેશિયલ જાહેરાતને લઈને શરૂ થયેલો વિવાદ હવે બોલિવૂડમાંથી રાજકીય મેદાન સુધી પહોંચી ગયો છે. એક જ્વેલરી બ્રાન્ડની આ જાહેરાતમાં કૃતિ સેનનના પોશાક અને નેકલાઇનને લઈને સોશિયલ મીડિયા પર કેટલાક યુઝર્સે વાંધો ઉઠાવ્યો હતો. બીજી તરફ, ઘણા લોકોએ અભિનેત્રીનો બચાવ પણ કર્યો હતો. હવે કોંગ્રેસ નેતા રાહુલ ગાંધીના નિવેદન બાદ ભાજપ સાંસદ અને અભિનેત્રી કંગના રણૌતે પલટવાર કર્યો છે.
રાહુલ ગાંધી કૃતિના સમર્થનમાં આવ્યા
વિવાદ વચ્ચે રાહુલ ગાંધીએ કૃતિ સેનનના સમર્થનમાં સોશિયલ મીડિયા પર પોતાનો મત વ્યક્ત કર્યો હતો. તેમણે મહિલાના પહેરવેશને તેની વ્યક્તિગત પસંદગી ગણાવતા ટીકાકારોને મહિલાઓને આ પ્રકારની ટ્રોલિંગથી દૂર રાખવાની અપીલ કરી હતી. રાહુલ ગાંધીએ પોતાની ઇન્સ્ટાગ્રામ સ્ટોરીમાં 'Smash the Patriarchy' લખીને પણ પોતાનું વલણ સ્પષ્ટ કર્યું હતું. તેમના આ નિવેદન બાદ મામલો વધુ ચર્ચામાં આવ્યો.
કંગના રણૌતે રાહુલ ગાંધીને આપ્યો જવાબ
રાહુલ ગાંધીના નિવેદન બાદ ભાજપ સાંસદ કંગના રણૌતે ઇન્સ્ટાગ્રામ સ્ટોરી મારફતે વળતો પ્રહાર કર્યો હતો. કંગનાએ એક કાર્ટૂન શેર કરીને પિતૃસત્તા અને ભારતીય સાંસ્કૃતિક સંદર્ભને લઈને પોતાનો મત વ્યક્ત કર્યો હતો. કૃતિની જાહેરાત અંગે કંગનાએ લખ્યું કે આજની મહિલાઓ પાસે પહેરવેશની ઘણી પસંદગીઓ છે. કોકટેલ ડ્રેસથી લઈને લહેંગા-ચોલી, જીન્સ, સાડી, બિકિની અને સલવાર-કમીઝ સુધી મહિલાઓ પોતાની પસંદગી પ્રમાણે કપડાં પહેરી શકે છે. જો, કે કંગનાએ આ જાહેરાતના કન્સેપ્ટ અંગે સવાલ ઉઠાવતા પૂછ્યું કે ભાઈને રાખડી બાંધવાના પ્રસંગે કોઈ યુવતી બિકિની પહેરીને કેમ જશે? કંગનાના આ નિવેદન બાદ સોશિયલ મીડિયા પર ફરી ચર્ચા શરૂ થઈ છે.
ભાજપે પણ રાહુલ ગાંધી પર સાધ્યું નિશાન
આ વિવાદમાં ભાજપ પણ સક્રિય બન્યું છે. ભાજપના સત્તાવાર X હેન્ડલ પરથી રાહુલ ગાંધીના નિવેદનની ટીકા કરવામાં આવી હતી. ભાજપે આક્ષેપ કર્યો કે રાહુલ ગાંધી મહિલાઓની પસંદગી અને સ્વતંત્રતાની વાત કરે છે, પરંતુ અલગ-અલગ ધાર્મિક સંદર્ભોમાં તેમનું વલણ અલગ જોવા મળે છે. ભાજપે સવાલ ઉઠાવ્યો કે જો મહિલા સશક્તિકરણ તેમનો ઉદ્દેશ્ય છે તો દરેક મહિલાની પસંદગી માટે એકસરખો માપદંડ કેમ ન હોવો જોઈએ?
જાહેરાતના વિવાદે લીધો રાજકીય વળાંક
રક્ષાબંધન જેવા પરંપરાગત તહેવારની જાહેરાતમાં કૃતિ સેનનના પહેરવેશને લઈને શરૂ થયેલી સોશિયલ મીડિયા ચર્ચા હવે રાજકીય નિવેદનોનું કારણ બની છે. એક તરફ રાહુલ ગાંધી મહિલાની પહેરવેશની સ્વતંત્રતાના સમર્થનમાં છે, તો બીજી તરફ કંગના રણૌત અને ભાજપે જાહેરાતના કન્સેપ્ટ તથા સાંસ્કૃતિક સંદર્ભને લઈને સવાલો ઉઠાવ્યા છે. આ દરમિયાન જાહેરાત બનાવનાર જ્વેલરી કંપનીએ ભારે વિરોધ બાદ તેને તમામ ડિજિટલ અને મીડિયા પ્લેટફોર્મ પરથી પાછી ખેંચી લીધી હોવાનું સામે આવ્યું છે.
