Kerala Mini Cooper Crash: કેરળના એર્નાકુલમ જિલ્લામાં કોચી એરપોર્ટ નજીક રવિવારે વહેલી સવારે ભયાનક માર્ગ અકસ્માત સર્જાયો હતો. નેદુમ્બાસેરી વિસ્તારમાં પૂરપાટ ઝડપે આવતી મિની કૂપર કારે સ્કૂટરને પાછળથી જોરદાર ટક્કર મારતાં બે યુવતીઓ સહિત ત્રણ લોકોનાં મોત થયાં હતાં. આ અકસ્માતમાં દેવિકા, ગોપિકા અને ઇઝાઝે જીવ ગુમાવ્યો હતો. અકસ્માત બાદ 19 વર્ષીય કારચાલક સુહેલ સજીવના કથિત નિવેદનને લઈને પણ વિવાદ સર્જાયો છે. અહેવાલો અનુસાર, તેણે કહ્યું હતું કે, 'પપ્પા બધું સંભાળી લેશે.' પોલીસે યુવકને કસ્ટડીમાં લઈને તપાસ શરૂ કરી છે. કારચાલકે દારૂ પીધો હતો કે નહીં તે અંગે અંતિમ પુષ્ટિ મેડિકલ રિપોર્ટ આવ્યા બાદ જ થઈ શકશે.
'પપ્પા બધું સંભાળી લેશે' નિવેદનથી લોકોમાં રોષ
અકસમાત બાદ સ્થાનિક લોકો ઘટનાસ્થળે દોડી આવ્યા હતા. આ દરમિયાન કારચાલક સુહેલ સજીવનું કથિત નિવેદન સામે આવ્યું હતું કે તેના પિતા આખી પરિસ્થિતિ સંભાળી લેશે. આ વાતને લઈને સ્થાનિક લોકોમાં રોષ ફેલાયો હોવાના અહેવાલ છે. પોલીસે ઘટનાસ્થળે પહોંચીને કારચાલકને કસ્ટડીમાં લીધો હતો. અકસ્માત કેવી રીતે સર્જાયો અને કારચાલકની સ્થિતિ શું હતી તે અંગે તપાસ હાથ ધરવામાં આવી છે.
ચા પીવા નીકળેલા ત્રણ મિત્રોનું મોત
પ્રાથમિક માહિતી અનુસાર, અકસ્માત રવિવારે વહેલી સવારે આશરે બે વાગ્યે નેદુમ્બાસેરી વિસ્તારમાં થયો હતો. ત્રણેય મિત્રો નજીકની દુકાનમાં ચા પીધા બાદ સ્કૂટર પર ઘરે પરત ફરી રહ્યા હતા. આ દરમિયાન પાછળથી આવેલી મિની કૂપર કારે તેમના સ્કૂટરને ટક્કર મારી હતી. આ અકસ્માતમાં જીવ ગુમાવનાર ત્રણેયની ઓળખ દેવિકા, ગોપિકા અને ઇઝાઝ તરીકે થઈ છે. દેવિકા વાયનાડની, ગોપિકા પલક્કડની અને ઇઝાઝ કર્ણાટકનો રહેવાસી હોવાનું જણાવાયું છે. ત્રણેય મિત્રો ત્રિક્કાકરા વિસ્તારમાં નોકરી કરતા હતા. અકસમાત બાદ તેમને સારવાર માટે હોસ્પિટલ લઈ જવામાં આવ્યા હતા, પરંતુ તબીબોએ તેમને મૃત જાહેર કર્યા હતા.
કારચાલકે 'માત્ર બિયર પીધી હતી' એવો દાવો કર્યો
અકસમાત બાદ કારચાલકે દારૂ પીધો હોવાની આશંકા વ્યક્ત કરવામાં આવી હતી. અહેવાલો અનુસાર, મેડિકલ તપાસ દરમિયાન તેણે અકસ્માત પહેલાં દારૂ પીધો હોવાનું સ્વીકાર્યું હતું, પરંતુ તેણે માત્ર બિયર પીધી હોવાનો દાવો કર્યો હતો. જોકે, પોલીસના જણાવ્યા અનુસાર, દારૂ અથવા અન્ય નશીલા પદાર્થનું સેવન થયું હતું કે નહીં તેની સચોટ પુષ્ટિ માટે લોહીના નમૂના લેવામાં આવ્યા છે. અંતિમ પરિણામ આવ્યા બાદ જ આ અંગે સ્પષ્ટતા થઈ શકશે.
પોલીસ અને ફોરેન્સિક ટીમની તપાસ ચાલુ
એર્નાકુલમ રૂરલના પોલીસ અધિક્ષક કે. એસ. સુદર્શને જણાવ્યું હોવાનું અહેવાલોમાં જણાવાયું છે કે કારચાલકના લોહીના નમૂનાના રિપોર્ટની રાહ જોવાઈ રહી છે. કારની અંદર કોઈ શંકાસ્પદ વસ્તુ કે નશીલા પદાર્થો હતા કે નહીં તે જાણવા ફોરેન્સિક તપાસ પણ હાથ ધરવામાં આવી છે. પ્રાથમિક તપાસમાં કારચાલક નશાની અસર હેઠળ હોવાની આશંકા વ્યક્ત કરવામાં આવી છે, પરંતુ તેની અંતિમ પુષ્ટિ તપાસના અહેવાલો બાદ જ થશે. અહેવાલો અનુસાર, મિની કૂપર કાર સુહેલના પિતાના નામે નોંધાયેલી છે અને તેની પાસે માન્ય ડ્રાઇવિંગ લાઇસન્સ પણ છે. પોલીસે ભારતીય ન્યાય સંહિતા હેઠળ સાપરાધ મનુષ્યવધ સહિતની કલમો અંતર્ગત ગુનો નોંધ્યો હોવાના અહેવાલ છે. તપાસ પૂર્ણ થયા બાદ આગળની કાયદેસરની કાર્યવાહી કરવામાં આવશે.
સીસીટીવીમાં કેદ થઈ ભયાનક ટક્કર
અકસમાતના સીસીટીવી ફૂટેજમાં મિની કૂપર કાર સ્કૂટરને પાછળથી ટક્કર મારતી દેખાતી હોવાના અહેવાલ છે. ટક્કર એટલી જોરદાર હતી કે સ્કૂટરને ભારે નુકસાન થયું હતું અને તેના ટુકડા રસ્તા પર વેરવિખેર થઈ ગયા હતા. કારના આગળના ભાગને પણ નુકસાન થયું હતું. ફૂટેજમાં અકસ્માતની ગંભીરતા જોવા મળતી હોવાનો દાવો કરવામાં આવ્યો છે. પોલીસ આ ફૂટેજ સહિત અન્ય પુરાવાઓની તપાસ કરી રહી છે, જેથી અકસ્માતની ચોક્કસ પરિસ્થિતિ જાણી શકાય.
હોસ્પિટલમાં કારચાલક પર હુમલાનો પ્રયાસ
અકસમાત બાદ સુહેલને મેડિકલ તપાસ માટે હોસ્પિટલ લઈ જવામાં આવ્યો હતો. અહેવાલો અનુસાર, ત્યાં મૃતકોના કેટલાક મિત્રોએ તેની સાથે બોલાચાલી કરી અને તેના પર હુમલો કરવાનો પ્રયાસ કર્યો હતો. પોલીસ તેને હોસ્પિટલની બહાર લઈ જઈ રહી હતી ત્યારે તેના માથા પર પાછળથી પ્રહાર કરવામાં આવ્યો હોવાનો અહેવાલ છે. પોલીસે દરમિયાનગીરી કરીને વધુ હુમલો અટકાવ્યો હતો અને હુમલાના આરોપમાં એક વ્યક્તિને કસ્ટડીમાં લીધો હતો. હાલ પોલીસ લોહીના પરીક્ષણ અને કારના ફોરેન્સિક રિપોર્ટની રાહ જોઈ રહી છે. આ રિપોર્ટના આધારે અકસ્માત અને કારચાલકની સ્થિતિ અંગે વધુ સ્પષ્ટતા થઈ શકે છે.
માર્ગ સુરક્ષા અને કાયદાકીય જવાબદારી ફરી ચર્ચામાં
આ દુર્ઘટનામાં ત્રણ લોકોનાં મોતથી માર્ગ સુરક્ષા અને બેદરકારીપૂર્વક વાહન ચલાવવાના જોખમ અંગે ફરી સવાલો ઊભા થયા છે. દારૂના સેવન બાદ વાહન ચલાવવું ગંભીર જોખમ ઊભું કરી શકે છે. જોકે, આ કેસમાં કારચાલકની સ્થિતિ અંગે અંતિમ નિષ્કર્ષ તપાસના અહેવાલો બાદ જ કાઢી શકાશે.
