India rebukes Pakistan in UN: સંયુક્ત રાષ્ટ્ર માનવ અધિકાર પરિષદના 55મા સત્ર દરમિયાન સંયુક્ત રાષ્ટ્ર માનવ અધિકાર પરિષદમાં કાશ્મીર મુદ્દે પાકિસ્તાન દ્વારા ઉઠાવવામાં આવેલા આરોપોનો ભારતે કડક અને સ્પષ્ટ શબ્દોમાં જવાબ આપ્યો. ભારતીય રાજદ્વારી અનુપમા સિંહે પાકિસ્તાન પર પ્રહાર કરતા જણાવ્યું કે તે 'લા-લા લેન્ડ' એટલે કે કાલ્પનિક દુનિયામાં જીવી રહ્યું છે.
IMF અને વિકાસ બજેટ પર તીખી ટિપ્પણી
અનુપમા સિંહે પાકિસ્તાનની આર્થિક સ્થિતિ પર સીધો હુમલો કરતા કહ્યું કે જમ્મુ-કાશ્મીરનું વિકાસ બજેટ પાકિસ્તાનને મળેલા ઇન્ટરનેશનલ મોનેટરી ફંડના બેલઆઉટ પેકેજથી પણ વધુ છે. તેમણે જણાવ્યું કે જો પાકિસ્તાનને વિશ્વનો સૌથી ઊંચો રેલવે પુલ ચિનાબ પુલ નકલી લાગે છે, તો તે હકીકતથી દૂર છે. ભારતે જમ્મુ-કાશ્મીરમાં ઇન્ફ્રાસ્ટ્રક્ચર અને વિકાસ ક્ષેત્રે નોંધપાત્ર પ્રગતિ હાંસલ કરી છે, જે આંતરરાષ્ટ્રીય સ્તરે માન્ય છે.
OIC પર પણ નિશાન
ભારતે માત્ર પાકિસ્તાન જ નહીં, પરંતુ ઓર્ગેનાઈઝેશન ઓફ ઇસ્લામિક કોઓર્પોરેશન (OIC)ને પણ આડે હાથ લીધું. અનુપમા સિંહે કહ્યું કે OIC એક દેશના પ્રોપગેન્ડાનું પ્રતિધ્વનિ કેન્દ્ર બની ગયું છે અને તે નિષ્પક્ષ અભિગમથી દૂર થઈ ગયું છે.
કાશ્મીર મુદ્દે અંતિમ સંદેશ
ભારતે સ્પષ્ટ શબ્દોમાં જણાવ્યું કે જમ્મુ-કાશ્મીર ભારતનો અભિન્ન ભાગ હતો, છે અને રહેશે. 1947ના ભારતીય સ્વતંત્રતા કાયદા હેઠળ થયેલો વિલય કાયદેસર અને અંતિમ છે. તેમણે ઉમેર્યું કે જો કોઈ મુદ્દો બાકી છે તો તે પાકિસ્તાનના ગેરકાયદેસર કબજાવાળા વિસ્તારો (POK)નો છે. પાકિસ્તાને તે વિસ્તારો ખાલી કરવા જોઈએ. અનુપમા સિંહે કાશ્મીરમાં થયેલા રેકોર્ડ મતદાન અને વધતા વિકાસ કાર્યોનો ઉલ્લેખ કરીને કહ્યું કે સ્થાનિક જનતાએ હિંસા અને આતંકવાદની વિચારધારાને નકારી કાઢી છે. કાશ્મીર હવે વિકાસ અને લોકશાહીની દિશામાં આગળ વધી રહ્યું છે. આ સત્ર દરમિયાન ભારતે સ્પષ્ટ કરી દીધું કે ખોટા પ્રચારથી હકીકતો બદલાઈ શકતી નથી અને આંતરરાષ્ટ્રીય મંચ પર ભારત પોતાની વાત મક્કમતાથી રજૂ કરતું રહેશે.
