Jual Oram Statement Odisha BJP: કેન્દ્રીય આદિવાસી બાબતોના મંત્રી અને ભાજપના વરિષ્ઠ નેતા જુએલ ઓરામે પોતાની જ પાર્ટીના કેટલાક નેતાઓ સામે ગંભીર આક્ષેપો કરીને રાજકીય ગરમાવો વધારી દીધો છે. ઓરિસ્સાના રાઉરકેલામાં સંગઠિત ગુનાખોરીના એક કેસમાં તેમના નજીકના સહયોગી રાકેશ પાસવાનની પોલીસ દ્વારા અટકાયત બાદ આ સમગ્ર મામલો ચર્ચામાં આવ્યો છે. પાસવાન પર સરકારી ગેસ્ટ હાઉસમાં કથિત રીતે ગુનેગારોને આશરો આપવાનો આરોપ છે, જો, કે તેમણે આ આરોપોને નકારી કાઢ્યા છે.
પહેલા કાયદાને કામ કરવા દેવાની વાત, પછી પોતાના જ નેતાઓ પર આરોપ
રાકેશ પાસવાનની અટકાયત બાદ શરૂઆતમાં જુએલ ઓરામે કહ્યું હતું કે પોલીસ અને કાયદાને પોતાનું કામ કરવા દેવું જોઈએ. જોકે, ત્યારબાદ તેમણે પોતાની જ પાર્ટીના એક વિરોધી જૂથ સામે ગંભીર આરોપો લગાવ્યા હતા. ઓરામે દાવો કર્યો કે તેમને બદનામ કરવા માટે ભાજપના જ કેટલાક નેતાઓ મોટા પ્રમાણમાં પૈસા ખર્ચી રહ્યા છે. તેમના મતે, આ નેતાઓનો હેતુ તેમને કેન્દ્રીય મંત્રીમંડળમાંથી દૂર કરાવવાનો છે, જેથી તેમના સ્થાને પોતાને મંત્રી બનવાની તક મળી શકે.
'હવે 2029ની ચૂંટણી ચોક્કસ લડીશ'
સુંદરગઢ લોકસભા બેઠક પરથી છ વખત સાંસદ રહી ચૂકેલા જુએલ ઓરામે કહ્યું કે આ સમગ્ર રાજકીય ઘટનાક્રમથી તેમનો નિર્ણય બદલાઈ ગયો છે. તેમણે અગાઉ આગામી લોકસભા ચૂંટણી ન લડવાનો વિચાર કર્યો હતો, પરંતુ હવે તેમણે સ્પષ્ટ કર્યું છે કે તેઓ 2029ની લોકસભા ચૂંટણી ચોક્કસપણે લડશે અને પોતાના રાજકીય વિરોધીઓનો સામનો કરશે.
‘મને બદનામ કરનારાઓના હાથ કાપી નાખવાની ક્ષમતા મારામાં છે’
પોતાના વિરોધીઓ સામે પ્રહાર કરતાં જુએલ ઓરામે અત્યંત આક્રમક નિવેદન આપ્યું હતું. તેમણે કહ્યું કે જે લોકો તેમને બદનામ કરવાનો પ્રયાસ કરી રહ્યા છે, તેમની સામે કડક કાર્યવાહી કરવાની અને ‘તેમના હાથ કાપી નાખવાની ક્ષમતા મારામાં છે.’ મંત્રીના આ નિવેદન બાદ ઓડિશાના રાજકારણમાં ભારે ચર્ચા શરૂ થઈ છે. તેમના નિવેદનને લઈને વિપક્ષી દળોએ પણ ભાજપને ઘેરવાનું શરૂ કર્યું છે.
ઓડિશા ભાજપ સંગઠનને પણ કરી ફરિયાદ
ઓરામે જણાવ્યું કે તેઓ તેમની વિરુદ્ધ ચાલી રહેલા કથિત દુષ્પ્રચાર પાછળ કોણ છે તે જાણવા માટે સમગ્ર મામલાની ઊંડાણપૂર્વક તપાસ કરશે. તેમણે આ અંગે ઓડિશા ભાજપના સંગઠન મહામંત્રી સમક્ષ પણ પોતાની ફરિયાદ રજૂ કરી હોવાનું જણાવ્યું છે. હવે ભાજપ સંગઠન આ આંતરિક વિવાદને કેવી રીતે હેન્ડલ કરે છે તેના પર પણ રાજકીય વર્તુળોની નજર છે.
BJD અને કોંગ્રેસે ભાજપને ઘેર્યું
જુએલ ઓરામના નિવેદન બાદ ઓડિશાના વિપક્ષી દળો BJD અને કોંગ્રેસે ભાજપ સરકાર પર નિશાન સાધ્યું છે. BJD નેતા પ્રમિલા મલિકે કહ્યું કે જુએલ ઓરામ રાજ્યના મોટા આદિવાસી નેતા છે અને તેમના નિવેદનથી ભાજપમાં રહેલા આંતરિક મતભેદો કેટલી હદે ઊંડા છે તે સ્પષ્ટ થાય છે. બીજી તરફ, ઓડિશા કોંગ્રેસ પ્રમુખ ભક્ત ચરણ દાસે ઓરામની ભાષાને અસંસદીય ગણાવી હતી. તેમણે કહ્યું કે લોકશાહીમાં હિંસક ભાષા માટે કોઈ સ્થાન નથી અને જાહેર જીવનમાં આવી નિવેદનબાજી યોગ્ય નથી. રાકેશ પાસવાન સામેના કેસ અને જુએલ ઓરામ દ્વારા લગાવવામાં આવેલા રાજકીય ષડ્યંત્રના આરોપોની તપાસ આગળ વધ્યા બાદ જ સમગ્ર મામલાની હકીકત વધુ સ્પષ્ટ થશે.
