Jharkhand Accident: ઝારખંડના જમશેદપુરમાં ગુરુવારે વહેલી સવારે ગમખ્વાર માર્ગ અકસ્માતમાં રાજ્યના ગ્રામ્ય વિકાસ મંત્રી દીપિકા પાંડે સિંહની પુત્રી સહિત ચાર લોકોનાં મોત થયા છે. આ અકસ્માત સોનારી પોલીસ સ્ટેશન વિસ્તારમાં આવેલા મરીન ડ્રાઇવ રોડ પર દોમુહાની નજીક આશરે રાત્રે 3 વાગ્યે થયો હતો. કાર રસ્તા પર ઊભેલા ટ્રકની પાછળ ધડાકાભેર અથડાતાં કારનો કચ્ચરઘાણ વળી ગયો હતો અને તેમાં સવાર ચારેય લોકોનાં ઘટનાસ્થળે જ મોત થયા હતા.
ટ્રક સાથે અથડાતાં કારના ફુરચા ઉડ્યા
પોલીસના જણાવ્યા અનુસાર, રસ્તા પર ટ્રક ખરાબ થઈ જતાં તેને ઊભો રાખવામાં આવ્યો હતો. ટ્રકની પાછળ ચેતવણી માટે નાની ઝાડની ડાળી મૂકવામાં આવી હતી, પરંતુ સ્થળ પર રિફ્લેક્ટર કે યોગ્ય ચેતવણીનું નિશાન જોવા મળ્યું નહોતું. દરમિયાન કાર ટ્રકના પાછળના ભાગ સાથે અથડાઈ હતી. ટક્કર એટલી જોરદાર હતી કે કાર સંપૂર્ણપણે ક્ષતિગ્રસ્ત થઈ ગઈ હતી. પોલીસે ઘટનાસ્થળે પહોંચીને મૃતદેહોને બહાર કાઢવાની કામગીરી હાથ ધરી હતી.
મંત્રીની પુત્રી સહિત ચાર લોકોનાં મોત
આ અકસ્માતમાં દીપિકા પાંડે સિંહની પુત્રી સહિત કારમાં સવાર ચારેય લોકોનાં મોત થયા છે. અહેવાલોમાં મૃતકોના નામ અંગે થોડી અસંગતતા જોવા મળી રહી છે, પરંતુ અનેક અહેવાલોમાં મંત્રીની પુત્રીનું નામ તૃષા સિંહ અથવા ઇસ્તિકા સિંહ તરીકે આપવામાં આવ્યું છે. અન્ય મૃતકોમાં સાર્થક અગ્રવાલ, નમન ગુપ્તા અને વંશિકા ખંડેલવાલનાં નામ સામે આવ્યા છે.
હેમંત સોરેન સહિત નેતાઓએ વ્યક્ત કર્યો શોક
અકસ્મિક દુર્ઘટનાના સમાચાર સામે આવતા ઝારખંડના રાજકીય વર્તુળમાં શોકની લાગણી ફેલાઈ છે. મુખ્યમંત્રી હેમંત સોરેને દીપિકા પાંડે સિંહની પુત્રી સહિત ચાર લોકોનાં મોત પર ઊંડું દુઃખ વ્યક્ત કર્યું હતું. તેમણે કહ્યું કે સંતાન ગુમાવવાનું દુઃખ માતા-પિતા અને પરિવાર માટે શબ્દોથી પર છે. સ્વાસ્થ્ય મંત્રી ઇરફાન અંસારી સહિત અન્ય નેતાઓએ પણ શોક વ્યક્ત કર્યો છે.
અકસ્માતની તપાસ શરૂ
પોલીસે સમગ્ર ઘટનાની તપાસ શરૂ કરી છે. ટ્રક કયા સંજોગોમાં રસ્તા પર ઊભો હતો અને અકસ્માત કેવી રીતે થયો તેની તપાસ કરવામાં આવી રહી છે. અધિકારીઓ દ્વારા ઘટનાસ્થળની સ્થિતિ તથા વાહનોની તપાસના આધારે આગળની કાર્યવાહી હાથ ધરવામાં આવશે.
