Japan highway crash: જાપાનમાં ખરાબ હવામાન અને ભારે બરફવર્ષાના કારણે કાન-એત્સુ એક્સપ્રેસવે પર 50થી વધુ વાહનો વચ્ચે ભયાનક અથડામણ થઈ ગઈ. આ અકસ્માતમાં 77 વર્ષની એક મહિલાનું મોત થયું છે, જ્યારે 26 લોકો ઘાયલ થયા છે, જેમાંથી 5ની હાલત ગંભીર છે. આ ઘટના ટોક્યોથી અંદાજે 160 કિલોમીટર દૂર ગુન્મા પ્રાંતમાં બની હતી.
બરફવર્ષાના કારણે હાઇવે પર વાહનો અથડાયા
જાપાનમાં ખરાબ હવામાન અનેક લોકો માટે મોત સમાન સાબિત થયું છે. જાપાનના એક હાઇવે પર એક પછી એક વાહનો અથડાતા ભયાનક આગ લાગી ગઈ. આ ઘટનામાં એક મહિલાનું મોત થયું છે અને લગભગ 26 લોકો ઘાયલ થયા છે. વર્ષ પૂરું થતું હોવાથી જાપાનમાં રજાઓ શરૂ થઈ ગઈ છે. રજાનો આનંદ માણવા માટે ઘણા લોકો એકસાથે ઘરેથી નીકળ્યા, જેના કારણે હાઇવે પર વાહનોની ભારે ભીડ જોવા મળી, પરંતુ બરફવર્ષાના કારણે હાઇવે પર વાહનો અચાનક લપસવા લાગ્યા અને એકબીજા સાથે અથડાઈ ગયા.
1નું મોત અને 26 ઘાયલ
આ અકસ્માત જાપાનની રાજધાની ટોક્યોથી લગભગ 160 કિલોમીટર દૂર ગુન્મા પ્રાંતમાં આવેલા કાન-એત્સુ એક્સપ્રેસવે પર થયો. જાપાન પોલીસ મુજબ, આ અકસ્માતમાં 77 વર્ષની એક મહિલાનું મોત થયું છે અને 26 લોકો ઘાયલ થયા છે. જેમાંથી 5ની હાલત ગંભીર હોવાનું જણાવવામાં આવ્યું છે.
અકસ્માત કેવી રીતે થયો?
આ અકસ્માતમાં ઘણા ટ્રક પણ અથડાયા હતા, જેના કારણે એક્સપ્રેસવેનો માર્ગ સંપૂર્ણપણે બંધ થઈ ગયો. પાછળથી આવતી ઝડપી કાર પણ એક પછી એક અથડાતી ગઈ. આ પ્રક્રિયામાં લગભગ 50થી વધુ વાહનો એકબીજા સાથે ટકરાયા અને ભયાનક આગ લાગી. અનેક વાહનો આ આગની ઝપટમાં આવી ગયા.
એક્સપ્રેસવે પરથી વાહનો અને કચરો હટાવવામાં આવી રહ્યો છે
ઘટનાના સાત કલાક બાદ જાપાન પોલીસે જણાવ્યું હતું કે, આગના કારણે વધુ કોઈનું મોત થયું નથી. શુક્રવારની મોડી રાત્રે બરફવર્ષાની ચેતવણી જાહેર કરવામાં આવી હતી. તેમ છતાં, વર્ષ પૂર્ણ થવાની ઉજવણી માટે ઘણા લોકો ઘરેથી નીકળી પડ્યા અને આ ભયાનક અકસ્માતનો ભોગ બન્યા. એક્સપ્રેસવેના કેટલાક ભાગો હજુ પણ બંધ રાખવામાં આવ્યા છે. પોલીસ સમગ્ર ઘટનાની તપાસ કરી રહી છે. માર્ગ પરથી વાહનો અને કચરો હટાવવાનું કામ પણ સતત ચાલુ છે.








