24,000 feet hoisted the Tricolour: ઉત્તરાખંડમાં ભારત-તિબેટ સરહદ નજીક આવેલા 7,355 મીટર એટલે કે લગભગ 24,131 ફૂટ ઊંચા માઉન્ટ એબી ગામિન શિખર પર ચઢાણ કરીને ITBPના 23 જવાનોએ દેશનું નામ રોશન કર્યું છે. ભારે ઠંડી, ઓક્સિજનની અછત અને મુશ્કેલ પર્વતીય પરિસ્થિતિઓ વચ્ચે જવાનોએ 16 સપ્ટેમ્બરે આ પડકારજનક શિખર પર તિરંગો લહેરાવ્યો હતો. આ સિદ્ધિ ITBPના ફોર્સ લેવલ માઉન્ટેનિયરિંગ એક્સપિડિશન 2026નો ભાગ હતી.
ડેપ્યુટી કમાન્ડન્ટ પરીક્ષિત શાહના નેતૃત્વમાં અભિયાન
આ વિશેષ પર્વતારોહણ અભિયાનનું નેતૃત્વ ITBPના ડેપ્યુટી કમાન્ડન્ટ પરીક્ષિત શાહે કર્યું હતું. ITBPના ડિરેક્ટર જનરલ શત્રુજીત કપૂરે 7 ઓગસ્ટે નવી દિલ્હી સ્થિત ITBP હેડક્વાર્ટરથી આ અભિયાનને લીલી ઝંડી આપી હતી. ત્યારબાદ જવાનોએ પડકારજનક શિખર સર કરવા માટે પોતાની તૈયારીઓ શરૂ કરી હતી.
પાતળી હવા અને ઓક્સિજનની અછત વચ્ચે ચઢાણ
7,000 મીટરથી વધુ ઊંચાઈ પર આવેલા માઉન્ટ એબી ગામિન પર પહોંચવું જવાનો માટે સરળ નહોતું. અભિયાન દરમિયાન તેમને અત્યંત પાતળી હવા અને ઓક્સિજનની તીવ્ર અછતનો સામનો કરવો પડ્યો હતો. આ ઉપરાંત ભારે ઠંડી, વિશાળ હિમનદીઓ અને સતત બદલાતા હવામાનને કારણે ચઢાણ વધુ જોખમી બન્યું હતું. આ તમામ મુશ્કેલીઓ વચ્ચે ITBPના 23 જવાનોએ હિંમત અને ટીમવર્ક સાથે આગળ વધીને આખરે 16 સપ્ટેમ્બરે શિખર પર સફળતાપૂર્વક પહોંચ્યા હતા. ત્યાં પહોંચ્યા બાદ જવાનોએ દેશનો તિરંગો લહેરાવીને આ અભિયાનને ઐતિહાસિક સફળતામાં પરિવર્તિત કર્યું હતું.
દેશસેવા સાથે પર્વતારોહણમાં પણ ITBPની સિદ્ધિ
માઉન્ટ એબી ગામિનનું આ સફળ ચઢાણ ITBPના જવાનોની શારીરિક ક્ષમતા, સાહસ અને કઠિન પરિસ્થિતિઓમાં કામ કરવાની ક્ષમતાનું ઉદાહરણ છે. સરહદની સુરક્ષા સાથે ITBP સમયાંતરે આવા પર્વતારોહણ અભિયાનોમાં પણ ભાગ લે છે. 24 હજાર ફૂટથી વધુ ઊંચાઈએ તિરંગો લહેરાવવાની આ સિદ્ધિએ ફરી એકવાર જવાનોના સાહસ અને સમર્પણને ઉજાગર કર્યું છે.
