Italy airport storm video: ઇટાલીમાં પ્રકૃતિનો ભયાનક રૌદ્ર સ્વરૂપ જોવા મળ્યો છે, જ્યાં તાજેતરમાં એક ખતરનાક વાવાઝોડાએ તબાહી મચાવી છે. આ કુદરતી આફતે એરપોર્ટ પર ઊભેલા વિમાનોને ફૂટબોલની જેમ ઉછાળી દીધા હતા, જેના વાયરલ વીડિયોએ સૌ કોઈને ચોંકાવી દીધા છે.
120 કિ.મી./કલાકની ઝડપે ફૂંકાયેલા પવને મચાવી તબાહી
ઇટાલીમાં 21 ઓગસ્ટના રોજ આવેલા વાવાઝોડાએ ફોર્લી શહેરના લુઇજી રિડોલ્ફી એરપોર્ટ પર ભારે નુકસાન પહોંચાડ્યું હતું. આ વાવાઝોડા દરમિયાન હવામાન વિભાગના જણાવ્યા અનુસાર પવનની ગતિ આશરે 120 કિલોમીટર પ્રતિ કલાક સુધી પહોંચી ગઈ હતી. સામે આવેલા ડરામણા વીડિયોમાં એરપોર્ટ પર ઊભેલા અનેક હળવા અને અલ્ટ્રાલાઇટ વિમાનો પોતાની જગ્યા પરથી અચાનક હવામાં ઉછળતા અને પલટીને જમીન પર પટકાયા હતા. આ ભયાનક દૃશ્યો તુફાનની પ્રચંડ તાકાતની સ્પષ્ટ સાક્ષી પૂરે છે.
એરપોર્ટ બંધ કરાયું અને બિલ્ડિંગને નુકસાન
સ્થિતિની ગંભીરતાને ધ્યાનમાં રાખીને સુરક્ષાના કારણોસર એરપોર્ટને તાત્કાલિક ધોરણે આશરે એક કલાક માટે બંધ કરી દેવામાં આવ્યું હતું. તુફાની પવનોના કારણે એરપોર્ટની કેટલીક ઇમારતોને પણ વ્યાપક નુકસાન થયું હતું. અલ-જઝીરાના અહેવાલ મુજબ આ ઘટના બાદ તાત્કાલિક રાહત બચાવ દળ અને ફાયર ફાઇટરોને ઘટનાસ્થળે બોલાવવામાં આવ્યા હતા.
સદનસીબે કોઈ જાનહાનિ નહીં
આ ભયાનક ઘટના વચ્ચે રાહતની વાત એ રહી કે આ દુર્ઘટનામાં કોઈ પણ વ્યક્તિના ઈજાગ્રસ્ત થવાના કે જાનહાનિના સમાચાર સામે આવ્યા નથી. આ વાવાઝોડાની અસર ફોર્લી-ચેસેના અને રાવેન્ના પ્રાંતના આસપાસના વિસ્તારોમાં પણ જોવા મળી હતી, જ્યાં તેજ પવનના કારણે અનેક વૃક્ષો ધરાશાયી થઈ ગયા હતા. પરિસ્થિતિને કાબૂમાં લેવા અને નુકસાનને સુધારવા માટે ફાયર વિભાગને 150થી વધુ વખત મદદ માટે મેદાનમાં ઉતરવું પડ્યું હતું.
ઇટાલીના અનેક વિસ્તારોમાં ખરાબ હવામાનનો કહેર
આ વાવાઝોડું ઇટાલીના વિવિધ ભાગોમાં ચાલી રહેલા ખરાબ હવામાનના મોટા દોરનો જ એક હિસ્સો હતો, જેણે લિગુરિયા, ટસ્કની, લોમ્બાર્ડી અને એમિલિયા-રોમાગ્ના જેવા પ્રદેશોને પ્રભાવિત કર્યા હતા. ખાસ કરીને ટસ્કનીમાં તુફાન દરમિયાન 23,000 કરતા વધુ વીજળી પડવાની ઘટનાઓ નોંધાઈ હતી. પીસાના દરિયાકાંઠે પવનની ઝડપ 106 કિલોમીટર પ્રતિ કલાક અને ફ્લોરેન્સ પ્રાંતમાં 103 કિલોમીટર પ્રતિ કલાક સુધી પહોંચી ગઈ હતી. ભારે વરસાદને કારણે અનેક વિસ્તારોમાં પૂર જેવી સ્થિતિ સર્જાઈ હતી અને પાયાની સુવિધાઓને ભારે ક્ષતિ પહોંચી હતી.
