Israel US air strikes: મધ્ય-પૂર્વમાં ચાલી રહેલો સંઘર્ષ હવે વધુ વિકરાળ સ્વરૂપ ધારણ કરતો દેખાઈ રહ્યો છે. ઈઝરાયેલ અને અમેરિકા તરફથી થયેલા હુમલાઓ બાદ ઈરાન સાથેની સીધી ટકરાવની સ્થિતિ સર્જાઈ છે. ઇઝરાયલ સંરક્ષણ દળો (IDF) એ સત્તાવાર નિવેદન આપીને જણાવ્યું છે કે તેમની વાયુસેનાએ ઈરાનની રાજધાની તહેરાન તેમજ લેબનોનની રાજધાની બૈરુત પર એકસાથે વ્યાપક હવાઈ હુમલાઓ શરૂ કર્યા છે. IDF દ્વારા સોશિયલ મીડિયા પર જાહેર કરવામાં આવ્યું કે આ કાર્યવાહીનો મુખ્ય ઉદ્દેશ ઈરાનના શાસન સાથે જોડાયેલા સૈન્ય ઢાંચા અને લેબનોનમાં કાર્યરત હિઝબુલ્લાહના ઠેકાણાઓને નિશાન બનાવવાનો છે. દાવા મુજબ, આ ઓપરેશનમાં કમાન્ડ સેન્ટરો અને હથિયાર સંગ્રહ સ્થળોને નષ્ટ કરવા પર ખાસ ભાર મૂકવામાં આવ્યો છે.
અનેક ગામોના રહેવાસીઓને સ્થળ ખાલી કરવાની ચેતવણી
તેહરાન પર થયેલી એરસ્ટ્રાઈકના પ્રાથમિક અહેવાલોમાં જણાવાયું છે કે ઇસ્લામિક રિવોલ્યુશનરી ગાર્ડ કોર્પ્સ (IRGC)ના ઓછામાં ઓછા પાંચ સભ્યો માર્યા ગયા છે. શહેરના કેટલાક વિસ્તારોમાં વિસ્ફોટોના અવાજો સંભળાયા હોવાનું સ્થાનિક સૂત્રો જણાવી રહ્યા છે. બીજી તરફ, બેરૂતના દક્ષિણી ઉપનગરોમાં પણ ભારે ધુમાડા અને નુકસાનના દૃશ્યો સામે આવ્યા છે. ઈઝરાયેલ સરકારે હુમલાઓ પહેલા બેરૂતના દક્ષિણ ભાગ અને આસપાસના અનેક ગામોના રહેવાસીઓને સ્થળ ખાલી કરવાની ચેતવણી આપી હતી. આ પગલાંથી સ્પષ્ટ થાય છે કે નેતન્યાહૂ સરકાર આ વખતે આક્રમક વ્યૂહ અપનાવી રહી છે. વિશ્લેષકોના મતે, આ પ્રકારની કાર્યવાહી સમગ્ર પ્રદેશમાં વધુ ઉગ્ર પ્રતિક્રિયા જન્માવી શકે છે.
પરિવારજનોને તાત્કાલિક સ્થળાંતર કરવા સૂચના આપી
વધતી તણાવપૂર્ણ પરિસ્થિતિને ધ્યાનમાં રાખીને અમેરિકા પણ સતર્ક બન્યું છે. યુએસ સ્ટેટ ડિપાર્ટમેન્ટે બહેરીન, ઈરાક અને જોર્ડન સ્થિત પોતાની રાજદ્વારી મિશનોમાંથી બિન-આવશ્યક સરકારી કર્મચારીઓ અને તેમના પરિવારજનોને તાત્કાલિક સ્થળાંતર કરવા સૂચના આપી છે. સુરક્ષા કારણોસર લેવામાં આવેલો આ નિર્ણય પ્રદેશમાં વધતા જોખમનું પ્રતિબિંબ માનવામાં આવે છે. ઈરાન અને ઈઝરાયેલ વચ્ચેનો આ વધતો સંઘર્ષ હવે માત્ર બે દેશો સુધી મર્યાદિત રહ્યો નથી. પડોશી દેશો પર તેની અસર દેખાવા લાગી છે, જ્યારે વૈશ્વિક શક્તિઓ પણ પરિસ્થિતિ પર નજીકથી નજર રાખી રહી છે. હાલની સ્થિતિને જોતા, મધ્ય-પૂર્વમાં ગમે ત્યારે વિશાળ યુદ્ધ ભભૂકી ઉઠવાની ભીતિ વ્યક્ત કરવામાં આવી રહી છે.
