Israel Election 2026: ઈઝરાયેલમાં 27 ઓક્ટોબરે યોજાયેલી સામાન્ય ચૂંટણીનાં સત્તાવાર પરિણામોને સેન્ટ્રલ ઇલેક્શન કમિટીએ મંજૂરી આપી દીધી છે. ચૂંટણીમાં ગેરરીતિના આરોપો લગાવી રહેલા વડાપ્રધાન બેન્જામિન નેતન્યાહૂ અને તેમની લિકુડ પાર્ટીને આ નિર્ણયથી મોટો ઝટકો લાગ્યો છે. રાષ્ટ્રપતિ આઇઝેક હર્ઝોગે આરબ સમુદાયના મતદાન પર શંકા ન કરવાની અપીલ કરી છે અને ચૂંટણી પ્રક્રિયા અંગે જાતિવાદી ટિપ્પણીઓની ટીકા કરી છે. ચૂંટણીનાં પરિણામો હવે નવી સરકાર રચવાની પ્રક્રિયાનો માર્ગ ખોલશે.
રાષ્ટ્રપતિ હર્ઝોગને ચૂંટણીનાં સત્તાવાર પરિણામો સોંપ્યાં
બુધવારે, 4 નવેમ્બરે, સેન્ટ્રલ ઇલેક્શન કમિટીના અધ્યક્ષ અને સુપ્રીમ કોર્ટના જસ્ટિસ નોઆમ સોહલબર્ગે રાષ્ટ્રપતિ હર્ઝોગને ચૂંટણીનાં સત્તાવાર પરિણામો સોંપ્યાં હતાં. આ પ્રસંગે સોહલબર્ગે ચૂંટણીનાં પરિણામો પર શંકા વ્યક્ત કરવાના પ્રયાસોને લોકશાહી માટે ખતરો ગણાવ્યા હતા. તેમણે જણાવ્યું હતું કે લોકશાહીનો પાયો મતદારોની ઇચ્છાનું સન્માન અને સત્તાનું શાંતિપૂર્ણ હસ્તાંતરણ છે. તેમના જણાવ્યા અનુસાર, ગેરરીતિ અંગેની શંકાઓની તપાસ થવી જોઈએ, પરંતુ અત્યાર સુધી સામે આવેલી બાબતો પરિણામોને રોકવા કે સંસદનો કાર્યકાળ લંબાવવા માટે પૂરતી નથી.
ચૂંટણીની વિશ્વસનીયતાને અસર કરે અથવા અંતિમ પરિણામ બદલી શકે
ચૂંટણી કમિટીએ 9,069 મતદાન મથકોના રેકોર્ડની તપાસ કરી હતી. કમિટીના જણાવ્યા અનુસાર, તપાસમાં એવી કોઈ ગેરરીતિ મળી નથી જે ચૂંટણીની વિશ્વસનીયતાને અસર કરે અથવા અંતિમ પરિણામ બદલી શકે. લિકુડ પાર્ટીએ આરબ વિસ્તારોનાં મતદાન મથકો અંગે આશરે 1,200 ફરિયાદો નોંધાવી હતી. આ ફરિયાદોની તપાસ કરવામાં આવી છે. જોકે, ચૂંટણી પ્રક્રિયામાં વિદેશી હસ્તક્ષેપની શંકા અંગે શિન બેટ સુરક્ષા એજન્સી અને પોલીસની તપાસ ચાલુ છે.
વિદેશી હસ્તક્ષેપની કોઈપણ શંકાની સંપૂર્ણ તપાસ થવી જોઈએ
રાષ્ટ્રપતિ હર્ઝોગે કહ્યું કે તેમને શિન બેટ, પોલીસ અને અન્ય તપાસ એજન્સીઓ પર સંપૂર્ણ વિશ્વાસ છે અને વિદેશી હસ્તક્ષેપની કોઈપણ શંકાની સંપૂર્ણ તપાસ થવી જોઈએ. સાથે જ તેમણે ઈઝરાયેલના આરબ સમુદાયને નિશાન બનાવતી જાતિવાદી ટિપ્પણીઓની નિંદા કરી હતી. તેમણે કહ્યું કે આરબ નાગરિકોના મતદાન પર એ જ રીતે શંકા ન કરવી જોઈએ, જે રીતે અન્ય કોઈ સમુદાયના મતદારો પર શંકા કરાતી નથી. આરબ સમુદાયના દેશ અને સમાજમાં યોગદાનનું સન્માન કરવાની પણ તેમણે અપીલ કરી હતી.
કોઈ પક્ષને બહુમતી નહીં, આરબ પક્ષો કિંગમેકરની ભૂમિકામાં
ચૂંટણીનાં પરિણામો અનુસાર, નેતન્યાહૂના સમર્થક જૂથને 120 સભ્યોની નેસેટમાં 53 બેઠકો મળી છે, જ્યારે ગાદી આઈઝેનકોટના નેતૃત્વ હેઠળના વિપક્ષી જૂથને 48 બેઠકો મળી છે. આરબ પક્ષોએ રેકોર્ડ 19 બેઠકો જીતી છે. સરકાર રચવા માટે 61 બેઠકોની જરૂર હોવાથી કોઈ પણ જૂથ પાસે સ્પષ્ટ બહુમતી નથી. આ સ્થિતિમાં આરબ પક્ષો સરકાર રચવાની પ્રક્રિયામાં નિર્ણાયક ભૂમિકા ભજવી શકે છે.
સૌથી વધુ શક્યતા ધરાવતા નેતાને આમંત્રણ આપશે
હવે રાષ્ટ્રપતિ હર્ઝોગ નેસેટમાં ચૂંટાયેલા પક્ષોના પ્રતિનિધિઓ સાથે ચર્ચા કરશે અને સરકાર રચવાની સૌથી વધુ શક્યતા ધરાવતા નેતાને આમંત્રણ આપશે. પસંદ કરાયેલા નેતાને ગઠબંધન સરકાર બનાવવા માટે શરૂઆતમાં 28 દિવસનો સમય મળશે. જરૂર જણાય તો વધારાના 14 દિવસ પણ મળી શકે છે. જો કોઈ નેતા બહુમતી મેળવીને સરકાર રચવામાં નિષ્ફળ જાય, તો આવતા વર્ષની શરૂઆતમાં ઈઝરાયેલમાં ફરીથી ચૂંટણી યોજાવાની શક્યતા છે.
