Mojtaba Khamenei Statement on Iran US Ceasefire: અમેરિકા અને ઈરાન વચ્ચે બે અઠવાડિયાનું સીઝફાયર છતાં તણાવ યથાવત છે. ઈરાને પોતાની સેનાને ફાયરિંગ બંધ કરવાનો આદેશ આપ્યો છે, પરંતુ સાથે ચેતવણી આપી છે કે આ યુદ્ધનો અંત નથી અને કોઈ પણ ઉશ્કેરણીનો પૂરી તાકાતથી જવાબ આપવામાં આવશે.
'આ યુદ્ધનો અંત નથી', ઈરાને ચેતવણી આપી
અમેરિકા અને ઈરાન વચ્ચે બે અઠવાડિયાનું સીઝફાયર જાહેર થયા પછી તણાવ થોડો ઓછો થયો છે, પરંતુ જોખમ હજુ ટળ્યું નથી. ઈરાને પોતાની સેનાને ગોળીબારી બંધ કરવાનો આદેશ આપ્યો છે, પરંતુ સાથે જ સ્પષ્ટ કરી દીધું છે કે આ યુદ્ધનો અંત નથી. ઈરાને ચેતવણી આપી છે કે જો દુશ્મન કોઈ ભૂલ કરશે, તો તેનો પૂરી તાકાતથી જવાબ આપવામાં આવશે. ઈરાનના સર્વોચ્ચ નેતા મોજતબા ખામેનેઈએ તમામ સૈન્ય એકમોને સીઝફાયરનું પાલન કરીને ફાયરિંગ બંધ રાખવાનો આદેશ આપ્યો છે. આ નિવેદન સરકારી પ્રસારણ માધ્યમ દ્વારા જાહેર કરવામાં આવ્યું હતું. તેમણે કહ્યું કે, "આ યુદ્ધનો અંત નથી, પરંતુ તમામ સેનાઓએ આદેશનું પાલન કરવું પડશે અને ગોળીબાર બંધ રાખવો પડશે."
'હાથ ટ્રિગર પર જ રહેશે'
સીઝફાયર જાહેર થયા પછી ઈરાનની સર્વોચ્ચ રાષ્ટ્રીય સુરક્ષા પરિષદે પણ કડક નિવેદન આપ્યું છે. તેમાં કહેવામાં આવ્યું છે કે, યુદ્ધવિરામનો અર્થ એ નથી કે યુદ્ધ સમાપ્ત થઈ ગયું છે. ઈરાને સ્પષ્ટ કર્યું છે કે, તેની સેના સંપૂર્ણ રીતે સતર્ક છે અને જરૂર પડે તો તરત જ જવાબ આપશે. ઈરાને ચેતવણી આપી છે કે જો અમેરિકા અથવા ઇઝરાયલ તરફથી કોઈ આક્રમક પગલું લેવામાં આવશે, તો તેનો પૂરી તાકાતથી જવાબ આપવામાં આવશે.
અમેરિકા અને ઇઝરાયલના સંયુક્ત હુમલાથી થઈ હતી યુદ્ધની શરૂઆત
આ સંઘર્ષની શરૂઆત 28 ફેબ્રુઆરીએ અમેરિકા અને ઇઝરાયલના સંયુક્ત હુમલાથી થઈ હતી. આ હુમલામાં ઈરાનના સર્વોચ્ચ નેતા આયાતુલ્લા અલી ખામેનેઈનું મોત થયું હતું. લગભગ 39 દિવસથી ચાલી રહેલા આ યુદ્ધમાં ઘણા દેશોમાં લોકોના જીવ ગયા છે અને પરિસ્થિતિ ખૂબ ગંભીર રહી છે. ઈરાને પોતાના નાગરિકોના બલિદાનની પ્રશંસા કરતાં જણાવ્યું કે, આ યુદ્ધમાં તેણે પોતાના મોટા ભાગના લક્ષ્યો હાંસલ કર્યા છે અને દુશ્મનને નબળો બનાવ્યો છે.
ઈરાનની 10 મુદ્દાની શરતો
અમેરિકાએ પહેલા 15 મુદ્દાનો પ્રસ્તાવ મૂક્યો હતો, જેના જવાબમાં ઈરાને 10 મુદ્દાનો પ્રસ્તાવ આપ્યો છે, જે હવે વાતચીતનો આધાર બન્યો છે. આ શરતોમાં હોર્મુઝ સ્ટ્રેટમાં નિયંત્રિત અવરજવર, વિસ્તારમાંથી અમેરિકી સેનાને પાછી ખેંચવી, ઈરાન પર લાગેલા બધા પ્રતિબંધો દૂર કરવાના અને વિદેશોમાં અટવાયેલી સંપત્તિ પરત આપવાના મુદ્દાઓનો સમાવેશ થાય છે. આ સિવાય ઈરાને યુદ્ધમાં થયેલા નુકસાનની ભરપાઈ કરવાની અને આ તમામ શરતોને સંયુક્ત રાષ્ટ્ર સુરક્ષા પરિષદના ઠરાવ તરીકે મંજૂરી આપવાની માંગ પણ કરી છે.
ઈરાને પોતાના લોકો પાસે એકતા જાળવવાની અપીલ કરી
ઈરાને ખાતરી આપી છે કે અમેરિકા સાથેની વાતચીત પાકિસ્તાનની રાજધાની ઇસ્લામાબાદમાં 10 એપ્રિલથી શરૂ થશે. આ વાતચીત બે અઠવાડિયા સુધી ચાલશે અને જરૂર પડે તો તેને આગળ વધારી શકાય છે. ઈરાને પોતાના લોકો પાસે એકતા જાળવવાની અપીલ કરી છે અને આ સીઝફાયરને સંભવિત ઐતિહાસિક જીત તરફનું એક પગલું ગણાવ્યું છે.
ટ્રમ્પનું નિવેદન
અમેરિકાના રાષ્ટ્રપતિ ડોનાલ્ડ ટ્રમ્પે પણ આ સીઝફાયરને મોટી સિદ્ધિ ગણાવી છે. તેમણે કહ્યું કે, અમેરિકાએ પોતાના સૈન્ય લક્ષ્યો મોટા ભાગે હાંસલ કરી લીધા છે. ટ્રમ્પે તે પણ જણાવ્યું કે, ઈરાનનો 10 મુદ્દાનો પ્રસ્તાવ વાતચીત માટે સારો આધાર છે અને તેનાથી સ્થાયી શાંતિનો માર્ગ ખુલ્લો પડી શકે છે. જોકે તેમણે સ્પષ્ટ કર્યું કે આ સીઝફાયર ત્યારે જ ચાલુ રહેશે જ્યારે ઈરાન હોર્મુઝ સ્ટ્રેટને સંપૂર્ણ રીતે, સુરક્ષિત અને તરત જ ખોલવા માટે તૈયાર થશે.
