PM Modi Reform Express: સંસદનું બજેટ સત્ર આજે શરૂ થયું છે, જેની શરૂઆત રાષ્ટ્રપતિ દ્રૌપદી મુર્મૂના બંને સદનોના સંયુક્ત સંબોધનથી થઈ હતી. સત્ર શરૂ થતાં પહેલાં વડાપ્રધાન નરેન્દ્ર મોદીએ મીડિયા સાથે વાત કરતા સરકારની નીતિને 'રિફોર્મ, પરફોર્મ અને ટ્રાન્સફોર્મ' તરીકે વર્ણવી. આજે નાણાંમંત્રી નિર્મલા સીતારમણ લોકસભામાં આર્થિક સર્વે રજૂ કરશે, જ્યારે 1 ફેબ્રુઆરીએ તેઓ સતત નવમું કેન્દ્રીય બજેટ 2026 રજૂ કરશે.
આ સત્ર ખૂબ જ મહત્વપૂર્ણ છે: PM મોદી
PM મોદીએ કહ્યું, "સત્રની શરૂઆતમાં રાષ્ટ્રપતિએ સાંસદો પાસેથી જે અપેક્ષાઓ વ્યક્ત કરી છે, મને વિશ્વાસ છે કે સાંસદોએ તેને ગંભીરતાથી લીધી હશે." તેમણે વધુમાં કહ્યું, "આ સત્ર ખૂબ જ મહત્વપૂર્ણ છે. 21મી સદીનો એક ચોથો ભાગ પસાર થઈ ગયો છે અને હવે બીજા ચોથા ભાગની શરૂઆત થઈ રહી છે. '2047 વિકસિત ભારત' ના લક્ષ્યને પ્રાપ્ત કરવા માટેના મહત્વપૂર્ણ 25 વર્ષોની શરૂઆત થઈ ચૂકી છે. આવનારું ભવિષ્ય ખૂબ જ ઉજ્જ્વળ છે."
PM મોદીએ ભારત અને EU ટ્રેડ ડીલનો ઉલ્લેખ કર્યો
વડાપ્રધાને જણાવ્યું, "આ બીજા ક્વાર્ટરનું પહેલું બજેટ છે. નિર્મલા સીતારમણ પહેલા મહિલા નાણાંમંત્રી છે, જે સતત નવમી વાર દેશના સંસદમાં બજેટ રજૂ કરવા જઈ રહ્યા છે. આ ગૌરવની ક્ષણ છે." PM મોદીએ ભારત અને યુરોપિયન યુનિયન વચ્ચે થયેલી ફ્રી ટ્રેડ ડીલનો ઉલ્લેખ કરતા કહ્યું કે, આ વર્ષની શરૂઆત સકારાત્મક નોંધ સાથે થઈ છે. તેમણે કહ્યું કે, "ભારત અને EU વચ્ચેનો કરાર આ વાતનો સંકેત આપે છે કે આવનાર સમય કેટલી ઉજ્જ્વળ દિશામાં આગળ વધી રહ્યો છે."
સર્વોત્તમ ગુણવત્તા સાથે બજારમાં જાઓ...
PMએ કહ્યું, "આપણાં દેશના ઉત્પાદકો આ તકનો ઉપયોગ પોતાની ક્ષમતાઓ વધારવા માટે કરશે. તેઓ આને માત્ર એ રીતે ન જુએ કે મોટું બજાર ખુલ્યું છે અને હવે આપણો માલ સસ્તામાં પહોંચશે. આ એક તક છે, તેથી ગુણવત્તા પર ભાર આપો. શ્રેષ્ઠ ગુણવત્તા સાથે બજારમાં જાઓ. તે EUના 27 દેશોના ખરીદદારોનું દિલ જીતશે. તેનો પ્રભાવ લાંબા સમય સુધી રહેશે. આ ઉત્પાદક ભારતની દિશામાં મોટું પગલું છે. દેશનું ધ્યાન હવે બજેટ તરફ હોવું જોઈએ. અમારી સરકારની નીતિ છે, રિફોર્મ, પરફોર્મ અને ટ્રાન્સફોર્મ, અને હવે અમે રિફોર્મ એક્સપ્રેસ પર આગળ વધી રહ્યા છીએ."
1 ફેબ્રુઆરીએ નિર્મલા સીતારમણ બજેટ રજૂ કરશે
નાણાંમંત્રી નિર્મલા સીતારમણ આજે લોકસભામાં ભારતનો આર્થિક સર્વે રજૂ કરશે. આર્થિક સર્વે દેશની અર્થવ્યવસ્થાનું વ્યાપક મૂલ્યાંકન રજૂ કરે છે અને બજેટ પહેલાં મહત્વપૂર્ણ માહિતી આપે છે. નાણાંમંત્રી નિર્મલા સીતારમણ 1 ફેબ્રુઆરીએ લોકસભામાં કેન્દ્રીય બજેટ 2026 રજૂ કરશે. આ તેમનું સતત નવમું બજેટ હશે અને વૈશ્વિક અનિશ્ચિતતાઓ વચ્ચે આર્થિક વિકાસને વેગ આપવા માટે તેમાં સુધારાત્મક પગલાં સામેલ થવાની શક્યતા છે.
VB-G RAM-G બિલ અને SIR પર ચર્ચાની માંગ
વિપક્ષી દળોએ બજેટ સત્ર દરમિયાન VB-G RAM-G બિલ અને SIR જેવા મુદ્દાઓ પર ચર્ચાની માંગ કરી છે, પરંતુ કેન્દ્રીય મંત્રી કિરણ રિજિજુએ જણાવ્યું છે કે, આ મુદ્દાઓ શિયાળુ સત્રમાં પહેલેથી જ ઉઠાવવામાં આવી ચૂક્યા છે અને આ સત્રમાં તેના પર કોઈ ચર્ચા નહીં થાય.
