INDIA bloc meeting Delhi: રાષ્ટ્રીય રાજધાની દિલ્હીમાં વિપક્ષી 'INDIA' ગઠબંધનની એક અત્યંત મહત્વપૂર્ણ અને બેઠક મળી હતી, જેમાં દેશની ચૂંટણી પ્રણાલી અને ચૂંટણી પંચની કામકાજ શૈલી પર ગંભીર ચિંતાઓ વ્યક્ત કરવામાં આવી હતી. કોંગ્રેસ અધ્યક્ષ મલ્લિકાર્જૂન ખરગેએ સ્પષ્ટ શબ્દોમાં જણાવ્યું કે, મુખ્ય ચૂંટણી કમિશનર (CEC) જ્ઞાનેશ કુમારની અખંડિતતા અને ઈરાદાઓ પર હવે ગંભીર સવાલો ઊભા થઈ રહ્યા છે, કારણ કે તેમના જ બે સહયોગી સભ્યોએ 10 મહિનામાં 14 વાર પત્રો લખીને વિરોધ નોંધાવ્યો છે. આ સ્થિતિમાં તેમને તાત્કાલિક તેમના પદ પરથી હટાવી દેવા જોઈએ.
મતદાર યાદીમાં પારદર્શિતા અને SIR પ્રક્રિયા પર સવાલો
વિપક્ષી બેઠકમાં વિશેષ સઘન પુનરીક્ષણ (SIR) અને મતદાર યાદીમાં કરવામાં આવેલા ફેરફારોને લઈને ઉગ્ર ચર્ચા થઈ હતી. મલ્લિકાર્જૂન ખડગેએ માંગ કરી હતી કે, મતદાર યાદીમાં થતા દરેક ફેરફારમાં સંપૂર્ણ પારદર્શિતા હોવી અનિવાર્ય છે. તેમણે દાવો કર્યો હતો કે, SIR પ્રક્રિયાના નામે લાખો કરોડો મતદારોના નામ યાદીમાંથી હટાવી દેવામાં આવ્યા છે, જેના કારણે અસલી અને પાત્ર મતદારો પણ પોતાના મતાધિકારથી વંચિત રહેવાનું જોખમ ઊભું થયું છે. વિપક્ષની માંગ છે કે, આગામી તમામ ચૂંટણીઓમાં SIR પ્રક્રિયા પહેલાની જ મતદાર યાદીનો ઉપયોગ કરવામાં આવે.
EVMની જગ્યાએ બેલેટ પેપરથી મતદાન કરવાની માંગ
બેઠકમાં ચૂંટણી પ્રક્રિયાની વિશ્વસનીયતા પર ભાર મૂકતા ખડગેએ પુનરોચ્ચાર કર્યો હતો કે "એક વ્યક્તિ, એક વોટ, એક મૂલ્ય" એ ભારતીય લોકશાહીનો મુખ્ય પાયો છે અને તેને કોઈપણ ભોગે નબળો પડવા દેવામાં આવશે નહીં. વિપક્ષી ગઠબંધને એકસૂરે માંગ કરી છે કે, લોકશાહીને બચાવવા માટે હવે ભવિષ્યની ચૂંટણીઓમાં ઇલેક્ટ્રોનિક વોટિંગ મશીન (EVM) ના બદલે પરંપરાગત બેલેટ પેપર દ્વારા જ મતદાન કરાવવું જોઈએ.
19 વિપક્ષી પક્ષોની બેઠક અને સંસદમાં હિલચાલ
દિલ્હીમાં યોજાયેલી આ બેઠકમાં કોંગ્રેસ સહિત કુલ 19 વિપક્ષી પક્ષોના દિગ્ગજ નેતાઓ સામેલ થયા હતા. આ બેઠકમાં લોકસભામાં વિપક્ષના નેતા રાહુલ ગાંધી, કોંગ્રેસ નેતા કે.સી. વેણુગોપાલ, તૃણમૂલ કોંગ્રેસ (TMC)ના પ્રમુખ મમતા બેનર્જી સહિત ડાબેરી પક્ષો અને અન્ય સહયોગી દળોના પ્રતિનિધિઓએ હાજરી આપી હતી. સૂત્રોના જણાવ્યા અનુસાર, વિપક્ષી ગઠબંધન સંસદના આગામી સત્રમાં CEC જ્ઞાનેશ કુમાર વિરુદ્ધ મહાભિયોગ કે હટાવવા સંબંધી પ્રસ્તાવ લાવવા માટે નોટીસ તૈયાર કરી રહ્યું છે.
વધારાની માહિતી
ડાબેરી પક્ષોનું પ્રદર્શન: તાજેતરમાં જ સીપીઆઈ(એમ) અને અન્ય ડાબેરી નેતાઓએ ચૂંટણી પંચની મુખ્યાલય બહાર વિરોધ પ્રદર્શન કરીને CEC નીકાળવાની માંગ સાથે ઉગ્ર આંદોલન શરૂ કર્યું છે.
વિપક્ષી એકતા: જોકે કેટલાક પ્રાદેશિક પક્ષો સીધી રીતે INDIA ગઠબંધનનો હિસ્સો નથી, પરંતુ ચૂંટણી પંચની સ્વાયત્તતા અને પારદર્શિતાના મુદ્દે તેઓ પણ સંસદમાં વિપક્ષીસૂરને સમર્થન આપવા તૈયાર દેખાઈ રહ્યા છે.
