Rohini Jail Attack: દેશની રાજધાની દિલ્હીમાં હાઈ-સિક્યોરિટી ગણાતી તિહાર જેલ સંકુલ હેઠળ આવતી રોહિણી જેલમાં એક અત્યંત ચોંકાવનારી ઘટના સામે આવી છે. જેલની ચાર દીવાલો વચ્ચે સુરક્ષા વ્યવસ્થાને પડકાર ફેંકીને કેટલાક કેદીઓએ એક કાચા કામના કેદી પર ધાતક હથિયારો વડે હિંસક હુમલો કર્યો હતો. અચાનક થયેલા આ લોહિયાળ હુમલાને કારણે જેલ સ્ટાફ અને અન્ય કેદીઓમાં ભારે અફરાતફરી તેમજ ભયનો માહોલ સર્જાયો હતો.
બપોરના સમયે જેલ પરિસરમાં ભયાનક નાસભાગ
મળતી માહિતી મુજબ, આ સનસનાટીભરી ઘટના રવિવારે બપોરે લગભગ 12.00 વાગ્યાના સુમારે બની હતી. જેલ પરિસરમાં સામાન્ય દિવસની જેમ કેદીઓની અવરજવર ચાલુ હતી, તેવામાં અચાનક જ કોઈ બાબતે ઝઘડો ઉગ્ર બન્યો હતો. જૂથ અથડામણ જેવા વાતાવરણ વચ્ચે કેટલાક શખ્સોએ ધારદાર અને તીક્ષ્ણ હથિયારો વડે નિર્ધારિત કેદીને લક્ષ્ય બનાવી તેના પર ઉપરાઉપ્રી વાર કર્યા હતા. હુમલાના કારણે સમગ્ર જેલ પરિસરમાં સન્નાટો અને ડર વ્યાપી ગયો હતો.
લોહીલુહાણ હાલતમાં હોસ્પિટલ ખસેડાયો
હુમલાના પગલે જેલના સિક્યોરિટી ગાર્ડ્સ તાત્કાલિક સ્થળ પર પહોંચી ગયા હતા. કેદી ગંભીર રીતે ઈજાગ્રસ્ત અને લોહીલુહાણ હાલતમાં જમીન પર ઢળી પડ્યો હતો. જેલ પ્રશાસને વિલંબ કર્યા વગર તેને તાબડતોબ જેલની બહાર આવેલી નજીકની હોસ્પિટલમાં સારવાર અર્થે ખસેડ્યો હતો. જોકે, શરીર પર ઊંડા ઘા અને વધુ પડતું લોહી વહી જવાના કારણે ડોક્ટરોના તમામ પ્રયાસો છતાં સારવાર દરમિયાન કેદીનું કરૂણ મોત નીપજ્યું હતું.
મૃતક કેદી અને ગુનાહિત પૃષ્ઠભૂમિ
પ્રાથમિક તપાસમાં બહાર આવેલી વિગતો અનુસાર, મૃતક કેદી આર્મ્સ એક્ટ (ગેરકાયદેસર હથિયાર રાખવાના કેસ) હેઠળ રોહિણી જેલમાં કાચા કામના કેદી તરીકે બંધ હતો. તેની સામે કાયદાકીય કાર્યવાહી ચાલી રહી હતી. જેલની અંદર તેની સાથે થયેલી આ હિંસક ઘટનાએ જેલની અંદર હથિયારો કેવી રીતે પહોંચ્યા અથવા બનાવવામાં આવ્યા તે અંગે અનેક ગંભીર પ્રશ્નો ઊભા કર્યા છે.
ગેંગવોરનો ઇનકાર પરંતુ ઉચ્ચ સ્તરીય તપાસ શરૂ
આ ઘટનાને પગલે જેલ તંત્રમાં ભારે હડકંપ મચી ગયો છે. જેલના ઉચ્ચ અધિકારીઓએ આ મામલે સ્પષ્ટતા કરતા જણાવ્યું છે કે આ ઘટના કોઈ બે વ્યાવસાયિક ગેંગ વચ્ચેનો ગેંગવોર નથી, પરંતુ આંતરિક મતભેદ કે ત્વરિત બોલાચાલીનું પરિણામ હોઈ શકે છે. તેમ છતાં, ઘટનાની ગંભીરતાને ધ્યાનમાં રાખીને જેલ પ્રશાસને આંતરિક તપાસના આદેશ આપ્યા છે. હુમલામાં સામેલ તમામ કેદીઓની ઓળખ કરી તેમની સામે કડક કાનૂની કાર્યવાહી કરવાની પ્રક્રિયા હાથ ધરવામાં આવી છે.
