Uddhav Thackeray Dussehra Rally Speech : શિવસેના (UBT)ના વડા અને મહારાષ્ટ્રના પૂર્વ મુખ્યમંત્રી ઉદ્ધવ ઠાકરેએ દશેરા રેલી દરમિયાન રાજ્ય સરકાર અને ભાજપ સામે આક્રમક તેવર અપનાવ્યા છે. મુંબઈના ઐતિહાસિક શિવાજી પાર્ક ખાતે યોજાયેલી આ ભવ્ય રેલીમાં તેમણે કાયદો-વ્યવસ્થા, ગુનાખોરી અને વિવાદાસ્પદ મુદ્દાઓ પર સરકારને ઘેરી હતી. આ ભાષણ બાદ રાજ્યનું રાજકીય વાતાવરણ ફરી એકવાર ગરમાયું છે અને ચર્ચાઓનો દોર શરૂ થઈ ગયો છે.
સાબરમતી જેલ અને લોરેન્સ બિશ્નોઈનો મુદ્દો
રેલીને સંબોધતા ઉદ્ધવ ઠાકરેએ ગેંગસ્ટર લોરેન્સ બિશ્નોઈના મામલે મહારાષ્ટ્રના નાયબ મુખ્યમંત્રી દેવેન્દ્ર ફડણવીસને સીધો પડકાર ફેંક્યો હતો. તેમણે કહ્યું હતું કે સાબરમતી જેલમાં બંધ લોરેન્સ બિશ્નોઈના સાગરીતો પાસે 70 હજાર જેટલા શૂટરો હોવાનો દાવો કરવામાં આવે છે. ઠાકરેએ ફડણવીસને પડકાર આપતા જણાવ્યું હતું કે જો તમારામાં સાચે જ હિંમત હોય, તો સાબરમતી જેલમાં જઈને દિલ્હીમાં બેઠેલા તમારા બોસની સામે આ ગેંગસ્ટરને બહાર કાઢીને બતાવો. આટલું કર્યા પછી જ મોટી-મોટી વાતો શોભે છે. તેમણે કેન્દ્રની ભાજપ સરકાર અને વડાપ્રધાન નરેન્દ્ર મોદી પર પણ આકરા કટાક્ષ કર્યા હતા.
મહારાષ્ટ્રની કાયદો અને વ્યવસ્થા પર સવાલો
રાજ્યમાં કાયદો અને વ્યવસ્થાની સ્થિતિ વિશે વાત કરતા ઠાકરેએ સરકારની કામગીરી સામે ગંભીર સવાલો ઉઠાવ્યા હતા. તાજેતરમાં અભિનેતા ટાઇગર શ્રોફ પર થયેલા હુમલાનો ઉલ્લેખ કરતા તેમણે જણાવ્યું કે હુમલો થતાં જ મુખ્યમંત્રી તાત્કાલિક અભિનેતાને મળવા દોડી ગયા હતા. પરંતુ માત્ર પોલીસ આરોપીઓને પકડી લે એટલાથી જ સરકારની પીઠ થાબડી શકાય નહીં. તેમણે સવાલ કર્યો હતો કે જો આ હુમલામાં ગોળી જીવલેણ સાબિત થઈ હોત અને તે પછી આરોપી પકડાયા હોત, તો તેનો શું ફાયદો થાત? સુરક્ષા વ્યવસ્થા હોવા છતાં હુમલાખોરો અંદર સુધી કેવી રીતે પહોંચી ગયા, તે અંગે તેમણે સરકારની ટીકા કરી હતી અને લોકોની સુરક્ષા કરતાં પોતાની છબી ચમકાવા પર વધુ ધ્યાન અપાતું હોવાનો આક્ષેપ કર્યો હતો.
'અર્બન નક્સલવાદ'ના દાવા સામે વિરોધ
રાજ્ય સરકારે હાઇકોર્ટમાં રજૂ કરેલા સોગંદનામામાં મહારાષ્ટ્રને 'અર્બન નક્સલીઓ'નો ગઢ ગણાવ્યો હતો, જેની સામે પણ ઉદ્ધવ ઠાકરેએ આકરો વાંધો વ્યક્ત કર્યો હતો. તેમણે પ્રશ્ન કર્યો હતો કે આખરે મહારાષ્ટ્રના શહેરોમાં અર્બન નક્સલવાદ ક્યાં છુપાયેલો છે? તેમણે દાવો કર્યો હતો કે ઉત્તર પ્રદેશ જેવા અન્ય રાજ્યોમાંથી ગુનેગારો આવીને મહારાષ્ટ્રમાં અપરાધ કરી રહ્યા છે. શાંતિપૂર્ણ વિરોધ પ્રદર્શનોમાં ભાગ લેનારા યુવાનોને નક્સલીઓ ગણાવવાની માનસિકતાની તેમણે ઝાટકણી કાઢી હતી.
રસ્તા પર લડતા યુવાનો નક્સલી નહીં પણ ક્રાંતિકારી છે
પોતાના સંબોધનને આગળ વધારતા ઠાકરેએ સ્પષ્ટ શબ્દોમાં કહ્યું કે રસ્તાઓ પર અને જંતર-મંતર જેવા સ્થળોએ સરકાર વિરુદ્ધ વિરોધ નોંધાવતા યુવાનો કોઈ નક્સલી નથી, પરંતુ દેશના સાચા ક્રાંતિકારીઓ છે. તેમણે યુવા પ્રદર્શનકારી અભિજિત દિપકે અને અન્ય યુવાનો સાથે થયેલી પોતાની મુલાકાતનો ઉલ્લેખ કર્યો હતો. ઠાકરેએ જણાવ્યું કે આ વિરોધ પ્રદર્શનો છેલ્લા 12 વર્ષથી યુવાનોના મનમાં જમા થયેલા ભારે રોષ અને ગુસ્સાનું જ પરિણામ છે. સરકારે યુવાનોના અવાજને દબાવવાને બદલે તેમની સમસ્યાઓ સાંભળવી જોઈએ.
