Houthi Attacks Saudi Arabia: યમનના હૂથી વિદ્રોહીઓએ સાઉદી અરેબિયા પર ફરી હુમલો કર્યો હોવાનો દાવો કર્યો છે. હૂથીઓના જણાવ્યા અનુસાર, દક્ષિણ-પશ્ચિમ સાઉદી અરેબિયાના ખમીસ મુશૈત વિસ્તારમાં ડઝનેક મિસાઇલ અને ડ્રોનથી હુમલો કરવામાં આવ્યો હતો. આ હુમલામાં એક સૈન્ય એરબેઝને નિશાન બનાવવામાં આવ્યો હોવાનો પણ દાવો કરવામાં આવ્યો છે.
હુમલામાં નાગરિકો ઇજાગ્રસ્ત, અનેક વિસ્તારોમાં એલર્ટ
હુમલામાં 13 નાગરિકો ઇજાગ્રસ્ત થયા હોવાના અહેવાલ સામે આવ્યા છે. જો, કે સાઉદી સિવિલ ડિફેન્સે બાદમાં સ્થિતિ નિયંત્રણમાં હોવાનું જણાવ્યું હતું. સુરક્ષાને ધ્યાનમાં રાખીને ખમીસ મુશૈત, આભા અને તાઇફ સહિતના દક્ષિણી વિસ્તારોમાં ઈમરજન્સી એલર્ટ જાહેર કરવામાં આવ્યા હતા. જેદ્દાહ અને જાઝાન જેવા મહત્વના શહેરોમાં પણ સુરક્ષા વ્યવસ્થા વધારવામાં આવી હતી.
લાલ સમુદ્ર વિસ્તારમાં સાયરન, જેદ્દાહ એરપોર્ટ પર અસર
સાઉદી સિવિલ ડિફેન્સે લાલ સમુદ્રના તટીય વિસ્તારમાં આવેલા યનબૂ અને તાઇફમાં ખતરાના સાયરન વાગ્યાની પુષ્ટિ કરી હોવાનું જણાવાયું છે. હુમલાની ગંભીરતાને ધ્યાનમાં રાખીને જેદ્દાહ એરપોર્ટ પર કેટલીક ઉડાનોને અસ્થાયી રીતે રોકવામાં આવી હોવાના અહેવાલ છે. બીજી તરફ, રિયાધમાં સુરક્ષા સ્થિતિ અંગે ઉચ્ચ સ્તરીય બેઠકોનો દોર ચાલી રહ્યો છે.
સાઉદી એર સ્ટ્રાઈકના જવાબમાં હુમલાનો દાવો
હૂથીઓએ પોતાના તાજેતરના હુમલાને સાઉદી અરેબિયાની યમનમાં કરવામાં આવેલી એર સ્ટ્રાઈકનો જવાબ ગણાવ્યો છે. તાજેતરની સાઉદી કાર્યવાહી દરમિયાન વિમાન હેંગર, રડાર સિસ્ટમ, રનવે અને ગોળા-બારૂદના ડેપોને નિશાન બનાવવામાં આવ્યા હોવાનો અહેવાલ છે. ત્યારબાદ હૂથીઓ તરફથી પલટવાર કરવામાં આવ્યો હોવાનો દાવો કરવામાં આવ્યો છે.
ઓઇલ સપ્લાય પર પણ વધી શકે છે દબાણ
લાલ સમુદ્રના પ્રવેશદ્વાર નજીકની હૂથી ગતિવિધિઓથી સાઉદી અરેબિયાની ઓઇલ સપ્લાયને લઈને પણ ચિંતા વધી છે. અગાઉના એક હવાઈ હુમલામાં સાઉદી અરેબિયાની ઈસ્ટ-વેસ્ટ પાઇપલાઇનને નુકસાન પહોંચતાં તેની કામગીરી પ્રભાવિત થઈ હતી. જો પાઇપલાઇન લાંબા સમય સુધી બંધ રહે તો વૈશ્વિક ઓઇલ સપ્લાય પર અસર થવાની આશંકા છે, જેના કારણે ક્રૂડ ઓઇલના ભાવમાં પણ વધારો જોવા મળી શકે છે.
ટ્રમ્પની પ્રતિક્રિયા, સાઉદી ક્રાઉન પ્રિન્સે અમેરિકન કમાન્ડર સાથે કરી મુલાકાત
અમેરિકાએ અત્યાર સુધી સાઉદી અરેબિયાની સીધી સૈન્ય કાર્યવાહીની માંગ સ્વીકારી નથી અને ગુપ્તચર સહાય પૂરી પાડી રહી હોવાનું જણાવાયું છે. અમેરિકન પ્રમુખ ડોનાલ્ડ ટ્રમ્પે કહ્યું હતું કે હૂથીઓએ પણ અમેરિકાને આ સંઘર્ષથી દૂર રહેવાની ચેતવણી આપી છે. આ દરમિયાન સાઉદી ક્રાઉન પ્રિન્સ મોહમ્મદ બિન સલમાને જેદ્દાહમાં અમેરિકન ક્ષેત્રીય કમાન્ડર એડમિરલ બ્રેડ કૂપર સાથે મુલાકાત કરી હતી અને બંને વચ્ચે સુરક્ષા સ્થિતિ અંગે ચર્ચા થઈ હતી.
