Bhagwant Mann turban remark: પંજાબના મુખ્યમંત્રી ભગવંત માનના પાઘડી અંગેના નિવેદનને લઈને હરિયાણાના મુખ્યમંત્રી નાયબ સિંહ સૈનીએ તીખી પ્રતિક્રિયા આપી છે. ચંડીગઢમાં મીડિયા સાથે વાતચીત દરમિયાન સૈનીએ કહ્યું કે પાઘડી માત્ર પહેરવેશ નથી, પરંતુ ગુરુઓની પરંપરા, આસ્થા અને સન્માન સાથે જોડાયેલું પવિત્ર પ્રતિક છે. તેમણે ભગવંત માનને પોતાના નિવેદન બદલ ગુરુદ્વારે જઈને માફી માંગવાની પણ અપીલ કરી છે.
ભગવંત માનના તાજેતરના નિવેદન અંગે સૈનીનો અભિપ્રાય
ચંડીગઢમાં યોજાયેલા એક કાર્યક્રમ દરમિયાન નાયબ સિંહ સૈનીની હાજરીમાં કેટલાક નેતાઓ ભાજપમાં જોડાયા હતા. કાર્યક્રમ પૂર્ણ થયા બાદ મીડિયાએ ભગવંત માનના તાજેતરના નિવેદન અંગે સૈનીનો અભિપ્રાય પૂછ્યો હતો. જવાબમાં તેમણે પાઘડી અંગે કરવામાં આવેલી ટિપ્પણીને દુર્ભાગ્યપૂર્ણ ગણાવી હતી અને કહ્યું હતું કે આવી ધાર્મિક પરંપરા સાથે જોડાયેલા પ્રતિક અંગેની ટિપ્પણીથી લોકોની લાગણીઓને ઠેસ પહોંચી શકે છે.
ગુરુઓ પ્રત્યેના સન્માન, શ્રદ્ધા, વિશ્વાસ અને ગૌરવનું પ્રતીક
સૈનીએ જણાવ્યું કે પાઘડી શીખ પરંપરામાં ગુરુઓ પ્રત્યેના સન્માન, શ્રદ્ધા, વિશ્વાસ અને ગૌરવનું પ્રતીક છે. તેમના મતે ગુરુઓએ સમાજને જે સંસ્કાર અને પરંપરાઓ આપી છે, તેના આધારે લોકો અને સરકાર આગળ વધી રહ્યા છે. તેમણે કહ્યું કે જો કોઈ વ્યક્તિ આવી પવિત્ર પરંપરા અંગે અપમાનજનક ટિપ્પણી કરે તો પોતાની ભૂલ સ્વીકારી જાહેરમાં માફી માંગવી જોઈએ.
પંજાબની જનતા સમક્ષ પણ માફી માંગવાની અપીલ કરી
હરિયાણાના મુખ્યમંત્રીએ ભગવંત માનને માત્ર ગુરુઓ પ્રત્યે જ નહીં, પરંતુ પંજાબની જનતા સમક્ષ પણ માફી માંગવાની અપીલ કરી છે. સૈનીએ ગુરુઓના બલિદાનને યાદ કરતાં કહ્યું કે દેશને મળેલી સ્વતંત્રતા અને સન્માન પાછળ તેમની શહાદતનું મોટું યોગદાન છે. તેથી ગુરુઓ સાથે જોડાયેલી પરંપરાઓ અને પ્રતિકોનું સન્માન જાળવવું સૌની જવાબદારી છે. આ પ્રસંગે પંજાબ ભાજપના અધ્યક્ષ કેવલ સિંહ ઢિલ્લો સહિત અન્ય આગેવાનો પણ હાજર રહ્યા હતા.
