Israeli PM Makeup and Grooming Cost Controversy: ઈઝરાયલમાં એક તરફ સંઘર્ષ અને યુદ્ધની પરિસ્થિતિ ચાલી રહી છે, ત્યારે બીજી તરફ દેશના રાજકીય વર્તુળોમાં જાહેર જનતાના ટેક્સના નાણાંના ભવ્ય ખર્ચને લઈને નવો વિવાદ ઉભો થયો છે. ‘મુવમેન્ટ ફોર ફ્રીડમ ઓફ ઈન્ફોર્મેશન’ (FOI) દ્વારા મેળવવામાં આવેલા સત્તાવાર આંકડાઓ અનુસાર, જાન્યુઆરી 2019થી ઓગસ્ટ 2026 દરમિયાન ઈઝરાયલના વડાપ્રધાનોના હેરસ્ટાઈલિંગ, મેકઅપ અને સત્તાવાર પ્રતિનિધિત્વ પાછળ કુલ 4,70,000 યુએસ ડોલર (આશરે 4.49 કરોડ રૂપિયા)નો તોતિંગ ખર્ચ કરવામાં આવ્યો છે.
ખર્ચમાં 90 ટકા હિસ્સો માત્ર નેતન્યાહૂ દંપતીનો
જાહેર થયેલા આંકડાઓમાં સૌથી વધુ ચોંકાવનારી બાબત એ સામે આવી છે કે કુલ ગ્રૂમિંગ અને પર્સનલ કેર ખર્ચનો 90 ટકાથી વધુ હિસ્સો વર્તમાન વડાપ્રધાન બેન્જામિન નેતન્યાહૂ અને તેમના પત્ની સારા નેતન્યાહૂના નામે નોંધાયેલો છે. નેતન્યાહૂ દંપતીના આ વ્યક્તિગત દેખાવ અને સ્ટાઇલિંગ પાછળ સરકારી તિજોરીમાંથી કરોડો રૂપિયા વાપરવામાં આવ્યા હોવાનું સામે આવતાં જ ઈઝરાયલના નાગરિકો અને વિપક્ષી નેતાઓમાં ભારે અસંતોષ જોવા મળી રહ્યો છે.
પૂર્વ વડાપ્રધાનોના કાર્યકાળ સાથે સરખામણી
જ્યારે બેન્જામિન નેતન્યાહૂના આ ખર્ચની સરખામણી અન્ય પૂર્વ વડાપ્રધાનો સાથે કરવામાં આવે છે ત્યારે મોટો તફાવત સ્પષ્ટ દેખાય છે. વર્ષ 2022માં જ્યારે નાફતાલી બેનેટ અને યૈર લેપિડ વડાપ્રધાન પદ પર હતા, ત્યારે તે આખા વર્ષ દરમિયાન હેરસ્ટાઇલ અને મેકઅપ પાછળનો સંયુક્ત ખર્ચ માત્ર 84,000 શેકેલ (આશરે ₹26.34 લાખ) હતો. પરંતુ 2023માં નેતન્યાહૂ સત્તા પર પરત ફર્યા બાદ આ જ ખર્ચ સીધો ઉછળીને 3,11,000 શેકેલ (આશરે ₹97.52 લાખ) થઈ ગયો હતો. ત્યારબાદ વર્ષ 2025માં આ આંકડો વધીને રેકોર્ડબ્રેક 1,11,000 ડોલર સુધી પહોંચી ગયો હતો.
વિદેશ પ્રવાસો દરમિયાન મેકઅપનો મોંઘોદાટ ખર્ચ
માત્ર દેશની અંદર જ નહીં પરંતુ વિદેશી પ્રવાસો દરમિયાન પણ વડાપ્રધાનના લૂક અને હેરસ્ટાઈલિંગ પાછળ લાખો રૂપિયા વપરાયા છે. ફેબ્રુઆરી 2025માં નેતન્યાહૂની વોશિંગ્ટન ડીસીની માત્ર 4 દિવસની મુલાકાત દરમિયાન હેરસ્ટાઈલિસ્ટ અને મેકઅપ આર્ટિસ્ટ પાછળ આશરે 13,500 ડોલર (આશરે 11.5 લાખ રૂપિયાથી વધુ) નો ખર્ચ થયો હતો. આ ઉપરાંત, કપડાં અને હોસ્ટિંગ સહિતના સત્તાવાર પ્રતિનિધિત્વ ખર્ચમાં નેતન્યાહૂએ આ જ ગાળામાં 1,34,000 ડોલર વાપર્યા હતા, જેની સામે પૂર્વ વડાપ્રધાન બેનેટનો ખર્ચ 19,000 ડોલર અને લેપિડનો ખર્ચ માત્ર 2,600 ડોલર હતો.
પારદર્શિતા અને સરકારી ભંડોળના ઉપયોગ પર સવાલો
‘મુવમેન્ટ ફોર ફ્રીડમ ઓફ ઈન્ફોર્મેશન’ દ્વારા ડિસેમ્બર 2025માં કાનૂની લડાઈ લડ્યા બાદ જ વડાપ્રધાન કાર્યાલયે આ આંકડા જાહેર કરવા પડ્યા હતા. સુરક્ષાના કારણો દર્શાવીને મેકઅપ આર્ટિસ્ટ અને હેરડ્રેસર્સના નામ ગુપ્ત રાખવામાં આવ્યા છે. ટ્રાન્સપેરન્સી સંસ્થાઓએ સ્પષ્ટ શબ્દોમાં જણાવ્યું છે કે "સરકારી ભંડોળ એ નેતાઓની અંગત મિલકત નથી." આવી યુદ્ધજન્ય અને આર્થિક પડકારો વાળી સ્થિતિમાં ટેક્સપેયર્સના નાણાંનો આ રીતે વિલાસી ખર્ચ પારદર્શિતા અને જવાબદેહી સામે ગંભીર સવાલો ઉભા કરે છે.
