Gwalior Kissing Car Viral: મધ્ય પ્રદેશના ગ્વાલિયરમાં એક કાર તેના મોડેલ કે કિંમતને કારણે નહીં, પરંતુ તેના અનોખા દેખાવને કારણે સોશિયલ મીડિયા પર ચર્ચામાં આવી છે. કારના સમગ્ર બોડી પર લાલ લિપસ્ટિકના હજારો કિસ માર્ક્સ જોવા મળતા હતા. દાવો કરવામાં આવી રહ્યો છે, કે કાર પર આશરે 3,400 કિસના નિશાન બનાવવામાં આવ્યા હતા.
ગર્લફ્રેન્ડે સાડા ત્રણ કલાકમાં કારને 'કિસ'થી સજાવી
આ ઘટના ગ્વાલિયરના થાટીપુર વિસ્તારની હોવાનું સામે આવ્યું છે. કારના માલિકનું નામ આદિત્ય સિકરવાર હોવાનું જણાવવામાં આવે છે. અહેવાલો અનુસાર, તેની ગર્લફ્રેન્ડ એક વિદેશી સોશિયલ મીડિયા ટ્રેન્ડથી પ્રેરિત થઈ હતી અને તેણે કારને લિપસ્ટિકના કિસ માર્ક્સથી સજાવવાનો નિર્ણય લીધો હતો. આ સમગ્ર પ્રક્રિયામાં અંદાજે સાડા ત્રણથી ચાર કલાક લાગ્યા હોવાનું કહેવાય છે. કારના બાહ્ય ભાગ પર હજારો લાલ લિપસ્ટિકના નિશાન બનાવવામાં આવ્યા હતા. બાદમાં કાર રસ્તા પર જોવા મળતાં તેના ફોટા અને વીડિયો સોશિયલ મીડિયા પર વાયરલ થયા હતા.
સોશિયલ મીડિયા પરથી પોલીસે શોધી કાઢી કાર
કારની તસવીરો વાયરલ થયા બાદ મામલો ટ્રાફિક પોલીસ સુધી પહોંચ્યો હતો. પોલીસે સોશિયલ મીડિયા પર વાયરલ થયેલા ફોટા અને વીડિયોની તપાસ કરી હતી. તેમાં કારનો નંબર દેખાતા તેના આધારે વાહનની ઓળખ કરવામાં આવી હતી. ત્યારબાદ ટ્રાફિક પોલીસે થાટીપુર વિસ્તારમાંથી કારને જપ્ત કરી હતી અને તેના માલિકને પૂછપરછ માટે બોલાવ્યો હતો.
3,400 કિસ માર્ક્સ પડ્યા મોંઘા, ₹5,500નું ચલણ
પોલીસે કારના બોડી પર આ પ્રકારના નિશાન સાથે રસ્તા પર વાહન ચલાવવાને ટ્રાફિક નિયમોના ઉલ્લંઘન સાથે જોડ્યું હતું. આ મામલે કાર માલિક સામે ₹5,500નું ચલણ કરવામાં આવ્યું હતું. પોલીસની કાર્યવાહી બાદ આદિત્ય સિકરવારે કાર પરના તમામ લિપસ્ટિકના નિશાન પોતે જ સાફ કર્યા હતા. ત્યારબાદ કારને પાણીથી ધોઈને સામાન્ય સ્થિતિમાં લાવવામાં આવી હતી.
ટ્રાફિક પોલીસનું શું કહેવું છે?
ગ્વાલિયર ટ્રાફિક પોલીસના TI અભિષેક રઘુવંશીના જણાવ્યા મુજબ, સોશિયલ મીડિયા પર લિપસ્ટિકના અનેક નિશાનવાળી કારના ફોટા સામે આવ્યા હતા. તપાસ દરમિયાન કાર થાટીપુર વિસ્તારની હોવાનું જાણવા મળ્યું હતું. ત્યારબાદ કારને જપ્ત કરીને માલિકને બોલાવવામાં આવ્યો હતો. પોલીસના જણાવ્યા મુજબ, પૂછપરછ દરમિયાન માલિકે પોતાની ભૂલ સ્વીકારી અને કાર પરથી લિપસ્ટિકના નિશાન દૂર કરી દીધા હતા. ટ્રાફિક નિયમોના ઉલ્લંઘન બદલ તેના પર ₹5,500નો દંડ કરવામાં આવ્યો હતો. આ ઘટના બાદ સોશિયલ મીડિયા પર ‘કિસિંગ કાર’ની તસવીરોને લઈને લોકોમાં ભારે ચર્ચા જોવા મળી રહી છે.
