Tragedy in Belagavi: કર્ણાટકના બેલગાવી સ્થિત માર્કેટ પોલીસ સ્ટેશન હેઠળ આવતી ચાવટ ગલ્લી વિસ્તારમાં સોમવારે મોડી રાત્રે એક કાળજું કંપાવી દે તેવી દુર્ઘટના ઘટી હતી. મોડી રાત્રે જ્યારે આખો પરિવાર ગાઢ નિંદ્રામાં હતો, ત્યારે ઘરમાં રાખેલા ફ્રિજમાં અચાનક એક જોરદાર ધડાકો થયો હતો. વિસ્ફોટ એટલો તીવ્ર હતો કે ક્ષણવારમાં જ આગની જ્વાળાઓએ આખા ઘરને પોતાની ઝપેટમાં લઈ લીધું હતું. સૂતેલા પરિવારજનોને બચવા કે બહાર ભાગવાનો કોઈ મોકો જ ન મળ્યો અને આખું ઘર સ્મશાનભૂમિમાં ફેરવાઈ ગયું હતું.
ગણેશ ચતુર્થીની તૈયારીઓ વચ્ચે પરિવાર પર તૂટી પડ્યો દુઃખનો પહાડ
દુર્ઘટનાનો શિકાર બનેલો ધમોને પરિવાર ગણેશોત્સવની ઉજવણી માટે ઉત્સાહપૂર્વક તૈયારીઓ કરી રહ્યો હતો. ઘરમાં સ્થાપના માટે ગણેશજીની મૂર્તિ પણ લાવીને રાખવામાં આવી હતી અને રોશનીનું ડેકોરેશન કરવામાં આવ્યું હતું. રાત્રે પરિવારના તમામ સભ્યો ભોજન પતાવીને સૂઈ ગયા હતા. ધમોને પરિવાર સુથારીકામ અને નાના-મોટા મજૂરી કામ કરીને પોતાનું ગુજરાન ચલાવતો હતો. ગણેશજીના આગમન પહેલા જ ઘટેલી આ ઘટનાથી સમગ્ર વિસ્તારમાં ભારે અરેરાટી અને શોકનું મોજું ફરી વળ્યું છે.
મધ્યરાત્રિએ 02.15 વાગ્યે ભયાનક અવાજ અને પતરાં ઊડી ગયા
આસપાસના સ્થાનિક રહીશોના જણાવ્યા અનુસાર, રાત્રે આશરે 02.15 વાગ્યે એક મોટો ધડાકો સંભળાયો હતો. વિસ્ફોટની તીવ્રતા એટલી વધારે હતી કે ઘરના ઉપરના પતરાં સુધી ઊડી ગયા હતા. અવાજ સાંભળીને મદદ માટે દોડી આવેલા પાડોશીઓએ જોયું તો ઘર ભીષણ આગની લપેટમાં હતું. લોકોએ ભારે જહેમત ઉઠાવીને ઘરના બે પુરુષ સભ્યોને બહાર કાઢ્યા હતા, પરંતુ આગ એટલી ઝડપથી ફેલાઈ હતી કે અન્ય મહિલા સભ્યોને બહાર કાઢી શકાયા નહોતા.
પરિવારના 4 મહિલા સભ્યોના નીપજ્યા મોત, 2 લોકો જીવન-મરણ વચ્ચે
આ કાળજું કંપાવી દેનાર દુર્ઘટનામાં પરિવારના 4 મહિલા સભ્યોના ઘટનાસ્થળે જ ગંભીર રીતે દાઝી જવાથી મોત નીપજ્યા હતા. મૃતકોમાં 50 વર્ષીય ભારતી ધમોને, 45 વર્ષીય શારદા ધમોને, 25 વર્ષીય ગંગા ધમોને અને24 વર્ષીય પ્રિયા ધમોનેનો સમાવેશ થાય છે. જ્યારે 65 વર્ષીય ઘરના વડીલ ગજાનન ધમોને અને 21 વર્ષીય તેમનો પુત્ર રોશન ધમોને આશરે 60 ટકા જેટલા ગંભીર રીતે દાઝી ગયા છે. બંને ઇજાગ્રસ્તોને તાત્કાલિક ધોરણે નજીકની હોસ્પિટલમાં સારવાર અર્થે દાખલ કરવામાં આવ્યા છે.
શોર્ટ સર્કિટના કારણે વિસ્ફોટ થયાની પ્રાથમિક આશંકા
ઘટનાની જાણ થતાં જ પોલીસ કાફલો અને ફાયર બ્રિગેડની ટીમ ઘટનાસ્થળે પહોંચી ગઈ હતી. પ્રાથમિક તપાસ બાદ પોલીસ અધિકારીઓએ જણાવ્યું હતું કે, ઘરમાં કરવામાં આવેલા લાઈટિંગ ડેકોરેશન અથવા વાયરિંગમાં શોર્ટ સર્કિટના કારણે ફ્રિજના કમ્પ્રેસરમાં બ્લાસ્ટ થયો હોવાની આશંકા છે. ઘટના અંગે ગુનો નોંધીને એફએસએલ (FSL) ટીમની મદદથી વિસ્ફોટના ચોક્કસ કારણો જાણવા આગળની કાનૂની તપાસ હાથ ધરવામાં આવી છે.
