Japanese fighter jets: જાપાનના F-2 ફાઈટર જેટ્સ પ્રથમવાર ભારતીય ધરતી પર આવી રહ્યા છે. જાપાન એર સેલ્ફ-ડિફેન્સ ફોર્સના આ લડાયક વિમાનો ભારતીય વાયુસેનાના સુખોઈ Su-30MKI સાથે જોધપુરમાં સંયુક્ત હવાઈ અભ્યાસ કરશે. 'વીર ગાર્ડિયન 2026' નામનો આ અભ્યાસ ભારત અને જાપાન વચ્ચેના સૈન્ય સહયોગને વધુ મજબૂત બનાવવાની દિશામાં મહત્વપૂર્ણ માનવામાં આવી રહ્યો છે. બંને દેશો એશિયા-પેસિફિક ક્ષેત્રમાં ચીનના વધતા આક્રમક વલણ વચ્ચે વ્યૂહાત્મક સહયોગ વધારી રહ્યા છે.
સુઇકી એરબેઝથી ઓકિનાવા અને થાઈલેન્ડ થઈને જોધપુર પહોંચશે
જાપાનની સત્તાવાર જાહેરાત અનુસાર, JASDF ત્રણ F-2 ફાઈટર જેટ્સ અને 110 સૈનિકોની ટુકડી ભારત મોકલી રહી છે. આ વિમાનો જાપાનના ફુકુઓકા સ્થિત સુઇકી એરબેઝથી ઓકિનાવા અને થાઈલેન્ડ થઈને જોધપુર પહોંચશે. લાંબી મુસાફરી દરમિયાન અમેરિકી વાયુસેનાના એરિયલ રિફ્યુઅલર દ્વારા વિમાનોમાં હવામાં જ ઈંધણ ભરવામાં આવશે. 'વીર ગાર્ડિયન 2026' અભ્યાસ 9 સપ્ટેમ્બરથી 21 સપ્ટેમ્બર 2026 સુધી જોધપુર એરફોર્સ સ્ટેશન ખાતે યોજાશે.
પરસ્પર સમજણ અને વિશ્વાસ વધારવાની તક
JASDFના ચીફ ઓફ સ્ટાફ તાકેહિરો મોરીતાના જણાવ્યા મુજબ, આ અભ્યાસ બંને દેશોની વાયુસેનાઓ વચ્ચે વ્યૂહાત્મક કૌશલ્ય, પરસ્પર સમજણ અને વિશ્વાસ વધારવાની તક આપશે. સંયુક્ત અભ્યાસ દરમિયાન બંને દેશોના ફાઈટર જેટ્સ સાથે મળીને વિવિધ હવાઈ કામગીરીનો અભ્યાસ કરશે. આ પહેલા પણ ભારત અને જાપાન વચ્ચે હવાઈ સહયોગના અભ્યાસ યોજાયા છે, પરંતુ જાપાની F-2 ફાઈટર જેટ્સનું ભારતમાં આવવું ખાસ મહત્વ ધરાવે છે.
જાપાનીઝ એવિઓનિક્સનો ઉપયોગ કરવામાં આવ્યો
જાપાનનું F-2, જેને 'વાઈપર ઝીરો' તરીકે પણ ઓળખવામાં આવે છે, અમેરિકાના F-16 પરથી વિકસાવવામાં આવેલું મલ્ટીરોલ ફાઈટર જેટ છે. તેમાં એડવાન્સ્ડ AESA રડાર, કમ્પોઝિટ વિંગ્સ અને આધુનિક જાપાનીઝ એવિઓનિક્સનો ઉપયોગ કરવામાં આવ્યો છે. જાપાને આ વિમાનને ખાસ કરીને એન્ટી-શિપ ઓપરેશન્સ માટે વિકસાવ્યું છે, જેથી સમુદ્રી ક્ષેત્રમાં ઉત્તર કોરિયા અને ચીન તરફથી ઊભા થતા પડકારોનો સામનો કરી શકાય.
