Monkey Viral Video: સોશિયલ મીડિયા પર અવારનવાર અજીબોગરીબ અને ચોંકાવનારા વીડિયો વાયરલ થતા હોય છે. ત્યારે આવો જ એક કિસ્સો ઝારખંડની રાજધાની રાંચીમાંથી સામે આવ્યો હોવાનું કહેવાય છે. અહીં એક વાંદરી અચાનક દારૂની દુકાનમાં ઘૂસી ગઈ હતી અને દુકાનમાં રાખેલી દારૂની એક આખી બોટલ પી ગઈ હતી. દારૂ પીધા બાદ તેની અસર થતાં તે દુકાનના ફ્લોર પર બેભાન થઈને પડી ગઈ હતી. જોકે, થોડા સમય બાદ ભાનમાં આવ્યા પછી વાંદરીએ દુકાનમાં ભારે ઉત્પાત મચાવ્યો હતો. તેનો વીડિયો હાલ સોશિયલ મીડિયા પર ચર્ચામાં છે.
દારૂની દુકાનમાં અચાનક ઘૂસી વાંદરી
જાણકારી અનુસાર આ સમગ્ર ઘટના રાંચીના ઓરમાંઝી વિસ્તારના બ્લોક ચોક ખાતે આવેલા એક શોપિંગ કોમ્પ્લેક્સની દારૂની દુકાનમાં બની હોવાનું કહેવાય છે. ઘટના શુક્રવાર, 25 સપ્ટેમ્બરે સાંજે લગભગ 7 વાગ્યાની હોવાનું જણાવાઈ રહ્યું છે. તે સમયે દુકાનના કર્મચારીઓ પોતાના કામમાં વ્યસ્ત હતા. અચાનક એક વાંદરી કાઉન્ટરની અંદર ઘૂસી ગઈ હતી. ત્યારબાદ તેણે દુકાનમાં રાખેલી દારૂની બોટલો તરફ હાથ લંબાવ્યો અને ‘મેજિક મોમેન્ટ્સ’ની એક ક્વાર્ટર બોટલ ઉપાડી લીધી હતી. જોતજોતામાં વાંદરીએ આખી બોટલ પી લીધી હતી.
દારૂની અસર થતાં ફ્લોર પર પડી ગઈ
દારૂની બોટલ પીધા બાદ થોડા જ સમયમાં વાંદરી પર તેની અસર જોવા મળી હતી. નશાની અસર થતાં તે દુકાનના ફ્લોર પર જ બેભાન થઈને પડી ગઈ હતી. થોડો સમય સુધી તે આ જ સ્થિતિમાં રહી હતી. જોકે, ભાનમાં આવ્યા બાદ તેનું વર્તન અચાનક બદલાઈ ગયું હતું. વાંદરી દુકાનમાં આમતેમ દોડવા લાગી હતી અને આસપાસ રાખેલી દારૂની બોટલો નીચે પાડવા લાગી હતી. દુકાનમાં હાજર કર્મચારીઓએ તેને બહાર કાઢવાનો પ્રયાસ કર્યો હતો, પરંતુ તે વધુ ઉગ્ર બની ગઈ હતી.
કર્મચારીને બચકું ભરતા દોડધામ મચી
વાંદરીને દુકાનમાંથી બહાર કાઢવાનો પ્રયાસ કરવામાં આવી રહ્યો હતો ત્યારે તેણે એક કર્મચારી પર હુમલો કરી તેને બચકું ભરી લીધું હતું. આ ઘટનાને કારણે દુકાનમાં હાજર લોકોમાં ગભરાટ ફેલાઈ ગયો હતો અને દોડધામ મચી હતી. કર્મચારીઓએ કોઈક રીતે પોતાને વાંદરીથી દૂર કર્યા બાદ પોલીસને સમગ્ર ઘટનાની જાણ કરી હતી. ઘટનાનો વીડિયો સોશિયલ મીડિયા પર વાયરલ થતાં લોકો પણ આ અજીબોગરીબ બનાવને લઈને વિવિધ પ્રતિક્રિયાઓ આપી રહ્યા છે.
