F-16 Crashes: અમેરિકાના મિશિગન રાજ્યમાં ગુરુવારે ટ્રેનિંગ મિશન દરમિયાન અમેરિકન વાયુસેનાનું F-16 ફાઈટર જેટ ક્રેશ થયું હતું. જોકે, સદનસીબે પાઈલટે સમયસર ઈજેક્શન કરી લીધું હતું, જેના કારણે તેનો જીવ બચી ગયો હતો. ઈજેક્શન બાદ પાઈલટને સારવાર માટે સ્થાનિક હોસ્પિટલમાં ખસેડવામાં આવ્યો હતો. અધિકારીઓના જણાવ્યા મુજબ, પાઈલટની સ્થિતિ સ્થિર હતી અને તે હોસ્પિટલમાં પોલીસ સાથે વાતચીત કરી રહ્યો હતો.
ક્યાં અને કેવી રીતે બની ઘટના?
આ દુર્ઘટના મિશિગનના ગ્રાન્ડ ટ્રેવર્સ કાઉન્ટીના બ્લેયર ટાઉનશિપ વિસ્તારમાં બની હતી. F-16 ટેક્સાસ એર નેશનલ ગાર્ડની 149મી ફાઈટર વિંગ સાથે જોડાયેલું હતું અને અલ્પેના કોમ્બેટ રેડીનેસ ટ્રેનિંગ સેન્ટરથી ચાલી રહેલા નિયમિત ટ્રેનિંગ મિશનમાં સામેલ હતું. ટ્રેનિંગ દરમિયાન વિમાન ક્રેશ થતાં ઘટનાસ્થળે મોટી સંખ્યામાં ઈમરજન્સી ટીમો પહોંચી ગઈ હતી.
પક્ષી સાથે અથડાવાની આશંકા
દુર્ઘટનાનું ચોક્કસ કારણ હજુ તપાસ હેઠળ છે. જોકે, એર ટ્રાફિક કંટ્રોલ સાથેની રેડિયો વાતચીતના આધારે પાઈલટના વિમાન સાથે પક્ષી અથડાયું હોવાની શક્યતા વ્યક્ત કરવામાં આવી છે. વિમાન ક્રેશ થયા બાદ આસપાસના વિસ્તારમાં સુરક્ષા માટે પહેલા લોકોને ઘરમાં રહેવાની સલાહ આપવામાં આવી અને બાદમાં ક્રેશ સાઈટની આસપાસના આશરે એક માઈલ વિસ્તારમાંથી લોકોને બહાર કાઢવામાં આવ્યા હતા. ક્રેશ બાદ F-16માંથી હાઈડ્રાઝિન નામનું અત્યંત ઝેરી રસાયણ બહાર આવવાની શક્યતાને ધ્યાનમાં રાખીને આ સાવચેતી રાખવામાં આવી હતી. આ રસાયણ F-16ની ઈમરજન્સી પાવર સિસ્ટમમાં ઉપયોગમાં લેવાય છે અને તેના કારણે બચાવ તથા રાહત ટીમોએ ખાસ સાવચેતી સાથે કામગીરી હાથ ધરી હતી. સદનસીબે, જમીન પર અન્ય કોઈ વ્યક્તિના ઘાયલ થયાના અહેવાલ મળ્યા નથી.
