Karnataka Dasara Elephant Rampage:કર્ણાટકના શિવમોગ્ગા શહેરમાં દશેરાના પાવન અવસરે યોજાયેલા ભવ્ય સરઘસ દરમિયાન એક અણધારી અને ડામાડોળ સ્થિતિ સર્જાઈ હતી. પરંપરાગત જંબૂ સવારી અને ઉત્સવ દરમિયાન ‘સોમનન્ના’ નામના હાથીએ અચાનક ઉશ્કેરાઈને રૌદ્ર સ્વરૂપ ધારણ કર્યું હતું. આ સરઘસમાં હાથીની પીઠ પર આશરે 650 કિલો વજનની ભવ્ય અને આકર્ષક ચાંદીની અંબાડી મૂકવામાં આવી હતી. હાથી અચાનક બેકાબૂ બનીને રસ્તા પર આમતેમ દોડવા લાગતા ચારેય બાજુ નાસભાગ મચી ગઈ હતી અને લોકોમાં ભયનો માહોલ ફેલાઈ ગયો હતો.
બેકાબૂ હાથીના કારણે વાહનો અને ઇમારતોને નુકસાન
હાથી અચાનક ઉશ્કેરાઈને રસ્તા પર દોડવા લાગતા તેની પીઠ પર સવાર 650 કિલો વજનની ચાંદીની અંબાડી અંતુલિત થઈને નીચે પટકાઈ હતી. આ ઘટનાને કારણે રસ્તાની આસપાસ ઊભેલા વાહનો તેમજ કેટલીક ઇમારતોને વ્યાપક નુકસાન પહોંચ્યું હતું. પોતાના પ્રાણ બચાવવા માટે રસ્તા પર હાજર રહેલા હજારો નાગરિકો જીવ મુઠ્ઠીમાં લઈને અહીં-તહીં સુરક્ષિત સ્થળો તરફ ભાગવા લાગ્યા હતા. અચાનક બનેલી આ ઘટનાથી ઉત્સવનો આનંદ ક્ષણભરમાં ચિંતા અને અફરાતફરીમાં ફેરવાઈ ગયો હતો.
વન વિભાગ અને પોલીસની સમયસૂચકતાથી સ્થિતિ કાબૂમાં
ઘટનાની ગંભીરતાને ધ્યાનમાં રાખીને તુરંત જ સ્થાનિક પોલીસ અને વન વિભાગના ઉચ્ચ અધિકારીઓ ઘટનાસ્થળે દોડી આવ્યા હતા. હાથીને વધુ હિંસક બનતો અટકાવવા અને સુરક્ષિત રીતે કાબૂમાં લેવા માટે પશુચિકિત્સકોની ટીમ દ્વારા તેને બેભાન કરવાની દવા (સેડેટીવ) આપવામાં આવી હતી. ભારે જહેમત બાદ હાથીને શાંત કરીને કોટી સીતારામંજન્ય મંદિર પરિસરમાં સુરક્ષિત રીતે ખસેડવામાં આવ્યો હતો, જ્યાં વન અધિકારીઓની દેખરેખ હેઠળ તેની સ્વાસ્થ્ય તપાસ અને સારવાર કરવામાં આવી રહી છે.
ભવિષ્યમાં આવી દુર્ઘટના ટાળવા સરકારનો કડક આદેશ
આ ગંભીર ઘટનાની ગંભીર નોંધ લેતા કર્ણાટકના મંત્રી રામલિંગા રેડ્ડીએ વન વિભાગના અધિકારીઓ પાસેથી સમગ્ર મામલાનો વિગતવાર અહેવાલ માંગ્યો છે. ભવિષ્યમાં આવા જોખમી બનાવોનું પુનરાવર્તન ન થાય તે માટે તેમણે કડક સૂચનાઓ આપી છે. મંત્રીએ આદેશ કર્યો છે કે આગામી વર્ષોથી ઉત્સવો અને જંબૂ સવારીમાં ભાગ લેનાર હાથીઓને મેદાનમાં ઉતારતા પહેલા ઓછામાં ઓછા 20 દિવસથી લઈને એક મહિના સુધીની વિશેષ તાલીમ આપવામાં આવે, જેથી ભીડભાડવાળા માહોલમાં પણ તેઓ શાંત રહી શકે.
