Dubais crown prince arrives to meet Smit Machhar: ફ્લાયદુબઈની ફ્લાઈટમાં જીવલેણ કોકપિટ હુમલા વચ્ચે મુસાફરોના જીવ બચાવનાર ભારતીય પાઇલટ કેપ્ટન સ્મિત મચ્છારને મળવા દુબઈના ક્રાઉન પ્રિન્સ અને UAEના નાયબ વડાપ્રધાન શેખ હમદાન બિન મોહમ્મદ બિન રાશિદ અલ મક્તૂમ હોસ્પિટલ પહોંચ્યા હતા. સારવાર લઈ રહેલા કેપ્ટન મચ્છારની મુલાકાત દરમિયાન શેખ હમદાને તેમની હિંમત, જવાબદારી અને માનવજીવન પ્રત્યેની કાળજીની પ્રશંસા કરી હતી. શેખ હમદાને જણાવ્યું હતું કે UAEના નેતૃત્વ તરફથી કેપ્ટન સ્મિત મચ્છારને સંપૂર્ણ સન્માન અને પ્રશંસા મળે છે. તેમણે કહ્યું કે, અમને ગર્વ છે કે તેઓ અમારી ટીમનો ભાગ છે અને UAE જે કરુણા, શાંતિ અને જીવનના મૂલ્યોનું પ્રતિનિધિત્વ કરે છે તેનું ઉદાહરણ છે.
જીવલેણ હુમલા છતાં કોકપિટનો દરવાજો ખોલ્યો
30 સપ્ટેમ્બરે દુબઈથી તેલ અવીવ જઈ રહેલી ફ્લાયદુબઈની ફ્લાઈટ FZ1073માં કોકપિટની અંદર ગંભીર ઘટના બની હતી. UAEની તપાસ મુજબ ઓમાની કો-પાઇલટ હમામ અલ-હમામીએ કોકપિટમાં રાખવામાં આવેલા ઇમરજન્સી ક્રેશ એક્સથી કેપ્ટન સ્મિત મચ્છાર પર હુમલો કર્યો અને વિમાનના નિયંત્રણ પર કબજો મેળવવાનો પ્રયાસ કર્યો હતો. ઘટના સમયે વિમાન સાઉદી અરેબિયાની ઉપર આશરે 34,000 ફૂટની ઊંચાઈએ ઉડી રહ્યું હતું. હુમલામાં ગંભીર રીતે ઘાયલ થયા હોવા છતાં કેપ્ટન મચ્છાર કોકપિટનો દરવાજો ખોલવામાં સફળ રહ્યા હતા. ત્યારબાદ ક્રૂ સભ્યો અને મુસાફરોએ કોકપિટમાં પ્રવેશ કરીને હુમલાખોરને કાબૂમાં લેવામાં મદદ કરી હતી. વિમાનને સાઉદી અરેબિયાના તબૂક એરપોર્ટ તરફ ડાયવર્ટ કરવામાં આવ્યું હતું અને સુરક્ષિત રીતે લેન્ડિંગ કરવામાં આવ્યું હતું.
UAEએ ઘટનાને ‘આતંકવાદી કૃત્ય’ ગણાવી તપાસ શરૂ કરી
UAEના એટર્ની જનરલે જણાવ્યું છે કે તપાસમાં કો-પાઇલટ દ્વારા વિમાન પર નિયંત્રણ મેળવવાનો પ્રયાસ અને કેપ્ટન પર ક્રેશ એક્સથી હુમલો કરાયો હોવાનું સામે આવ્યું છે. UAE સત્તાવાળાઓએ આ ઘટનાને આતંકવાદી કૃત્ય કરવાનો પ્રયાસ ગણાવ્યો છે. જોકે, ઘટનાનો ચોક્કસ હેતુ, પાછળનું કારણ અને કોઈ અન્ય વ્યક્તિ કે સંગઠન સાથેની સંભવિત કડી અંગે તપાસ હજુ ચાલુ છે.
કોણ છે હુમલાનો આરોપી હમામ અલ-હમામી?
હુમલાના આરોપી કો-પાઇલટની ઓળખ ઓમાનના નાગરિક હમામ અલ-હમામી તરીકે કરવામાં આવી છે. વિવિધ અહેવાલોમાં દાવો કરવામાં આવ્યો છે કે ઓમાનમાં અગાઉ તેના કથિત ઉગ્રવાદી વિચારો અંગે સુરક્ષા સંબંધિત ચિંતાઓ વ્યક્ત થઈ હતી અને તેને ત્યાં ઉડાન ભરવાથી રોકવામાં આવ્યો હતો. જોકે, તેના વિચારો અને ભૂતકાળ અંગેના કેટલાક દાવાઓની સત્તાવાર પુષ્ટિ હજુ તપાસનો વિષય છે. UAE અને અન્ય સંબંધિત એજન્સીઓ હવે આરોપીના ભૂતકાળ, ડિજિટલ પુરાવા, સંભવિત પ્રેરણા અને ઘટનાની સંપૂર્ણ કડીની તપાસ કરી રહી છે. તેથી હુમલા પાછળનો ચોક્કસ હેતુ હાલ અંતિમ રીતે સ્થાપિત થયો નથી.
વડાપ્રધાન નરેન્દ્ર મોદીએ પણ કરી સ્મિત મચ્છારની પ્રશંસા
ઘટના બાદ ભારતના વડાપ્રધાન નરેન્દ્ર મોદીએ પણ હોસ્પિટલમાં સારવાર લઈ રહેલા કેપ્ટન સ્મિત મચ્છાર સાથે વાતચીત કરી હતી અને તેમની હિંમત તથા હાજરજવાબી માટે પ્રશંસા કરી હતી. મચ્છારે આ વાતચીત દરમિયાન હુમલા સમયે બનેલી ઘટનાની વિગતો પણ શેર કરી હતી. ભારતીય પાઇલટની બહાદુરીને લઈને UAEના જનરલ સિવિલ એવિએશન ઓથોરિટી દ્વારા પણ કેપ્ટન મચ્છાર, ફ્લાઇટ ક્રૂ અને હુમલાખોરને કાબૂમાં લેવામાં મદદ કરનારા મુસાફરોની પ્રશંસા કરવામાં આવી છે.
સારવાર બાદ સ્મિત મચ્છારની તબિયતમાં સુધારો
હુમલા બાદ કેપ્ટન સ્મિત મચ્છારને શરૂઆતમાં સાઉદી અરેબિયાના તબૂકમાં સારવાર આપવામાં આવી હતી. ત્યારબાદ તેમને UAEમાં વધુ સારવાર માટે ખસેડવામાં આવ્યા હતા. ભારતીય દૂતાવાસ અને UAE સત્તાવાળાઓના જણાવ્યા મુજબ તેઓ સારી તબીબી સારવાર મેળવી રહ્યા છે અને સ્વસ્થ થઈ રહ્યા છે. ફ્લાઈટ FZ1073ની આ ઘટના બાદ હવે આંતરરાષ્ટ્રીય ઉડ્ડયન સુરક્ષા, કોકપિટ સિક્યુરિટી અને પાઇલટની બેકગ્રાઉન્ડ વેટિંગ અંગે પણ સવાલો ઊભા થયા છે. પરંતુ તપાસ પૂર્ણ થયા બાદ જ હુમલાની સંપૂર્ણ હકીકત અને તેની પાછળનું ચોક્કસ કારણ સ્પષ્ટ થઈ શકશે.
