Gold smuggling worth 65 crore: ડિરેક્ટોરેટ ઓફ રેવન્યુ ઈન્ટેલિજન્સ (DRI)એ દેશભરમાં સંગઠિત સોનાની તસ્કરી સામે મોટી કાર્યવાહી હાથ ધરી છે. ગુપ્ત માહિતીના આધારે કરવામાં આવેલા વિવિધ ઓપરેશન્સમાં કોલકાતા, મુંબઈ, કેરળ સહિતના વિસ્તારોમાંથી રૂ.65 કરોડથી વધુ કિંમતનું 42 કિલોગ્રામથી વધુ વિદેશી મૂળનું સોનું તથા લગભગ 10 કિલોગ્રામ ચાંદી જપ્ત કરવામાં આવી છે. આ કાર્યવાહી દરમિયાન પાંચ વિદેશી નાગરિકો સહિત કુલ 25 લોકોની ધરપકડ કરવામાં આવી છે. તપાસમાં તસ્કરોએ સોનું છુપાવવા માટે ખાસ બનાવેલા વાહનો, શરીર, કપડાં, ટ્રાન્ઝિટ મુસાફરો અને એરપોર્ટ સ્ટાફનો ઉપયોગ કરતા હોવાનો ખુલાસો થયો છે.
DRIએ એક સંગઠિત સિન્ડિકેટનો પર્દાફાશ કર્યો
મુંબઈના છત્રપતિ શિવાજી મહારાજ ઇન્ટરનેશનલ એરપોર્ટ પર 28-29 ઓગસ્ટ દરમિયાન DRIએ એક સંગઠિત સિન્ડિકેટનો પર્દાફાશ કર્યો હતો. દુબઈ, બેંગકોક અને માલેથી મુંબઈ થઈને ટ્રાન્ઝિટ કરતા મુસાફરો તેમજ એરપોર્ટના એક કર્મચારીની સંડોવણી સામે આવી હતી. અહીંથી મીણના સ્વરૂપમાં 24 કેરેટ સોનાની ધૂળ ધરાવતી 16 કેપ્સ્યુલમાંથી કુલ 6.85 કિલોગ્રામ સોનું જપ્ત કરવામાં આવ્યું હતું અને પાંચ વિદેશી નાગરિકો સહિત છ લોકોની ધરપકડ થઈ હતી. કોલકાતાના NSCBI એરપોર્ટ પર પણ બે અલગ-અલગ કાર્યવાહીમાં દુબઈ અને બેંગકોકથી આવેલા મુસાફરો પાસેથી અનુક્રમે 4.87 કિલોગ્રામ અને 3.36 કિલોગ્રામ વિદેશી સોનું મળી આવ્યું હતું.
125 સોનાના બાર જપ્ત કરવામાં આવ્યા
કોલકાતા તથા પશ્ચિમ બંગાળમાં અન્ય કાર્યવાહી દરમિયાન 15.61 કિલોગ્રામ વજનના 125 સોનાના બાર જપ્ત કરવામાં આવ્યા હતા. નડિયાદ જિલ્લાના બાનપુર ગામમાં BSF દ્વારા કરાયેલી કાર્યવાહી બાદ પણ વિદેશી મૂળનું સોનું મળી આવ્યું હતું. બીજી તરફ, કેરળના કોચીન અને કાલીકટ એરપોર્ટ પર DRIએ શરીરમાં છુપાવેલું 1.78 કિલોગ્રામ સોનું તથા ઇસ્ત્રીના ભારે એલોય ભાગમાં બનાવેલા ખાંચામાં છુપાવેલું 549 ગ્રામ સોનું ઝડપી પાડ્યું હતું. આ તમામ કેસોમાં કસ્ટમ્સ એક્ટ, 1962 હેઠળ કાર્યવાહી કરવામાં આવી છે.
1.74 કિલોગ્રામ વિદેશી સોનું જપ્ત કરવામાં આવ્યું
આ ઉપરાંત ભારત-બાંગ્લાદેશ સરહદ પર DRI અને BSFની સંયુક્ત કાર્યવાહીમાં 935 ગ્રામ અને 1.74 કિલોગ્રામ વિદેશી સોનું જપ્ત કરવામાં આવ્યું હતું. કોલકાતામાં શરીરમાં છુપાવેલી કેપ્સ્યુલમાંથી 1.48 કિલોગ્રામ સોનું તથા ગુવાહાટી સેક્ટરમાં 3.84 કિલોગ્રામ સોનાના બાર પણ મળી આવ્યા હતા. તમિલનાડુના રામનાથપુરમમાં દરિયાઈ માર્ગે શ્રીલંકાથી લાવવામાં આવેલું 1.36 કિલોગ્રામ સોનું અને 9.99 કિલોગ્રામ વિદેશી ચાંદી પણ જપ્ત કરાઈ છે. DRIની આ કાર્યવાહીથી આંતરરાષ્ટ્રીય અને આંતરરાજ્ય સ્તરે કાર્યરત સોનાની તસ્કરીના નેટવર્ક સામે તપાસ વધુ તેજ બનવાની શક્યતા છે.
