અમેરિકામાં દિવાળીની ઉજવણીમાં ટ્રમ્પને ખાસ ભેટ, હનુમાન ચાલીસાથી સૌનું ધ્યાન ખેંચાયું

White House Diwali Celebration: અમેરિકાના રાષ્ટ્રપતિ ડોનાલ્ડ ટ્રમ્પે વ્હાઇટ હાઉસના ઓવલ ઓફિસમાં ભારતીય-અમેરિકન સમુદાયના અગ્રણી નેતાઓ, ઉદ્યોગપતિઓ અને ઉચ્ચ અધિકારીઓ સાથે દિવાળીની ભવ્ય ઉજવણી કરી હતી. આ ખાસ પ્રસંગે ટ્રમ્પે પરંપરાગત દીવો પ્રગટાવીને ઉજવણીની શરૂઆત કરી હતી. કાર્યક્રમ દરમિયાન ટેક ઉદ્યોગપતિ વિશાલ ગોંડલે ટ્રમ્પને હનુમાન ચાલીસાની નકલ ભેટમાં આપી હતી. આ પ્રસંગની તસવીરો સોશિયલ મીડિયા પર પણ ચર્ચાનું કેન્દ્ર બની છે.

ઓવલ ઓફિસમાં દીવો પ્રગટાવી દિવાળીની ઉજવણી
અમેરિકન રાષ્ટ્રપતિ ડોનાલ્ડ ટ્રમ્પે ઓવલ ઓફિસમાં આયોજિત ખાસ કાર્યક્રમમાં પરંપરાગત દીવો પ્રગટાવીને દિવાળીની ઉજવણી કરી હતી. આ કાર્યક્રમમાં અમેરિકાના વિદેશ મંત્રી માર્કો રુબિયો અને સોશિયલ સિક્યુરિટી એડમિનિસ્ટ્રેશનના ડેપ્યુટી કમિશનર અર્જુન મોદી સહિત અનેક મહત્ત્વના મહેમાનો ઉપસ્થિત રહ્યા હતા. ભારતીય પરંપરા અને સંસ્કૃતિને ઉજાગર કરતા આ કાર્યક્રમમાં ભારતીય-અમેરિકન સમુદાયના પ્રતિનિધિઓએ પણ ભાગ લીધો હતો.

ભારત અને અમેરિકાના અનેક દિગ્ગજો રહ્યા હાજર
વ્હાઇટ હાઉસની દિવાળી ઉજવણીમાં ભારત અને અમેરિકાના અનેક જાણીતા ચહેરાઓ જોવા મળ્યા હતા. ઉપસ્થિત મહેમાનોમાં અમેરિકામાં ભારતના રાજદૂત વિનય મોહન ક્વાત્રા, જાણીતા શેફ વિકાસ ખન્ના અને ટેક ઉદ્યોગપતિ વિશાલ ગોંડલનો સમાવેશ થાય છે. આ ઉપરાંત IBMના CEO અરવિંદ કૃષ્ણા, FBIના ડિરેક્ટર કશ પટેલ, માઇક્રોન ટેક્નોલોજીના સંજય મેહરોત્રા અને નેશનલ ઇન્સ્ટિટ્યૂટ ઓફ હેલ્થના ડિરેક્ટર જય ભટ્ટાચાર્ય પણ કાર્યક્રમમાં જોડાયા હતા. રૂબી ઢલ્લા, રાજીવ શર્મા, વિશ્વજીત મલ્લામ્પાટી, હેતલકુમાર પટેલ અને વ્હાઇટ હાઉસના ઇવેન્ટ્સ અશર અરવિંદ ચઢ્ઢા સહિતના મહેમાનો પણ આ ઉજવણીનો ભાગ બન્યા હતા.

વિશાલ ગોંડલે ટ્રમ્પને ભેટમાં આપી હનુમાન ચાલીસા
આ કાર્યક્રમનું ખાસ આકર્ષણ ત્યારે જોવા મળ્યું જ્યારે GOQii ટેક્નોલોજીના સ્થાપક વિશાલ ગોંડલે અમેરિકન રાષ્ટ્રપતિ ડોનાલ્ડ ટ્રમ્પને હનુમાન ચાલીસા ભેટમાં આપી હતી. વિશાલ ગોંડલે સોશિયલ મીડિયા પ્લેટફોર્મ X પર તસવીરો શેર કરીને પોતાની ખુશી વ્યક્ત કરી હતી. તેમણે લખ્યું હતું કે, પ્રમુખ ટ્રમ્પને હનુમાન ચાલીસા ભેટમાં આપવાની તક મળવી તેમના માટે ગૌરવની ક્ષણ છે. તેમણે ભારત અને અમેરિકા વચ્ચેના મજબૂત સંબંધો માટે શુભેચ્છા પાઠવી હતી અને અંધકાર પર પ્રકાશના વિજયના પ્રતીક એવા દિવાળીના પર્વની ઉજવણી કરી હતી.

વ્હાઇટ હાઉસમાં દિવાળી ઉજવવાની શરૂઆત ક્યારે થઈ?
વ્હાઇટ હાઉસમાં દિવાળીની ઉજવણીની પરંપરા વર્ષ 2003માં અમેરિકાના તત્કાલીન રાષ્ટ્રપતિ જ્યોર્જ ડબલ્યુ. બુશના કાર્યકાળ દરમિયાન શરૂ થઈ હતી. શરૂઆતના વર્ષોમાં આ કાર્યક્રમો આઇઝનહોવર એક્ઝિક્યુટિવ ઓફિસ બિલ્ડિંગમાં યોજાતા હતા. ત્યારબાદ વર્ષ 2009માં અમેરિકાના તત્કાલીન રાષ્ટ્રપતિ બરાક ઓબામા વ્હાઇટ હાઉસના ઈસ્ટ રૂમમાં દીવો પ્રગટાવનારા પ્રથમ અમેરિકન રાષ્ટ્રપતિ બન્યા હતા. ત્યારથી વ્હાઇટ હાઉસમાં દિવાળીની ઉજવણી એક વિશેષ પરંપરા બની ગઈ છે. ઓવલ ઓફિસ અને રૂઝવેલ્ટ રૂમ જેવા મહત્ત્વના સ્થળોએ પણ આ પર્વની ઉજવણી કરવામાં આવે છે.