Delhi University Student Election: દિલ્હી યુનિવર્સિટી વિદ્યાર્થી સંઘ (DUSU) ચૂંટણી 2026નો શંખનાદ થઈ ચૂક્યો છે. આ વખતે DUSU ચૂંટણીનો જંગ માત્ર પરંપરાગત નારાઓ, ફી વધારા અને પાયાની સુવિધાઓ પૂરતો સીમિત નથી રહ્યો. આ ચૂંટણી સંગ્રામમાં ઊતરેલા બે સૌથી મોટા વિદ્યાર્થી સંગઠનો—અખિલ ભારતીય વિદ્યાર્થી પરિષદ (ABVP) અને નેશનલ સ્ટુડન્ટ્સ યુનિયન ઓફ ઈન્ડિયા (NSUI)એ પોતાના ઢંઢેરા (મેનિફેસ્ટો) જાહેર કરી દીધા છે. બંને પક્ષોનો એજન્ડા તદ્દન બદલાયેલો જોવા મળી રહ્યો છે. આર્ટિફિશિયલ ઈન્ટેલિજન્સ (AI) થી લઈને 24/7 લાઈબ્રેરી, મેન્સ્ટ્રુઅલ લીવ, પિંક બૂથ અને તાજેતરમાં સત્ય નિકેતન દુર્ઘટના બાદ ઊભા થયેલા સુરક્ષિત હોસ્ટેલના મુદ્દાઓ મેનિફેસ્ટોના કેન્દ્રમાં છે. DUની વિદ્યાર્થી રાજનીતિમાં આવેલો આ બદલાવ સ્પષ્ટ સંકેત આપી રહ્યો છે કે બંને સંગઠનો આ વખતે જેન-જી (Generation-Z) વિદ્યાર્થીઓની પ્રાથમિકતાઓને સાધવામાં કોઈ કસર છોડવા માંગતા નથી.
AI, ડિજિટલ સ્કીલ્સ અને 24*7 લાઈબ્રેરીનો વાયદો
વિદ્યાર્થી રાજનીતિ હવે માત્ર ફી વધારા પૂરતી સીમિત નથી રહી, પરંતુ વિદ્યાર્થીઓને ભવિષ્યના રોજગાર સાથે જોડવા માટે બંને સંગઠનોએ ટેકનોલોજીને મેનિફેસ્ટોનું મુખ્ય અંગ બનાવ્યું છે. ABVPએ પોતાના 'અ-આવાસ, ભ-ભાગીદારી, વિ-વિશ્વાસ, પ-પરિણામ' મોડેલ હેઠળ આર્ટિફિશિયલ ઈન્ટેલિજન્સ (AI) અને ડિજિટલ કૌશલ્ય આધારિત તકોને પ્રોત્સાહન આપવાનો વાદો કર્યો છે, સાથે જ પારદર્શી પરીક્ષા પરિણામો માટે ડિજિટલ સુધારા પર ભાર મૂક્યો છે. બીજી તરફ, NSUIએ પોતાના 'Accountable DU' એજન્ડા હેઠળ 24*7 રીડિંગ લાઈબ્રેરી, સમગ્ર કેમ્પસમાં સીમલેસ વાઈ-ફાઈ અને ડિજિટલ સ્કીલિંગ સંબંધિત ઈન્ટર્નશિપ પૂરી પાડવાનું વચન આપ્યું છે.
સત્ય નિકેતન હોનારત બાદ 'સુરક્ષિત આવાસ' બન્યો પ્રમુખ મુદ્દો
તાજેતરમાં સત્ય નિકેતન વિસ્તારમાં થયેલી દર્દનાક દુર્ઘટના બાદ દિલ્હી યુનિવર્સિટીમાં બહારથી આવીને રહેતા વિદ્યાર્થીઓ માટે પીજી (PG) અને હોસ્ટેલ સુરક્ષા સૌથી મોટો ચૂંટણી મુદ્દો બનીને ઉભર્યો છે. ABVPએ નવી હોસ્ટેલોના નિર્માણ, પીજી અને હોસ્ટેલોના સેફ્ટી ઓડિટ, ફાયર સેફ્ટી ધોરણો કડક કરવા અને એક સમર્પિત 'સ્ટુડન્ટ હાઉસિંગ સેલ' બનાવવાની જાહેરાત કરી છે. જ્યારે NSUIએ દિલ્હીમાં રેન્ટ કંટ્રોલ એક્ટ (Rent Control Act) કડક રીતે લાગુ કરાવવા અને વિદ્યાર્થીઓ માટે ચકાસાયેલ અને સસ્તું 'DU PG પોર્ટલ' શરૂ કરવાનું વચન આપ્યું છે.
મેન્સ્ટ્રુઅલ લીવથી લઈને પિંક બૂથ સુધી
કેમ્પસમાં ગર્લ્સ સ્ટુડન્ટ્સની સુરક્ષા અને આરોગ્યને લઈને પણ આ વખતે વ્યવહારુ દરખાસ્તો રજૂ કરવામાં આવી છે. NSUIએ ગર્લ્સ સ્ટુડન્ટ્સ માટે દર મહિને બે દિવસની મેન્સ્ટ્રુઅલ લીવ (Menstrual Leave) આપવાનો મોટો વાયદો કર્યો છે, આ ઉપરાંત જાતીય સતામણી સામે ઝીરો ટોલરન્સ નીતિ અને સબસિડી વાળી 24*7 કેન્ટીન લાવવાની વાત કરી છે. તેની સામે ABVPએ કેમ્પસમાં પિંક બૂથ, નાઈટ પેટ્રોલિંગ, ગાયનેકોલોજિસ્ટ (સ્ત્રી રોગ નિષ્ણાત)ની નિયમિત ઉપલબ્ધતા, સેનિટરી નેપકિન ડિસ્પેન્સર અને મહિલા વિદ્યાર્થીઓ માટે નવા કોમન રૂમ બનાવવાનો સંકલ્પ લીધો છે. પરીક્ષા પ્રણાલીમાં પારદર્શિતા માટે ABVPએ સપ્લીમેન્ટ્રી પરીક્ષાઓ અને ડિગ્રી સમયસર આપવા પર ભાર મૂક્યો છે, જ્યારે NSUIએ મફત રી-ઈવેલ્યુએશન અને સસ્તા મેટ્રો કન્સેશન પાસની માગ ઉઠાવી છે.
DUSU ચૂંટણીનું માળખું અને રાજકીય મહત્વ
દિલ્હી યુનિવર્સિટી વિદ્યાર્થી સંઘ (DUSU) ની ચૂંટણીને ભારતીય રાજકારણમાં 'મિની લોકસભા' અથવા યુવા રાજકારણની નર્સરી ગણવામાં આવે છે. આ ચૂંટણી દ્વારા ચાર મુખ્ય હોદ્દાઓ અધ્યક્ષ (President), ઉપાધ્યક્ષ (Vice President), સચિવ (Secretary) અને સહ-સચિવ (Joint Secretary) માટે મતદાન થાય છે. DU કેમ્પસ અને તેની સાથે સંકળાયેલી ડઝનબંધ કોલેજોના લાખો વિદ્યાર્થીઓ તેમાં ભાગ લે છે. આ ચૂંટણીના પરિણામો દેશના યુવા વર્ગના રાજકીય મૂડ અને વલણને દર્શાવતા મહત્વના સૂચક માનવામાં આવે છે, જેમાંથી ભારતને અરૂણ જેટલી અને વિજય ગોયલ જેવા અનેક દિગ્ગજ નેતાઓ સાંપડ્યા છે.
