PM Modi LNJP Hospital Visit: વડાપ્રધાન નરેન્દ્ર મોદી 12 નવેમ્બર બુધવારે દિલ્હી બ્લાસ્ટમાં ઘાયલ થયેલા પીડિતોને મળવા માટે લોક નાયક જયપ્રકાશ હોસ્પિટલની મુલાકાત લીધી હતી. 10 નવેમ્બરના રોજ દિલ્હીમાં લાલ કિલ્લા પાસે થયેલા શક્તિશાળી વિસ્ફોટમાં 12 લોકો માર્યા ગયા હતા, જ્યારે ઓછામાં ઓછા 20 લોકો ઘાયલ થયા હતા. PMએ ઘાયલોની ખબર પૂછવા માટે LNJP હોસ્પિટલની મુલાકાત લીધી હતી.
વડા પ્રધાન પીડિતોને મળવા પહોંચ્યા
PM મોદી આજે 12 નવેમ્બરે ભૂતાન મુલાકાતથી નવી દિલ્હી પાછા ફર્યા હતા. ત્યારબાદ તેઓ એરપોર્ટથી સીધા હોસ્પિટલ જવા રવાના થયા. અધિકારીઓએ જણાવ્યું કે, તેમની મુલાકાત દરમિયાન PM મોદી ઘાયલોને મળ્યા અને તેમની તબિયત પૂછી. બધા ઘાયલોને દિલ્હીની લોકનાયક જયપ્રકાશ હોસ્પિટલમાં દાખલ કરવામાં આવ્યા છે. અગાઉ, કેન્દ્રીય ગૃહમંત્રી અમિત શાહે વિસ્ફોટ પછી તરત જ હોસ્પિટલની મુલાકાત લીધી હતી.
વિસ્ફોટ બાદ પરિસ્થિતિની સમીક્ષા કરી
સોમવારે વડા પ્રધાન મોદીએ કહ્યું હતું કે, તેમણે ગૃહમંત્રી અમિત શાહ અને અન્ય અધિકારીઓ સાથે લાલ કિલ્લા મેટ્રો સ્ટેશન નજીક થયેલા વિસ્ફોટ બાદ પરિસ્થિતિની સમીક્ષા કરી હતી. તેમણે ખાતરી પણ આપી હતી કે અસરગ્રસ્ત લોકોને અધિકારીઓ દ્વારા સહાય પૂરી પાડવામાં આવી રહી છે.
ગૃહમંત્રી અમિત શાહે સોમવારે ઘાયલોની મુલાકાત લીધી
ગૃહમંત્રી અમિત શાહે સોમવારે ઘાયલોની તબિયત જાણવા માટે LNJP હોસ્પિટલની મુલાકાત લીધી હતી. દિલ્હી પોલીસ કમિશનર સતીશ ગોલ્ચાએ જણાવ્યું હતું કે, "વિસ્ફોટ ધીમી ગતિએ ચાલતા એક વાહનમાં થયો હતો. "લાલ કિલ્લા નજીક ધીમી ગતિએ ચાલતા વાહનમાં સાંજે લગભગ 6:52 વાગ્યે વિસ્ફોટ થયો હતો. વાહનમાં યાત્રી સવાર હતા." તેમણે ઉમેર્યું હતું કે, આ ઘટનામાં અન્ય વાહનોને પણ નુકસાન થયું છે. પોલીસ કમિશનરે જણાવ્યું હતું કે, દિલ્હી પોલીસ, ફોરેન્સિક ટીમો, NIA અને NSG સહિત તમામ એજન્સીઓ પરિસ્થિતિનું મૂલ્યાંકન કરી રહી છે.
સુરક્ષા સમીક્ષા બેઠકો
અમિત શાહે મંગળવારે સુરક્ષા એજન્સીઓને દિલ્હી વિસ્ફોટ કેસમાં સંડોવાયેલા દરેક ગુનેગારને શોધવાનો નિર્દેશ આપ્યો હતો. તેમણે કહ્યું હતું કે, વિસ્ફોટમાં સામેલ તમામ લોકોને સુરક્ષા એજન્સીઓના ગુસ્સાનો સામનો કરવો પડશે. રાષ્ટ્રીય રાજધાનીમાં સોમવારે સાંજે લાલ કિલ્લા પાસે થયેલા વિસ્ફોટના પગલે બે સુરક્ષા સમીક્ષા બેઠકોની અધ્યક્ષતા કર્યા બાદ શાહે આ સૂચનાઓ આપી હતી.
બેઠકમાં ઉચ્ચ અધિકારીઓ હાજર રહ્યા
સૂત્રોએ જણાવ્યું હતું કે, પહેલી બેઠકમાં કેન્દ્રીય ગૃહ સચિવ ગોવિંદ મોહન, ગુપ્તચર બ્યુરોના ડિરેક્ટર તપન ડેકા, દિલ્હી પોલીસ કમિશનર સતીશ ગોલચા અને NIAના ડિરેક્ટર જનરલ સદાનંદ વસંત દાતે હાજરી આપી હતી. જમ્મુ અને કશ્મીરના DGP નલિન પ્રભાતે પણ ઓનલાઈન બેઠકમાં હાજરી આપી હતી. તેમણે જણાવ્યું હતું કે, બેઠક દરમિયાન ઉચ્ચ અધિકારીઓએ વિસ્ફોટ પછીની પરિસ્થિતિ અંગે વિગતવાર અહેવાલો પૂરા પાડ્યા હતા. સૂત્રોએ જણાવ્યું હતું કે, બપોરની સુરક્ષા સમીક્ષા બેઠકમાં લગભગ એટલી જ સંખ્યામાં અધિકારીઓ હાજર રહ્યા હતા.
NIAને તપાસ સોંપાઈ
ગૃહ મંત્રાલયે વિસ્ફોટની તપાસ NIAને પણ સોંપી દીધી છે. આ સ્પષ્ટ સંકેત છે કે સરકારે વિસ્ફોટને આતંકવાદી કૃત્ય માણ્યું છે, કારણ કે NIA ફક્ત આતંકવાદી કેસોની તપાસ કરવા માટે અધિકૃત છે. ગૃહમંત્રીએ જણાવ્યું છે કે, ટોચની તપાસ એજન્સીઓ વિસ્ફોટની તપાસ કરી રહી છે અને ઘટનાના તળિયે પહોંચશે.
