Cyclone Murasu Hits Andhra Pradesh Coast: બંગાળની ખાડીમાં સર્જાયેલું ગંભીર ચક્રવાતી તોફાન ‘મુરાસુ’ આંધ્ર પ્રદેશના દરિયાકાંઠે ત્રાટકતાં અનેક વિસ્તારોમાં ભારે વરસાદ અને પવનનું જોર જોવા મળ્યું છે. હવામાન વિભાગના જણાવ્યા અનુસાર, મંગળવારે વહેલી સવારે વાવાઝોડાની લેન્ડફોલ પ્રક્રિયા શરૂ થઈ હતી. આ દરમિયાન પવનની ઝડપ 100થી 110 કિલોમીટર પ્રતિ કલાક રહી હતી, જ્યારે ઝાપટાં સાથે તે 120 કિલોમીટર પ્રતિ કલાક સુધી પહોંચી હતી. વાવાઝોડાની અસરથી આંધ્ર પ્રદેશ અને તેલંગાણામાં ભારે વરસાદ પડ્યો છે. રેલવે અને હવાઈ સેવાઓ ખોરવાઈ છે, જ્યારે ખેડૂતોમાં પાકને નુકસાન થવાની ચિંતા વધી છે.
120 કિમીની ઝડપે ફૂંકાયો પવન, નેલ્લોર નજીક લેન્ડફોલ
હવામન વિભાગની માહિતી મુજબ, ચક્રવાતી તોફાન ઉત્તર-ઉત્તર-પશ્ચિમ દિશામાં આગળ વધ્યું હતું. મંગળવારે વહેલી સવારે 3:30થી 5:30 વાગ્યાની વચ્ચે દક્ષિણ આંધ્ર પ્રદેશના દરિયાકાંઠે નેલ્લોર અને નરસપુર વચ્ચે, ઓંગોલ નજીક વાવાઝોડાની લેન્ડફોલ પ્રક્રિયા શરૂ થઈ હતી. આ દરમિયાન પવનની ઝડપ 100થી 110 કિલોમીટર પ્રતિ કલાક નોંધાઈ હતી, જ્યારે ભારે ઝાપટાં સાથે પવન 120 કિલોમીટર પ્રતિ કલાક સુધી પહોંચ્યો હતો. વાવાઝોડાના આગળના ભાગમાં રહેલા ‘વૉલ ક્લાઉડ’નો મોટો વિસ્તાર પણ દરિયાકાંઠા પર પહોંચ્યો હતો.
દરિયામાં બોટ ફસાઈ, માછીમારોને દરિયો ન ખેડવાની સૂચના
વાવાઝોડાની અસરથી દરિયામાં ઊંચાં મોજાં ઉછળ્યાં હતાં અને દરિયાકાંઠાના વિસ્તારોમાં ભારે પવન ફૂંકાયો હતો. વિશાખાપટ્ટનમના ઋષિકોંડા દરિયાકાંઠે એક બોટ મુશ્કેલીમાં ફસાઈ હોવાના અહેવાલ મળ્યા હતા. નેલ્લોરમાં પણ એક બોટ ફસાઈ હતી. જોકે, બંને ઘટનાઓમાં બોટમાં સવાર લોકોને સત્તાવાળાઓ દ્વારા સુરક્ષિત બચાવી લેવામાં આવ્યા હતા. પરિસ્થિતિ સામાન્ય ન થાય ત્યાં સુધી માછીમારોને દરિયો ન ખેડવાની કડક સૂચના આપવામાં આવી છે.
32 ટ્રેનો રદ, 11 ફ્લાઇટ્સનું સંચાલન બંધ
મુરાસુ વાવાઝોડાની અસરથી આંધ્ર પ્રદેશ અને આસપાસના વિસ્તારોમાં વાહનવ્યવહાર ખોરવાયો છે. મુસાફરોને મુશ્કેલીનો સામનો કરવો પડી રહ્યો છે.
રેલવે સેવા: દક્ષિણ મધ્ય રેલવે અને પૂર્વ તટ રેલવે દ્વારા આશરે 32 ટ્રેનો રદ કરવામાં આવી છે. કેટલીક અન્ય ટ્રેનોના રૂટમાં પણ ફેરફાર કરાયો છે.
ચેન્નાઈ એરપોર્ટ: 2 નવેમ્બરે વિજયવાડા, રાજમુંદ્રી, કડપ્પા અને તિરુચિ જતી ઇન્ડિગોની 11 ફ્લાઇટ્સ રદ કરવામાં આવી હતી.
અન્ય એરપોર્ટ: વિજયવાડા, રાજમુંદ્રી, તિરુપતિ અને વિશાખાપટ્ટનમ એરપોર્ટ પર પણ ફ્લાઇટ સંચાલન ખોરવાયું હતું.
તંત્ર દ્વારા મુસાફરોને પ્રવાસ પહેલાં એરલાઇન્સની વેબસાઇટ અને મોબાઇલ પર મળતા સંદેશાઓ તપાસવાની સલાહ આપવામાં આવી છે.
3થી 5 નવેમ્બર દરમિયાન ઘાટ રોડ પર મુસાફરી ન કરવા ચેતવણી
ભારે વરસાદને કારણે ડુંગરાળ વિસ્તારોમાં ભૂસ્ખલન અને પહાડો પરથી પથ્થરો ધસી પડવાનું જોખમ વધી ગયું છે. આથી તંત્ર દ્વારા 3, 4 અને 5 નવેમ્બર દરમિયાન ઘાટ રોડ પર મુસાફરી ટાળવાની સખત ચેતવણી આપવામાં આવી છે. ખાસ કરીને ડુંગરાળ રસ્તાઓ પરથી પસાર થતા વાહનચાલકોને સાવચેતી રાખવા અને બિનજરૂરી મુસાફરી ન કરવા સૂચના આપવામાં આવી છે.
તેલંગાણાના છ જિલ્લાઓમાં ઓરેન્જ એલર્ટ
મુરાસુ વાવાઝોડાની અસર પાડોશી રાજ્ય તેલંગાણામાં પણ જોવા મળી રહી છે. હવામાન વિભાગે ખમ્મમ, નલગોંડા, સૂર્યાપેટ, મહેબૂબનગર, વાનાપર્થી અને નાગરકુરનૂલ જિલ્લાઓ માટે ઓરેન્જ એલર્ટ જાહેર કર્યું છે. આ ઉપરાંત હૈદરાબાદ, રંગારેડ્ડી, મેડચલ અને વારંગલ સહિતના વિસ્તારોમાં મધ્યમથી ભારે વરસાદની આગાહી કરવામાં આવી છે. ભારે વરસાદને કારણે નીચાણવાળા વિસ્તારોમાં પાણી ભરાવાની અને વાહનવ્યવહાર ખોરવાવાની શક્યતા છે.
અગાઉના વાવાઝોડા બાદ મુરાસુનો માર, ખેડૂતોની ચિંતા વધી
આંધ્ર પ્રદેશના અનેક વિસ્તારોમાં ખેડૂતો હજુ અગાઉના ‘અર્નબ’ વાવાઝોડાથી થયેલા નુકસાનમાંથી બહાર આવ્યા નથી. 28 અને 29 ઓક્ટોબર, 2026ના રોજ આવેલા આ વાવાઝોડા બાદ હવે મુરાસુના કારણે ફરી ખેતી પર સંકટ ઊભું થયું છે. કૃષ્ણા, કાકીનાડા, શ્રીકાકુલમ, વિજયનગરમ અને પાર્વતીપુરમ-મન્યમ સહિતના જિલ્લાઓમાં સતત વરસાદ વરસી રહ્યો છે. કૃષ્ણા જિલ્લામાં ડાંગર ઉપરાંત બાજરી, મગફળી, કપાસ, શેરડી અને બાગાયતી પાકોને નુકસાન થવાની ચિંતા છે. ખેડૂતોને ભીતિ છે કે જો ખેતરોમાં ભરાયેલું પાણી નહીં ઓસરે અને ફરી ભારે વરસાદ પડશે તો ઉભા પાકને મોટું નુકસાન થઈ શકે છે. વાવાઝોડાની અસર ઓછી થયા બાદ ખેતીના નુકસાનનું વાસ્તવિક ચિત્ર સ્પષ્ટ થશે.
વાવાઝોડા વચ્ચે તંત્રની કામગીરી પર નજર
મુરાસુ વાવાઝોડાની અસરથી આંધ્ર પ્રદેશ અને તેલંગાણામાં ભારે વરસાદ, પવન અને વાહનવ્યવહારની સમસ્યાઓ ઊભી થઈ છે. ટ્રેનો અને ફ્લાઇટ્સ રદ થતાં મુસાફરોને મુશ્કેલી પડી રહી છે, જ્યારે ખેડૂતો પાકના નુકસાનને લઈને ચિંતિત છે. હાલમાં દરિયાકાંઠાના વિસ્તારોમાં સાવચેતી રાખવા, માછીમારોને દરિયાથી દૂર રહેવા અને ડુંગરાળ રસ્તાઓ પર મુસાફરી ટાળવા તંત્રની સૂચનાઓનું પાલન કરવું જરૂરી છે.
