ઢાકાની ગરીબ વસાહતોને ‘દિલ્હી’ બતાવી રહ્યા છે ચીની વ્લોગર્સ! ભારત વિશે ફેલાવી રહ્યા છે ભ્રામક વીડિયો

Chinese Vloggers' Fake Anti-India Propaganda : બાંગ્લાદેશની રાજધાની ઢાકામાંથી એક ચોંકાવનારો મામલો સામે આવ્યો છે. અહીં કેટલાક ચીની વ્લોગર્સ ગરીબ વિસ્તારોના વીડિયો બનાવીને તેને ભારતની રાજધાની નવી દિલ્હીના દૃશ્યો તરીકે રજૂ કરી રહ્યા હોવાનો ખુલાસો થયો છે. બાંગ્લાદેશી અખબાર 'પ્રોથોમ આલો'ના તપાસ અહેવાલ મુજબ, ઢાકાના ઉત્તરા અને ટેકપારા વિસ્તારોમાં આશરે 150થી વધુ ચીની નાગરિકો વીડિયો બનાવતા હોવાની સ્થાનિક લોકોએ જાણકારી આપી છે.

લાઇવસ્ટ્રીમમાં ભારત વિશે અપમાનજનક ટિપ્પણીઓ
આ વ્લોગર્સ ચીનના સોશિયલ મીડિયા પ્લેટફોર્મ વીચેટ અને ડોયિન પર લાઇવસ્ટ્રીમ કરે છે. એક મહિલા વ્લોગર 'મિયાંમિયાં'એ ઉત્તરા વિસ્તારનો વીડિયો બતાવતાં તેને નવી દિલ્હી ગણાવ્યો હતો. તેણે ત્યાંનાં ઘરો અને રહેણીકરણી વિશે અપમાનજનક ટિપ્પણીઓ પણ કરી હતી. અન્ય એક વ્લોગરે સ્થાનિક ચાની દુકાનનો વીડિયો બનાવતાં ત્યાંની ચા ગૌમૂત્રમાંથી બનતી હોવાનો પાયાવિહોણો દાવો કર્યો હતો.

મહિનાઓથી ચાલી રહી છે વીડિયો બનાવવાની પ્રવૃત્તિ
અહેવાલ મુજબ, આ પ્રવૃત્તિ છેલ્લા કેટલાક મહિનાઓથી ચાલી રહી છે. ચીની વ્લોગર્સ લાંબા સમય સુધી મોબાઇલ ફોનથી વીડિયો બનાવતા અને ચીનના વિવિધ પ્લેટફોર્મ પર પ્રસારિત કરતા જોવા મળ્યા છે. તેમના વીડિયોના શીર્ષકોમાં ગરીબી, ગંદકી અને ઝૂંપડપટ્ટી જેવા શબ્દોનો ઉપયોગ થતો હોવાનું પણ સામે આવ્યું છે. સ્થાનિક રહેવાસીઓએ જણાવ્યું કે આ લોકો વારંવાર વિસ્તારમાં આવીને શૂટિંગ કરે છે.

સ્થાનિકોની પરવાનગી વિના ઘરોમાં શૂટિંગની ફરિયાદ
વીડિયો બનાવવાની આ પ્રવૃત્તિ સામે સ્થાનિક રહેવાસીઓએ ગોપનીયતાના ભંગની ફરિયાદો પણ કરી છે. કેટલાક વ્લોગર્સ પર પરવાનગી વિના લોકોનાં ઘરોમાં પ્રવેશીને વીડિયો બનાવવાનો આરોપ છે. અહેવાલ મુજબ, કેટલાક સ્થાનિક લોકો તેમને વિસ્તારની માહિતી આપવા અને ભાષાંતરમાં મદદ કરવા માટે માર્ગદર્શક તરીકે કામ કરે છે. એક સ્થાનિક મહિલાએ આ કામ માટે દરરોજ આશરે 700થી 800 બાંગ્લાદેશી ટાકા મળતા હોવાનું જણાવ્યું હતું.

પોલીસને જાણ, પરંતુ હેતુ હજુ સ્પષ્ટ નથી
ઉત્તરા વેસ્ટ પોલીસ સ્ટેશનના અધિકારીઓએ ચીની નાગરિકો દ્વારા વિસ્તારમાં વીડિયો બનાવવાની પ્રવૃત્તિની જાણકારી હોવાની પુષ્ટિ કરી છે. જોકે, આ વીડિયો પાછળનો ચોક્કસ હેતુ શું છે તે હજુ સ્પષ્ટ થયું નથી. એક ચીની નાગરિકે પત્રકારોને આ પ્રવૃત્તિ પ્રોડક્ટ પ્રમોશન માટે હોવાનું જણાવ્યું હતું, પરંતુ વધુ વિગતો આપવાનો ઇનકાર કર્યો હતો. હાલ આ વીડિયો કોઈ સંગઠિત દુષ્પ્રચાર અભિયાનનો ભાગ છે કે નહીં તે અંગે કોઈ સત્તાવાર પુષ્ટિ થઈ નથી.